Ki Labib i dir lo lakoler?
Sa ki Labib i dir
Labib i dir ki en dimoun ki napa kontrol lo son lakoler pou fer ditor son lekor ek bann dimoun otour li. (Proverb 29:22) Menm si defwa nou annan rezon pour ankoler, Labib i dir ki bann ki kontinyen pran “bann lakoler” pa pou ganny lavi eternel. (Galat 5:19-21) I annan bann prensip dan Labib ki kapab ed en dimoun kontrol son lakoler.
Eski i toultan mal pour ankoler?
Non. Defwa nou kapab annan en bon rezon pour ankoler. Par egzanp, Neemya, en zonm ki ti fidel anver Bondye ti “pran en gran lakoler” ler i ti aprann ki serten adorater Bondye ti pe ganny mal trete.—Neemya 5:6.
Parfwa, Bondye i ankoler. Par egzanp, ler son pep dan letan lontan ti kas sa laranzman pour servi zis li e zot ti konmans servi bann fo bondye, Zeova “ti ankoler” avek zot. (Ziz 2:13, 14) Toudmenm, lakoler pa kalite pli enportan dan personnalite Bondye Zeova. Son lakoler i toultan zistifye e i toultan kontrol son lakoler.—Egzod 34:6; Izai 48:9.
Kan ki i mal pour ankoler?
I mal pour ankoler ler sa lakoler pa zistifye oubyen i san en kontrol e sa in souvan leka avek bann imen enparfe ler zot in pran lakoler. Par egzanp:
Kaen “ti tre ankoler” ler Bondye pa ti aksepte son sakrifis. Kaen ti reste ankoler ziska ki sa ti pous li pour touy son frer.—Zenez 4:3-8.
Profet Zonas “ti pran en gran lakoler” ler Bondye ti demontre pitye anver bann zabitan lavil Niniv. Bondye ti koriz Zonas e montre li ki i ti napa “rezon pran lakoler” e ki i ti devret annan konpasyon pour sa bann dimoun ki ti’n repantir pour zot pese.—Zonas 3:10–4:1, 4, 11.a
Sa bann legzanp i montre ki ler en dimoun enparfe “i pran lakoler, i pa azir an armoni avek ladrwatir Bondye.”—Zak 1:20.
Ki mannyer ou kapab kontrol ou lakoler?
Rekonnet ki i danzere ler en dimoun pa kontrol son lakoler. Serten i panse ki ler zot demontre zot lakoler, sa pou montre ki zot en dimoun ki kouraze. Me an realite, en dimoun ki pa kapab kontrol son lakoler i annan en febles grav. “Sa enn ki pa kapab kontrol son lakoler i parey en lavil san defans, san okenn miray.” (Proverb 25:28; 29:11) De lot kote, ler nou devlop sa abilite pour kontrol nou lakoler, nou demontre vre kouraz ek disernman. (Proverb 14:29) Labib i dir: “Vomye en dimoun ki kontrol son karakter, ki enn ki kaptir en lavil.”—Proverb 16:32.
Kontrol ou lakoler avan ki i fer ou fer en keksoz ki ou pou regrete. Psonm 37:8 i dir: “Pa pran lakoler, reste trankil; gard ou kalm, sankwa tou pou mal fini.” Remarke ki ler nou pa kontan en keksoz, nou annan en swa. Nou kapab swazir pour les pase sa lakoler avan ki tou i “mal fini” avek en move aksyon. Zis parey Efezyen 4:26 i dir, “ler zot ankoler, pa fer pese.”
Si i posib, ler ou konmans santi lakoler pe monte, sorti kot ou ete. Labib i dir: “Sa enn ki konmans en dispit, pe provok en linondasyon. Alor, arete avan ki bagar i konmanse.” (Proverb 17:14) I byen pour fer lape san tarde. Me avan tou, petet ou ek sa lot dimoun pou bezwen les zot lakoler pase avan ki zot koz lo sa problenm, pour ki zot kapab koz dan en fason kalm.
Rod tou lenformasyon. Proverb 19:11 (NWT) i dir: “En dimoun ki annan bon konprenezon pou sirman tarde pran lakoler.” I pou byen si nou rod tou lenformasyon avan ki nou tonm lo en konklizyon. Ler nou ekout byen tou lenformasyon ki enplike, i pou pli fasil pour pa pran en lakoler initil.—Zak 1:19.
Demann Bondye lape lespri dan lapriyer. Lapriyer i kapab ed nou pour eksperyans sa “lape Bondye ki depas tou sa ki nou kapab konpran.” (Filipyen 4:7) Lapriyer i fason prensipal ki nou kapab ganny lespri sen Bondye. I kapab ed nou pour devlop bann kalite parey lape, pasyans ek kontrol lo nou lekor.—Lik 11:13; Galat 5:22, 23.
Swazir nou bann zanmi byen. Nou annan sa tandans pour vin parey bann dimoun ki nou pas letan avek. (Proverb 13:20; 1 Korentyen 15:33) I pour sa rezon ki Labib i averti nou: “Pa frekant sa enn ki met li ankoler.” Akoz? “Ou riske imit zot mannyer fer e ganny pri dan en pyez.”—Proverb 22:24, 25.
a Aparaman Zonas ti aksepte sa koreksyon e i ti aret ankoler, akoz Bondye ti servi li pour ekri sa liv dan Labib ki apel Zonas.