Kwen Kestyon
◼ Ki bann zanfan i devret aprann pour zot vin matir spirityelman?
Bann paran Kretyen i fer bokou pour elve zot zanfan “dan en ledikasyon ek lenstriksyon Senyer.” (Efe. 6:4) Par egzanp, bann paran in vwar ki i itil ler zot egzamin teks pour lazournen tou le bomaten avek zot zanfan. Pandan Ladorasyon Fanmir e dan lezot moman, bann fanmir i kapab get e diskit lo en video ansanm, koz lo en size dan liv Young People Ask, fer en dram baze lo en zistwar dan Labib oubyen fer bann pti demonstrasyon. Me pour ki zanfan i “avanse pour ariv dan en matirite,” zot bezwen ganny ansennyen laverite pli profon dan Labib.—Ebr. 6:1.
Reflesir lo sa ki nou ansenny bann dimoun ki nou zwenn dan predikasyon. Lo en premye vizit oubyen en vizit ki nou’n fer enn de fwa, nou lobzektif se pour konmans en letid Labib par servi sa liv Ki Labib i dir? Apre ki nou’n fini etidye sa piblikasyon, nou servi sa liv “Reste dan Lanmour Bondye.” Akoz? Sa liv Ki Labib i dir? i donn bann etidyan en konnesans de baz lo Labib. Sa liv “Lanmour Bondye” i ansenny zot ki mannyer pour met an pratik bann prensip Labib dan zot lavi tou le zour. Ler bann nouvo i etidye sa de liv, sa i ed zot pour vin “anrasinen” dan Kris e “ferm dan lafwa.” (Kol. 2:6, 7) Eski sa bann lenformasyon pa pou osi benefisye nou zanfan? Zot osi zot bezwen ganny ansennyen lo sa ranson, lo Rwayonm ek kondisyon bann mor. Zanfan i osi bezwen konnen akoz Bondye i permet soufrans e ki mannyer pour idantifye bann dernyen zour sa lemonn. Zot bezwen konvenki ki Temwen Zeova pe ansenny laverite. Bann zenn i bezwen osi konpran bann prensip Labib e ki mannyer zot kapab “konn fer diferans ant sa ki byen ek sa ki mal.” (Ebr. 5:14) Byensir, bann paran i devret pran an konsiderasyon laz ek nivo konprenezon zot zanfan. Par kont, bokou zanfan i annan sa abilite pour aprann bann laverite pli profon dan Labib menm kan zot ankor pti.—Lik 2:42, 46, 47.
Pour ed bann paran etidye sa liv Ki Labib i dir?, pou annan bann konsey lo jw.org. Bann fanmir i kapab vwar sa bann lenformasyon lo nou sit anba BIBLE TEACHINGS > TEENAGERS. Pli tar, lezot konsey pou disponib baze lo sa liv “Lanmour Bondye.” Byensir, zot osi kapab servi sa de liv. Paran i kapab deside si zot pou servi sa lenformasyon pandan Ladorasyon Fanmir, kan pe fer letid avek enn zot zanfan oubyen kan pe form en zanfan konman pour fer son prop letid personnel.