Prezant bann bon Largiman

LER ou dir en keksoz, sa bann ki ekout ou i annan tou drwa demande: “Akoz sa i vre? Konsernan sa ki ou pe dir, kwa ki prouve ki sa keksoz i devret ganny aksepte?” Konman en ansennyan ou annan sa lobligasyon, pour swa reponn bann tel kestyon oubyen ed sa bann ki ekout ou trouv larepons. Si sa deklarasyon i enportan pour siport ou largiman, fer sir ki sa bann ki ekout ou i ganny bann rezon konvenkan pour aksepte li. Ler ou fer sa ou lodyans pou ganny persyade par ou prezantasyon.

Zapot Pol ti persyad lezot. Par servi bon largiman, rezonnman lozik, i ti esey motiv zot avek tou son leker, i ti esey sanz fason panse sa bann dimoun ki i ti koz avek. I’n kit en bon legzanp pour nou. (Akt 18:4; 19:8) Byensir, serten orater i persyad dimoun zis pour tronp zot. (Mat. 27:20; Akt 14:19; Kol. 2:4) Zot kapab konmans avek en lide ki pa vre, servi bann sours lenformasyon ki fer preferans, servi bann largiman ki vid, inyor bann fe ki pa an akor avek zot pwenn-vi, oubyen eksit lemosyon olye ki fer dimoun rezonnen. Nou devret fer atansyon pour evit servi tou sa bann kalite metod.

Baz antyerman lo Parol Bondye. Sa ki nou ansennyen i pa devret nou prop pwenn-vi. Nou esey partaz avek lezot sa ki nou’n aprann dan Labib. Dan sa travay konman bann ansennyan, bann piblikasyon lesklav fidel e pridan in ed nou bokou. Sa bann piblikasyon i ankouraz nou pour egzamin Lekritir avek latansyon. An rezilta, nou diriz lezot ver Labib, non pa avek bi pour prouve ki nou byen, me avek dezir senser pour les zot vwar pour zot menm sa ki Labib i dir. Nou dakor avek sa ki Zezi Kri ti dir dan lapriyer avek son Papa: “Ou parol i laverite.” (Zan 17:17) Napa pli gran lotorite ki Zeova Bondye, Kreater lesyel ek later. Pour ki nou largiman i lozik e ki fer sans nou bezwen baz nou largiman lo son Parol.

Parler ou kapab koz avek dimoun ki pa familye avek Labib oubyen ki pa rekonnet Labib konman Parol Bondye. Ou devret servi disernman konsernan kan e konman ou entrodwir bann verse Labib dan sa konversasyon. Me osito posib ou devret esey diriz zot latansyon lo sa sours lenformasyon ki annan lotorite.

Eski ou devret mazinen ki senpleman sit en verse ki relye avek sa ki ou pe diskite i fourni en rezon ki fer ou largiman enposib pour ganny kestyonnen? Pa neseserman. Petet ou bezwen diriz latansyon sa dimoun lo bann verse ki vin avan e apre pour montre ki sa verse i vreman siport sa ki ou pe dir. Si ou pe senpleman fer resorti en prensip dan en verse e bann verse ki vin avan e apre pa pe diskit sa topik, petet la lezot levidans i neseser. Petet ou bezwen servi lezot verse ki relye avek sa topik pour kapab satisfer ou lodyans ki sa ki ou pe dir i vreman baze antyerman lo Lekritir.

Evit egzazer sa ki en verse i prouve. Lir li avek latansyon. Sa verse i kapab annan pour fer avek sa topik an zeneral ki ou pe diskite. Toudmenm, pour ou largiman kapab persyade, sa ki ekout ou i devret kapab vwar laprev ou largiman.

Siporte par bann Levidans siplemanter. Dan serten ka, i kapab itil pour servi lezot levidans an deor Labib dan en sours ki annan en bon repitasyon pour dir laverite pour ed dimoun konpran ki sa ki Labib i dir i fer sans.

Par egzanp, ou kapab servi liniver vizib konman en laprev ki i annan en Kreater. Ou kapab atir latansyon lo bann lalwa lanatir, tel parey gravite, e rezonnen ki legzistans bann tel lalwa i sizere ki i annan kelken ki’n fer sa bann lalwa. Si i an armoni avek sa ki Labib i dir ou rezonnman pou korek. (Zob 38:31-33; Pson. 19:1; 104:24; Rom. 1:20) Bann tel levidans i bon parski i demontre ki sa ki Labib i dir i relye avek bann fe ki nou kapab obzerve.

Eski ou pe esey ed en dimoun rekonnet ki Labib i vreman Parol Bondye? Ou kapab sit bann spesyalis Labib ki dir ki i leka, me eski sa i vreman en levidans? Bann tel sitasyon i senpleman itil pour en dimoun ki rekonnet sa bann spesyalis Labib. Eski ou kapab servi lasyans pour prouve ki Labib i vre? Si ou servi lopinyon bann syantis enparfe konman ou lotorite, ou pe konstri lo en fondasyon ki pa stab. Parkont, si ou konmans avek Parol Bondye e apre endik bann levidans lasyans ki fer resorti ki Labib i egzakt, ou pou etablir ou bann largiman lo en fondasyon solid.

Nenport keksoz ki ou pe esey prouve, prezant sifizaman levidans. I pou depan lo ou lodyans pour ou konnen ki kantite levidans ki neseser. Par egzanp, si ou pe diskit lo bann dernyen zour ki ganny dekrir dan 2 Timote 3:1-5, ou kapab atir latansyon ou lodyans lo en nouvel byen koni ki endike ki bann zonm “pou annan leker dir.” Zis sa legzanp i kapab sifi pour prouve ki sa laspe dan siny bann dernyen zour i aprezan pe ganny akonpli.

En konparezon ant de keksoz ki annan bann eleman enportan an komen i souvan-d-fwa kapab itil. Sa konparezon dan li menm i pa prouv en keksoz; son validite i bezwen ganny teste avek sa ki Labib li menm i dir. Me sa konparezon i kapab ed en dimoun pour vwar ki sa lide i fer sans. En tel konparezon i kapab ganny servi, par egzanp, ler ou pe eksplike ki Rwayonm Bondye i en gouvernman. Ou kapab fer resorti ki parey bann gouvernman imen, Rwayonm Bondye i annan bann dirizan, size, lalwa, en sistenm legal ek en sistenm ledikasyon.

Bann leksperyans i kapab souvan ganny servi pour demontre lasazes pour aplik bann konsey Labib. Bann leksperyans personnel i osi kapab ganny servi pour siport bann deklarasyon ki ganny fer. Par egzanp, ler ou fer resorti avek en dimoun sa lenportans pour lir e etidye Labib, ou kapab eksplike konman ki ou prop lavi in amelyore ler ou menm ou’n fer sa. Pour ankouraz son bann frer ek ser, zapot Pyer ti refer avek transfigirasyon, ki li menm i ti en temwen. (2 Pyer 1:16-18) Pol osi ti sit son prop leksperyans. (2 Kor. 1:8-10; 12:7-9) Byensir, ou devret mansyonn ou leksperyans personnel avek moderasyon afen ki ou pa atir latansyon ki pa neseser lo ou menm.

Vi ki lorizin e fason panse dimoun i diferan, levidans ki konvenk en dimoun i kapab pa satisfer en lot. Alor, konsider pwenn-vi sa bann ki ekout ou ler ou pe deside ki largiman ki ou pou servi e konman ou pou prezant zot. Proverb 16:23 i dir: “Leker en saz i fer son labous demontre disernman, avek son lalev i azout lafors pour persyade.”