LO KOUVERTIR | AKOZ MOVE KEKSOZ I ARIV AVEK BANN BON DIMOUN?

Move keksoz i ariv avek bann bon dimoun Akoz?

Vi ki Zeovaa i Kreater tou keksoz e i tou pwisan, bokou dimoun i tant pour blanm li pour tou sa ki arive dan lemonn enkli tou sa ki move. Par kont, remark sa ki Labib i dir lo sa vre Bondye:

• “Zeova i drwat dan tou sa ki i fer.”​—Psonm 145:17.

• “Tou sa ki [Bondye] i fer i zis. En Bondye fidel ki pa zanmen enzis, i drwat e zis.”​—Deterononm 32:4.

• “Senyer i ranpli avek labonte ek konpasyon.”​—Zak 5:11.

Bondye pa fer bann move keksoz arive. Me eski i enfliyans lezot pour fer bann move keksoz? Pa ditou. “Personn pa devre dir, ler i ganny tante, ‘Mon’n ganny tante par Bondye.’” Akoz? Parski “Bondye pa kapab ganny tante par sa ki mal, e li menm i pa tant personn.” (Zak 1:13) Bondye pa tant oubyen teste en dimoun par enfliyans li pour fer sa ki mal. Bondye pa osi fer bann move keksoz arive, ni menm ankouraz lezot pour fer sa ki mal. Alor, lekel oubyen kwa ki devret ganny blanmen kan keksoz mal i arive?

LETAN EK LEVENNMAN SAN EKSPEKTE

Labib i donn en rezon akoz imen i soufer en kantite: “Letan ek bann levennman san ekspekte i ariv lo zot tou.” (Eklezyast 9:11) Kan en levennman san ekspekte oubyen en aksidan i arive, an zeneral ki swa en dimoun i ganny afekte oubyen non, i depan lo kote i ete ler sa keksoz i arive. Apepre 2,000 an pase, Zezi Kri ti koz lo en aksidan ki ti touy 18 dimoun kan en latour ti tonm lo zot. (Lik 13:1-5) Zot pa ti mor akoz zot move lavi, zot ti zis anba sa latour kan i ti tonbe. An Zanvye 2010, en gran tranblemandter ti tap Aiti. Gouvernman dan sa pei ti dir ki plis ki 300,000 dimoun ti perdi zot lavi. Sa tranblemandter pa ti swazir lekel ki i ti touye. Bann maladi osi i kapab ariv lo tou dimoun nenport ki ler.

Serten i kapab demande: ‘Eski Bondye pa ti kapab anpes sa bann kalite maler arive? Eski i pa ti kapab protez bann bon dimoun?’ Si Bondye ti fer sa, i ti pou vedir ki i konn davans ler bann move keksoz pou arive. Menm si Bondye i annan sa abilite pour konn lavenir davans, kestyon ki nou bezwen demann nou lekor se: Eski Bondye i toultan servi son pouvwar pour konn keksoz davans?​—Izai 42:9.

Labib i dir: “Bondye i dan lesyel, i fer nenport kwa ki i anvi fer.” (Psonm 115:3) Zeova i fer sa ki i vwar i neseser me pa neseserman tou sa ki i kapab fer. Pareyman, menm si Zeova i kapab konn tou keksoz davans i pa neseserman vedir ki i pou fer li. Par egzanp, apre ki lemal ti’n ranpli Sodonm ek Gomor, Bondye ti dir Abraam: “Mon pou desann pour vwar si sa bann konplent ki mon’n tande i vre. Si i pa leka, mon pou konnen.” (Zenez 18:20, 21) Pour en pe letan, Zeova ti swazir pour pa konnen ki kantite lemal ti annan dan sa bann lavil. Pareyman, Zeova i kapab swazir pour pa konn davans tou keksoz. (Zenez 22:12) Me sa pa vedir ki sa i en febles lo son par oubyen ki i enparfe. Lefet ki “tou sa ki i fer i parfe,” Bondye i swazir kan i pou servi son abilite pour konn davans lavenir dapre son plan. I pa zanmen fors imen pour azir dan en serten fason.b (Deterononm 32:4) Ki konklizyon nou kapab tire? Senpleman: Bondye i swazir kan i pou servi son abilite pour konn keksoz davans dapre son bon zizman.

ESKI IMEN KI RESPONSAB?

Imen i osi responsab pour lemal dan en serten fason. Get sa ki Labib i dir lo sa ki kapab anmenn lemal. “Me tou dimoun i ganny tante ler i les li ganny antrennen e atire par son prop move dezir. Alor, move dezir enn fwa ki i’n ganny formen i donn nesans pese, e pese, ler in devlope, i anmenn lanmor.” (Zak 1:14, 15) Kan en dimoun i azir dapre bann move dezir, i bezwen sibir move konsekans. (Romen 7:21-23) Parey listwar i montre, imen in fer bann keksoz sokan e zot i’n amenn en kantite soufrans. An plis ki sa, bann move dimoun i kapab enfliyans lezot pour vin move e alor lemal i kontinyen ogmante.​—Proverb 1:10-16.

Eski Bondye i devret entervenir e anpes dimoun fer sa ki mal? Remarke ki mannyer zonm in ganny fer. Labib i dir ki Bondye ti kree imen dan son resanblans, setadir, avek menm kalite ki li i annan. Alor, imen i annan sa abilite pour reflekte bann kalite Bondye. (Zenez 1:26) Imen i annan sa laliberte pour swazir e nou kapab swazir pour kontan Bondye e reste atase avek li par fer sa ki byen. (Deterononm 30:19, 20) Si Bondye ti fors dimoun pour azir dan en serten fason, pa i ti pou konmsi i pa’n donn zot sa laliberte pour swazir! Alor, imen ti pou zis parey en robot, ki fer egzakteman sa ki zot in ganny progranmen pour fer. I ti pou osi parey si nou lavi ti ganny kontrole par desten oubyen Kismet. Pa nou rekonesan ki Bondye i permet nou pour fer nou prop swa! Me sa pa vedir ki bann soufrans ki arive akoz fot imen ek bann move swa pou touzour la.

ESKI KARMA I EN LAKOZ SOUFRANS?

Si ou ti demann en Endou oubyen Boudis sa kestyon ki lo kouvertir sa magazin, zot ti pou probableman reponn ou: “Move keksoz i ariv avek bon dimoun akoz lalwa Karma. Zot pe rekolte sa ki zot in fer dan zot lavi avan.”c

Konsernan lansennyman lo Karma, i byen pour konn sa ki Labib i dir lo lanmor. Dan zarden Edenn, kot imen ti ganny kree, Kreater ti dir avek sa premye zonm, Adan: “Fri dan tou pye dibwa sa zarden ou kapab manze ziska ou rasazye. Me, an sa ki konsern sa pye konnesans bon e move ou pa devret manze, parski sa zour ki ou manz son fri, sirman ou pou mor.” (Zenez 2:16, 17) Si Adan pa ti’n fer pese par dezobei Bondye, i ti pou’n viv pour touzour. Lanmor i konsekans dezobeisans lord Bondye. Apre sa, ler bann zanfan ti ne, “lanmor in pas avek tou dimoun.” (Romen 5:12) Alor, nou kapab dir ki “rekonpans pour pese i lanmor.” (Romen 6:23) Labib i eksplike: “En dimoun ki’n mor, i’n ganny libere avek pouvwar pese.” (Romen 6:7) Alor, en dimoun pa kontinyen pey pour son bann pese apre lanmor.

Plizyer milyon dimoun ozordi i dir ki Karma i sa rezon akoz limanite i soufer. En krwayan i normalman aksepte son prop soufrans enkli soufrans lezot san ki i les sa fatig li en kantite. Menm si sa i le ka, sa krwayans pa donn okenn lespwar ki en zour lemal pou arete. Dapre sa krwayans, sel soulazman ki en dimoun i kapab reenkarnen, se par en latitid akseptab dan lasosyete e konnesans spesyal. Byensir, sa bann nide i diferan avek sa ki Labib i dir.d

REZON PRENSIPAL!

Toudmenm, i pa zonm ki rezon prensipal pour lemal. Satan oubyen Dyab, ki avan ti en lanz fidel Bondye, ‘pa’n kontan pour reste dan laverite’ e i’n anmenn pese dan lemonn. (Zan 8:44) I ti pous bann imen pour rezet lotorite Bondye dan zarden Edenn. (Zenez 3:1-5) Zezi Kri ti apel li “sa enn move” e “sa enn ki gouvern lemonn.” (Matye 6:13, NW; Zan 14:30) Limanite an zeneral pe swiv legzanp Satan pour rezet bon gidans Zeova. (1 Zan 2:15, 16) 1 Zan 5:19 i dir: “Lemonn antye i dan pouvwar dyab.” I annan ankor lezot lanz ki’n vin move ki’n zwenn ansanm avek Satan. Labib i dir ki Satan ek son bann demon pe “tronp lemonn antye” e pe anmenn ‘maler lo later.’ (Revelasyon 12:9, 12) Alor, se Dyab ki prensipalman responsab pour lemal.

I kler alor, ki Bondye pa responsab pour bann move keksoz ki arive avek dimoun e se pa li ki fer nou soufer. O kontrer, i’n promet pour met en lafen avek lemal, parey lartik swivan pou montre.

[Not anba lo paz]

[Ekstre lo paz 5]

Imen in komet bann keksoz sokan e fer dimoun soufer en kantite

[Portre lo paz 4]

Akoz Bondye i les bann bon dimoun soufer?

[Portre lo paz 5]

Akoz Bondye pa protez bann bon dimoun kont krim?

[Portre lo paz 6]

Eski ou ti konnen ki rezon prensipal pour nou soufrans i “sa enn ki gouvern lemonn,” setadir Dyab?​—Zan 14:30