Gidans pour Sirveyan Lekol

DAN sak kongregasyon, en ansyen i ganny apwente pour vin sirveyan Lekol Minister Teokratik. Si ou’n ganny konfye avek sa responsabilite, ou lantouzyasm pour lekol e ou lentere personnel dan progre sak zelev i kapab bann fakter enportan konsernan sa ki lekol i kapab akonpli.

En par enportan ou travay se pour diriz Lekol Minister Teokratik ou kongregasyon tou le semenn. Gard antet ki apard ki bann zelev ki annan partisipasyon, i annan osi lezot ki prezan. Diriz lekol dan en fason ki kongregasyon antye i resevwar motivasyon, rapel pratik ki relye avek omwen enn parmi sa bann lobzektif lekol ki ganny mansyonnen lo paz 5 ziska 8 dan sa liv letid.

Pran en lentere dan tou zelev, ki swa zot pou lir, fer bann demonstrasyon, oubyen prezant bann diskour. Ed zot pour konsider sa ki zot pe fer, pa senpleman konman en devwar, me konman en loportinite pour fer progre dan zot servis pour Zeova. Byensir, sa zefor ki zot personnelman fer, i en fakter enportan dan zot progre. Me i osi enportan ki ou montre en bon lentere dan zot, ed zot pour konpran valer sa pwen, e eksplik konman pour aplik en tel pwen. Pour ou kapab arive fer sa, ekout atantivman sak ekspoze afen ki ou kapab fer bann bon remark.

Fer sir pour konmans e fini lekol aler. Donn en bon legzanp dan sa domenn par gard ou komanter dan letan dezinyen. Si en zelev i depas letan, ou oubyen en asistan i devret donn en sinyal. Sa zelev i devret termin sa fraz ki i ti pe dir e apre kit lestrad. Si lezot parti progranm i depas letan, akoursi ou prop komanter, e diskit sa pwen avek sa frer konsernen apre renyon.

Ler ou prezan, ou devret kondwir lekol. Si parler ou pa kapab prezan, en lot ansyen ki’n ganny dezinyen davans par konsey bann ansyen i devret kondwir lekol. Si ou bezwen led pour prepar progranm, ekrir e distribye bann papye ekspoze, oubyen aranze pour fer ranplasman lo progranm, en asistan ministeryel ki’n ganny swazir par konsey bann ansyen i kapab asiste ou avek sa bann keksoz.

Anrezistre bann Zelev. Ankouraz tou proklanmater pour antre dan lekol. Lezot ki pe asosye aktivman avek kongregasyon i kapab antre si zot dakor avek lansennyman Labib e si zot lavi i an armoni avek bann prensip Kretyen. Ler en dimoun i demontre en dezir pour antre dan lekol, felisit li. Si sa dimoun i pa ankor vin en proklanmater, ou konman sirveyan lekol ou devret diskit avek li bann kalifikasyon pour kapab antre dan lekol, i pli bon fer sa dan prezans sa dimoun ki kondwir son letid Labib (oubyen dan prezans en paran Temwen). Sa bann kalifikasyon i parey avek pour en dimoun ki pou vin en proklanmater non batize. Zot trouve dan liv Organisés pour bien remplir notre ministère lo paz 98 ziska 100. Gard en lalis azour tou sa bann ki antre dan lekol.

Servi Form Konsey. Form konsey pour sak zelev i dan son liv letid, lo paz 79 ziska 81. Parey i ganny endike par sak kouler, nenport pwen depi 1 ziska 17 i kapab ganny servi ler en zelev pe fer lektir. Pour bann prezantasyon ki paret en demonstrasyon, nenport pwen i kapab ganny servi eksepte 7, 52, ek 53. Pour bann diskour i enkli tou pwen eksepte 7, 18, ek 30.

Ler en pwen i ganny dezinyen, sa sirveyan lekol i devret verifye ki en mark kreyon i ganny fer anba “Dat Dezinyen” dan sa lespas fourni akote sa pwen lo form konsey dan liv sa zelev. Apre ki sa zelev in fini fer son ekspoze, an prive demann li si in fer legzersis ki trouve alafen diskisyon sa pwen. Si wi, fer en mark dan bwat lo sa form. Si ou pe demann li pour re-travay sa menm pwen, pa fodre ekrir okenn keksoz lo form konsey; zis pa ranpli sa lespas anba “Dat Konplete.” Sa lespas anba “Dat Konplete” i devret ganny marke selman ler sa zelev i pare pour al lo en lot pwen. Deplis, lo paz 82 dan liv sa zelev, apre sak ekspoze zelev, ekrir dat lo kote gos sa senn ki li i’n servi. I annan lespas lo form konsey e lo lalis bann senn pour ki sakenn i kapab ganny servi de fwa. Bann zelev i devret anmenn zot liv avek zot pandan progranm.

Deziny zis en pwen alafwa. Normalman, i pli bon pour kouver bann pwen dan lord ki zot in ganny mansyonnen dan liv. Sepandan, si serten zelev i montre en abilite remarkab, petet ou kapab ankouraz li pour etidye e aplik serten leson lo zot menm. Apre ou kapab ed zot avek bann pwen ki ou krwar pou kontribye plis anver zot devlopman konman bann orater ek ansennyan efikas.

Menm si en zelev i dan lekol depi bokou lannen, par etidye e aplik sak pwen i kapab retir bokou benefis. Pour bann zelev ki annan bann bezwen spesifik, ou kapab ed zot par swazir serten pwen pour zot travay lo la olye ki fer zot travay bann pwen dan lord parey i ete dan liv.

Donn Konsey. Ler ou pe donn konsey servi byen bann legzanp ek prensip Labib. Bann zelev i devret santi ki sa konsey ki zot pe gannyen e lafason ki i pe ganny prezante i ganny motive par bann prensip eleve Parol Bondye.

Gard antet ki ou en ‘konpanyon travay’ avek ou bann frer ek ser. (2 Kor. 1:24) Parey zot, ou osi bezwen kontinyen fer zefor pour amelyore konman en orater ek ansennyan. Ou menm etidye sa liv Benefisye atraver Ledikasyon Lekol Minister Teokratik, aplik son bann konsey, e donn en bon legzanp pour lezot fer parey.

Pandan ki ou fer sa, fer li ou lobzektif pour ed bann zelev vin bann bon lekter, orater kapab, ek bann ansennyan efikas. Pour akonpli sa, esey fourni nenport led neseser pour ki bann zelev i konpran sa bann pwen, akoz zot enportan, e konman pour devlop zot. Sa liv letid in ganny prepare dan en fason ki pou ed ou fer sa. Sepandan, ou bezwen fer plis ki zis lir bann mo dan sa liv. Diskit lide ki sa bann mo i eksprimen e konman pour aplik sa lide.

Si en zelev in byen travay en serten pwen, felisit li. An bref mansyonn kwa ki’n fer son ekspoze efikas oubyen akoz sa ki i’n fer i enportan. Si ou santi ki i pou benefisye plis si i donn plis latansyon lo en serten pwen, fer sir ki i konpran akoz. Diskite konman pour akonpli sa lobzektif. Koz dan en fason spesifik, e anmenmtan avek labonte.

Kit antet ki pour bokou, i tre difisil pour zot mont devan en lodyans pour fer en prezantasyon. Si en dimoun i santi ki i pa’n fer byen, petet i kapab mazinen si i devret kontinyen eseye. Imit Zezi, ki pa ti kraz en “pti banbou pliye” oubyen tenny en “lalanp ki pe fimen.” (Mat. 12:20) Pran an konsiderasyon kondisyon emosyonnel sa zelev. Ler ou pe donn konsey fer li dapre kondisyon sa zelev, ki swa sa zelev i ase nouvo oubyen i en proklanmater eksperyanse. Felisitasyon senser e avek lanmour i kapab ankouraz dimoun pour kontinyen fer zot mye.

Tret sak zelev avek dinite. Romen 12:10 i dir nou: “Montre plis respe pour kanmarad.” En konsey byen apropriye pour en frer ki diriz en Lekol Minister Teokratik! Si sa zelev i pli vye ki ou, pran swen pour aplik sa gidans ki trouve dan 1 Timote 5:1, 2. Toutfwa, nenport ki laz en dimoun i annan, ler i ganny konseye dan en fason amikal pour li aziste son fason fer keksoz, i pou pli fasil pour li aksepte sa konsey.—Prov. 25:11.

Ler ou pe donn konsey, aksantye avek sa zelev lobzektif sa formasyon. Sa lobzektif i pa senpleman pour resevwar felisitasyon pour fer en ekspoze e pour ganny demande pour al lo en lot pwen. Lobzektif i pa pour vin en orater ek en ansennyan ki pou ganny admire par lezot. (Prov. 25:27) Nou dezir se pour servi nou don koze pour loue Zeova e pour ed lezot arive konn e kontan li. Nou formasyon se pour ekip nou pour pran byen swen avek sa travay ki ganny rezimen dan Matye 24:14 ek 28:19, 20. Avek letan, bann frer ki kalifye pou kapab ganny envite pour pran swen “troupo Bondye” konman bann orater ek ansennyan piblik.—1 Pyer 5:2, 3.

Sizere ki bann zelev i lir sa sapit dan liv letid pour zot prosen pwen detrwa zour apre ki i ganny son papye ekspoze. Ankouraz zot pour aplik sa ki zot aprann ler zot prepar zot partisipasyon pour lekol dan konversasyon toulezour, ler pe fer komanter dan bann renyon ek dan predikasyon.

Deziny bann Partisipan. Normalman sa i devret ganny fer omwen trwa semenn davans. Si i posib, i pli bon pour met zot an ekrir.

Diskour lenstriksyon i devret ganny donnen avek bann ansyen preferableman bann ki pou fer li dan en fason efikas, osi avek bann asistan ministeryel ki bann bon ansennyan.

Pour determinen lekel ekspoze zelev ki pour ganny donnen avek bann frer e lekel avek bann ser, swiv lenstriksyon ki trouve dan progranm lekol. Si i annan en pti gin frer me bokou ser ki donn bann ekspoze zelev, donn bann frer sifizaman loportinite pour donn bann ekspoze ki enplik plis ki zis lektir Labib.

Ler ou pe fer progranm konsider sirkonstans sak dimoun. Eski i neseser pour deziny en ansyen oubyen en asistan ministeryel pour partisip dan lekol anmenmtan ki i annan partisipasyon dan Renyon Servis oubyen dan menm semenn ki i annan en diskour piblik dan kongregasyon? Eski i neseser deziny en ser pour fer en prezantasyon lo menm zour avek son zanfan, ki kekfwa sa ser i bezwen ed son zanfan? Sirtou dan ka en manrmay oubyen en zelev ki pa ankor batize, eski sa topik i apropriye pour li? Verifye pour fer sir ki sa lenformasyon i apropriye avek sa pwen ki sa zelev pe travay lo la.

Pour bann ekspoze ki ganny fer par bann ser, ordinerman sa zelev pou swazir son prop senn an armoni avek lenstriksyon lo paz 78 ek 82. Fodre deziny en asistan, me en dezyenm asistan i kapab ganny servi. Si en zelev i demann en asistan ki pou partikilyerman byen adapte pour fer en serten senn, ou devret pran konsiderasyon pour sa demann.

Bann Lekol siplemanter. Si i annan plis ki 50 zelev dan lekol, ou kapab konsider servi en landrwa adisyonnel pour bann zelev prezant zot ekspoze. Dapre bezwen lokal, sa laranzman i kapab ganny servi pour tou bann prezantasyon ki ganny fer par bann zelev oubyen pour zis sa de dernyen ekspoze.

Sak lekol siplemanter i devret annan en frer kalifye, preferableman en ansyen. Kot i neseser, en asistan ministeryel byen kalifye i kapab ganny servi. Laprouvasyon pour servi sa bann frer i devret ganny donnen par konsey bann ansyen. Sa sirveyan lekol i devret travay etrwatman avek zot afen ki i annan en sirveyans efikas lo bann zelev nenport ki landrwa ki i fer son lot prezantasyon.

Laklas spesyal pour Lektir. Si konsey bann ansyen dan kongregasyon i dakor ki i annan detrwa endividi dan kongregasyon ki bezwen lenstriksyon debaz pour lir sa langaz ki ganny servi dan kongregasyon, ou kapab fer laranzman pour sa ganny fer anmenmtan avek Lekol Minister Teokratik. Sa lenstriksyon i kapab enplik bann abilite senp konman pour aprann lir, oubyen son lobzektif i kapab pour amelyor lektir.

Pa fodre neseserman ki sa lekol i ganny fer anmenmtan avek ler bann ekspoze zelev dan Lekol Minister Teokratik pe ganny fer. Afen pour fourni sifizaman led, plis letan i kapab neseser ki sa letan disponib pandan lekol. Bann ansyen i kapab determin sa ki neseser e kan sa laklas pou ganny fer. Dapre bezwen, laranzman i kapab ganny fer pour lenstriksyon an group oubyen avek enn par enn.

I bezwen en frer kalifye. Preferableman, en frer ki en bon lekter e ki byen familye avek sa langaz. Si en frer pa disponib, bann ansyen i kapab demann en ser kapab e egzanpler pour ede. I devret kouver son latet ler pe enstri dan lekol.—1 Kor. 11:3-10; 1 Tim. 2:11, 12.

Sa pti liv Appliquez-vous à la lecture et à l’écriture i disponib dan bokou langaz. I’n ganny prepare pour ansenny bann abilite senp konman pour aprann lir. Lezot lenformasyon lenstriksyon i kapab ganny servi, depandan lo nivo abilite lir sa bann ki dan sa laklas. Ler bann zelev in ase progrese, zot devret ganny ankouraze pour partisip regilyerman dan progranm Lekol Minister Teokratik.

Konman sirveyan Lekol Minister Teokratik, ou kapab fer bokou pour benefisye kongregasyon. Prepar byen, e an armoni avek konsey dan Romen 12:6-8, desarz byen ou devwar konman en don presye sorti kot Bondye.