Servi Labib pour reponn

LER nou ganny kestyonnen konsernan nou bann krwayans, nou fason viv, nou pwenn-vi lo bann levennman resan, nou lespwar pour lavenir, nou esey servi Labib pour reponn. Akoz? Parski i Parol Bondye. Labib i sours nou bann krwayans. Nou baz nou fason viv lo Labib. I fasonn nou pwenn-vi lo bann levennman lemonn. Nou lespwar pour lavenir i solidman anrasinen dan bann promes Labib enspire.—2 Tim. 3:16, 17.

Nou vreman konsyan sa responsabilite ki al avek nou non. Nou bann Temwen Zeova. (Iza. 43:12) Alor ler nou reponn bann kestyon, nou pa baz nou larepons lo filozofi imen, me i baze lo sa ki Zeova i dir dan son Parol enspire. I vre ki, konman bann endividi nou annan nou prop lopinyon lo bann keksoz, me nou les Parol Bondye fasonn nou pwenn-vi parski nou san pour san konvenki ki i laverite. Byensir, Labib i donn nou liberte pour swazir bokou keksoz ki nou personnelman prefere. Olye ki enpoz nou bann preferans lo lezot, nou oule ansenny bann prensip ki dan Labib, alor permet sa bann ki ekout nou pour egzers sa menm liberte pour swazir ki nou annan. Parey zapot Pol, nou esey ed zot “pour ki zot ariv dan lobeisans par lafwa.”—Rom. 16:26.

Zezi i ganny dekrir dan Revelasyon 3:14 konman “temwen fidel e vre.” Konman ki i ti reponn bann kestyon e fer fas avek bann sitiasyon ki ti ganny met devan li? Parler par servi bann ilistrasyon ki ti pou fer dimoun reflesir. Dan lezot lokazyon par kestyonn sa dimoun lo son prop konpreansyon lo en verse. Souvan par sit en verse, par donn sinifikasyon en verse, par servi diferan mo, oubyen fer referans lo en verse dan en fason endirek. (Mat. 4:3-10; 12:1-8; Lik 10:25-28; 17:32) Dan premye syek, bann kopi roulo Lekritir ti normalman ganny mete dan bann sinagog. Napa levidans ki Zezi ti annan en koleksyon personnel sa bann roulo, me i ti konn byen Lekritir e i ti souvan fer referans lo zot ler pe ansenny lezot. (Lik 24:27, 44-47) I ti kapab vreman dir ki sa ki i ti ansennyen pa ti sorti dan li menm. I ti koz sa ki i ti’n tande avek son Papa.—Zan 8:26.

Nou dezir se pour swiv legzanp Zezi. Nou pa’n antann Bondye koze, parey Zezi. Me Labib i Parol Bondye. Ler nou servi li konman baz pour nou bann larepons, nou evite atir latansyon lo nou menm. Nou montre ki olye eksprim lopinyon en imen enparfe, nou antyerman determinen pour les Bondye annan sa drwa pour dir kwa ki laverite.—Zan 7:18; Rom. 3:4.

Byensir, nou dezir i pa senpleman pour servi Labib me pour fer li dan en fason ki pou pli benefisye sa enn ki ekout nou. Nou anvi ki sa dimoun i ekout avek en lespri ouver. Depandan lo latitid sa dimoun, ou kapab entrodwir bann panse Biblik an dizan: “Eski ou pa dakor ki sa ki pli enportan se sa ki Bondye i dir?” Oubyen ou kapab dir: “Eski ou konnen ki Labib i diskit sa menm kestyon?” Si ou pe koz avek en dimoun ki napa respe pour Labib, ou kapab vwar li itil pour servi lezot kalite lentrodiksyon. Ou kapab dir: “Les mwan partaz sa ansyen profesi avek ou.” Oubyen ou kapab dir: “Sa liv ki’n ganny distribye plis dan listwar imen i dir . . . ”

Dan serten lokazyon, ou kapab senpleman sit sa verse dan ou prop mo. Sepandan, kot i posib, i pli bon pour ouver Labib li menm e lir sa ki i dir. Montre sa dimoun sa verse dan son prop Labib sak fwa ki sa i pratik. Servi Labib dan en fason direk koumsa i souvan annan en lefe pwisan lo dimoun.—Ebr. 4:12.

Bann ansyen i annan en responsabilite spesyal pour servi Labib ler pe reponn bann kestyon. Enn bann kalifikasyon pour servi konman en ansyen i ki sa frer i “kapab ansenny lezot dapre sa vre doktrin.” (Tit 1:9) En manm kongregasyon i kapab fer en desizyon serye dan lavi apre ki en ansyen in donn li konsey. Alor, konman ki i enportan ki sa konsey i baze antyerman lo Labib! Legzanp sa ansyen pour servi Labib, i kapab enfliyans lezot dan zot fason ansennyen.