Zefor pour tous Leker

APARD ki zis rann en temwannyaz avek dimoun, ou bezwen fer en zefor pour tous zot leker. Dan Labib, leker i souvan ganny opoze avek sa ki en dimoun i paret an deor. Sa leker senbolik i reprezant sa ki en dimoun i ete anndan—konman i santi, tou sa ki i pans lo la, akoz i mazin lo la, e konman sa bann panse i enfliyans son bann aksyon. Se dan sa leker senbolik ki lagrenn laverite i ganny senmen. (Mat. 13:19) E se apartir leker ki lobeisans anver Bondye i devret ganny devlope.—Prov. 3:1; Rom. 6:17.

Alor pour ki ou lansennyman i kapab penetre ziska leker, konsantre lo sa bann lobzektif swivan: (1) Konnen kwa ki’n deza enfliyans leker sa enn ki ekout ou. (2) Ranforsi bann kalite pozitif, tel parey lanmour, ek lakrent pour Bondye. (3) Ankouraz sa ki ekout ou pour analiz son bann motivasyon afen ki i kapab plennman fer plezir Zeova.

Servi disernman. Rezon akoz dimoun pa ankor aksepte laverite i varye. Ler ou pe kondwir en letid Labib kot lakour, petet ou bezwen retir prezidis e fourni bann fe pour elimin bann move lide ki sa etidyan i annan, oubyen ou kapab senpleman fourni bann laprev. Demann ou lekor: ‘Eski sa dimoun i konnen ki en imen i annan bann bezwen spirityel? Ki kantite ki i deza krwar? Kwa ki i pa krwar? Akoz i’n arive fer sa bann konklizyon? Eski i bezwen led pour sirmont bann dezir ki ti a kapab anpes li aksepte bann responsabilite ki vin avek konn laverite?’

I pa toultan fasil pour konnen akoz dimoun i krwar serten keksoz. “Konsey dan leker en zonm i parey delo profon,” Proverb 20:5 i dir, “me sa zonm avek disernman i sa enn ki pou retir li.” Disernman i sa abilite pour konpran sa ki pa neseserman evidan. Sa i demann obzervasyon profon e en lentere dan lezot.

Kominikasyon pa zis ganny fer par labous. En serten topik i kapab prodwir en sanzman lo figir oubyen dan ton lavwa en etidyan. Si ou en paran, san dout ou realize ki en sanzman dan konportman ou zanfan i kapab endike ki i pe reakte avek en nouvo lenfliyans dan lavi. Pa inyor sa bann siny. Zot bann pti keksoz ki endike ki sa dimoun i annan dan son leker.

Bann kestyon byen swazir i kapab ed ou pour retir sa ki dan leker en dimoun. Ou kapab demande: “Konman ou santi konsernan . . . ?” “Kwa ki konvenk ou ki . . . ?” “Konman ou pou reazir si . . . ?” Toudmenm, fer atansyon ki ou pa bonbard sa dimoun avek kestyon enn dernyen lot. Avan ou konmans demann kestyon ou kapab avek konsiderasyon demande, “Eski ou dakor si mon demann . . . ?” I pa en latas fasil pour arive konnen kwa ki dan leker en dimoun e i pran letan pour fer sa. Dan laplipar ka, en dimoun pou pran bokou letan avan ki i met son konfyans dan en lot dimoun e avan ki i pare pour revel son bann santiman profon. Menm la, ou bezwen fer atansyon pour ki sa dimoun pa santi ki i pe ganny kestyonnen lo keksoz ki pa ou zafer.—1 Pyer 4:15.

Ou bezwen osi demontre disernman konsernan fason ki ou reazir anver sa ki ou tande. Mazinen ki ou lobzektif se pour konpran dimoun pour ki ou kapab determinen ki lenformasyon baze lo Labib ki pour tre probab motiv zot. Ou bezwen pare pour kontrol okenn lanvi pour toudswit demontre ki zot pwenn-vi i fo. Plito port latansyon pour konpran bann santiman par deryer bann parol. Apre ou pou konnen konman pour reponn; e ou etidyan, apre ki i’n santi ki ou konpran li, pou mazin seryezman lo sa ki ou dir.—Prov. 16:23.

Lo en serten nivo, ou kapab motiv bann endividi menm ler ou pe adres en gran group. Si ou annan bon kontak avek lodyans, ou get byen bann lekspresyon lo zot figir, e ou demann bann kestyon ki fer reflesir, i plis ki sir ki ou pou ganny en lide lo konman sa bann ki pe ekout ou i santi konsernan sa ki ou pe dir. Si ou konn byen sirkonstans ou lodyans, alor montre konsiderasyon anver zot. Pran an konsiderasyon latitid zeneral kongregasyon anmezir ki ou rezonn avek zot apartir Parol Bondye.—Gal. 6:18.

Stimil bann Santiman pozitif. Apre ki ou’n konpran enpe sa ki en dimoun i krwar, sa ki i pa krwar, e akoz i leka, ou pou kapab servi sa bann lenformasyon konman en baz pour sa ki ou dir. Apre son rezireksyon, Zezi ti tous leker son bann disip par plennman ‘eksplik zot Lekritir’ an rapor avek bann levennman ki ti’n arive resanman. (Lik 24:32) Ou osi ou devret esey fer konneksyon ant sa ki en dimoun in eksperyanse, sa ki i dezire, avek sa ki i pe vwar dan Parol Bondye. Leker en etidyan pou ganny touse dan en bon fason ler i klerman realize ki: “Sa i LAVERITE!”

Ler ou met lanfaz lo labonte Zeova, son lanmour, son faver ki nou pa merite, ek son bann prensip drwat, ou ed sa bann ki ou ansennyen pour batir zot lanmour pour Bondye. Ler ou pran letan pour montre sa bann ki ekout ou bann bon kalite ki Bondye i vwar dan zot personnelman, ou donn zot rezon pour krwar ki en relasyon personnel avek li i posib. Sa i kapab ganny akonpli par konsider bann verse parey Psonm 139:1-3, Lik 21:1-4, ek Zan 6:44 e par ed zot pour apresye latasman ranpli avek lanmour ki Zeova i annan pour son bann serviter fidel. (Rom. 8:38, 39) Eksplike ki Zeova pa zis vwar nou bann fot me i vwar nou lavi antye, nou zel pour vre ladorasyon, nou lanmour pour son non. (2 Kron. 19:2, 3; Ebr. 6:10) I menm rapel bann pli pti detay lo nou personnalite, dan en fason remarkab, i pou redonn lavi “tou bann ki dan latonm souvenir.” (Zan 5:28, 29, NW; Lik 12:6, 7) Vi ki imen in ganny kree dan limaz ek resanblans Bondye, en diskisyon lo bann kalite Bondye pou souvan fer sa dimoun reazir avek en kondisyon leker favorab.—Zen. 1:27.

Leker i osi kapab ganny touse dan en fason pozitif ler en dimoun i aprann get lezot dimoun parey Zeova i vwar. I lozik ki si nou Bondye i montre en bon konsiderasyon pour nou personnelman, alor i osi montre sa menm konsiderasyon pour lezot, san pran kont zot lorizin, nasyonalite, oubyen ras. (Akt 10:34, 35) Enn fwa ki en dimoun in kapab konpran sa byen, i pou annan en rezon Biblik solid pour li elimin laenn ek prezidis dan son leker. Sa pou ed li viv dan lape avek lezot anmezir ki i aprann konman pour akonpli lavolonte Bondye.

Lakrent pour Bondye i en lot santiman ki ou devret ed lezot pour kiltive. (Pson. 111:10; Rev. 14:6, 7) En tel profon respe, oubyen lakrent pour Bondye, i kapab motiv en dimoun pour akonpli sa ki kapab enposib pour fer lo son prop lafors. Par diskit bann aksyon Zeova ki enspir lakrent ek son labonte leker ekstraordiner, ou kapab ed lezot pour devlop en bon lafreyer pour pa depler li.—Pson. 66:5; Zer. 32:40.

Fer sir ki sa bann ki ekout ou i konpran ki zot kondwit i enportan pour Zeova. Zeova i annan santiman, e par lafason ki nou reazir anver son gidans, nou fer li swa tris oubyen zwaye. (Pson. 78:40-42) Montre dimoun akoz zot kondwit i kapab fer en diferans pour reponn defi Satan kont Bondye.—Prov. 27:11.

Ed ou lodyans vwar ki fer sa ki Bondye i demande i benefisye zot. (Iza. 48:17) En fason ki sa i kapab ganny fer se par fer resorti bann konsekans emosyonnel e fizik ki kapab arive kan en dimoun i rezet lasazes Bondye, menm si pour en pti moman. Eksplike konman pese i elwanny nou avek Bondye, priv lezot sa loportinite pour aprann laverite avek nou, e anplis, mepriz zot drwa. (1 Tesa. 4:6) Ed ou lodyans pour seri bann benediksyon ki zot deza pe rezwir konman en rezilta zot lobeisans anver bann lalwa Bondye. Ranforsi zot lapresyasyon pour lefe ki mars dan semen drwat Zeova i sov nou kont bokou maler. Enn fwa ki en dimoun i annan lafwa dan lasazes ki trouve dan bann prensip Bondye, i pou rezet okenn latitid ki opoze avek sa. (Pson. 119:104) I pou vwar lobeisans konman en fason pour eksprim devosyon ranpli avek lanmour pour Zeova konman en dimoun, e non pa konman en fardo.

Ed lezot pour fer en Egzaminasyon. Pour kapab kontinyen grandir spirityelman, dimoun i bezwen sansib konsernan sa ki dan zot leker. Eksplike konman Labib i kapab ed zot pour fer sa.

Ed sa bann ki ekout ou pour realize ki Labib i pa zis en rikord bann komannman, konsey, levennman istorik, ek profesi. I osi revel fason panse Bondye. Dan Zak 1:22-25, Parol Bondye i ganny konpare avek en laglas. Par nou reaksyon anver sa ki i dir e anver lafason ki Zeova i akonpli son plan, mesaz Labib i revel kondisyon nou leker. Alor i revele konman Bondye, “sa enn ki egzamin leker,” i vwar nou. (Prov. 17:3) Ankouraz sa bann ki ekout ou pour kit sa antet. Ankouraz zot pour reflesir lo sa ki Bondye in prezerve pour nou dan Labib e ki bann sanzman zot bezwen fer dan zot lavi afen pour fer li plis plezir. Ed zot pour vwar lektir Labib konman en mwayen pour konpran lafason ki Zeova i evalye “tou dezir ek sekre leker imen” alor ki zot ava kapab korpere avek Bondye pour fer okenn sanzman neseser.—Ebr. 4:12; Rom. 15:4.

Petet serten etidyan Labib i anvi met an pratik sa ki zot pe aprann; me zot enkyet ki lezot dimoun pou mazinen. Zot kapab pe lite avek serten dezir laser ki for. Oubyen petet zot pe sey zistifye zot lekor pour servi Bondye dan en serten fason anmenmtan ki zot reste atase avek serten latitid lemonn. Fer resorti bann danze ler nou pa rezoli dan nou ladorasyon pour Zeova. (1 Rwa. 18:21) Ankouraz zot pour priy Bondye pour egzamin e pirifye zot leker.—Pson. 26:2; 139:23, 24.

Montre zot ki Zeova i konpran zot lalit e ki Labib i eksplik sa ki pe arive. (Rom. 7:22, 23) Ed zot pour fer atansyon pour ki zot pa les tandans zot leker enparfe domin zot.—Prov. 3:5, 6; 28:26; Zer. 17:9, 10.

Ankouraz sak dimoun pour analiz son motivasyon pour fer keksoz. Ansenny li pour demann son lekor: ‘Akoz mon anvi fer sa? Eski i montre Zeova ki mon vreman apresye tou sa ki i’n fer pour mwan?’ Esey tou ou posib pour fortifye sa konviksyon ki en relasyon aprouve avek Zeova i sa keksoz ki annan plis valer ki okenn lezot keksoz ki en dimoun i kapab posede.

Ed ou lodyans pour konpran sa lenportans pour servi Zeova avek ‘tou zot leker.’ (Lik 10:27) Sa i vedir ki tou zot santiman, dezir, ek motivasyon i devret an armoni avek bann prensip Zeova. Alor ansenny zot pour pa zis analiz sa ki zot fer me osi konman zot santi konsernan bann legzizans Bondye e kwa ki motiv zot pour servi li. (Pson. 37:4) Anmezir ki ou bann etidyan i konpran bann laspe kot zot bezwen amelyore, ankouraz zot pour priy Zeova: “Inifye mon leker pour annan lakrent pour ou non.”—Pson. 86:11.

Ler en etidyan i devlop en relasyon personnel avek Zeova, i pou obeir Bondye pour rezon lafwa e non pa senpleman akoz ou pe konsey li pour fer sa. I pou apre, lo li menm, “kontinyen verifye sa ki agreab pour Senyer.” (Efe. 5:10, NW; Fili. 2:12) En tel lobeisans i fer plezir Zeova.—Prov. 23:15.

Gard antet ki Zeova i sa enn ki evalye leker e atir dimoun pour annan en relasyon avek li. (Prov. 21:2; Zan 6:44) Nou rol se pour korpere avek li. (1 Kor. 3:9) I konmsi atraver nou, Bondye pe “sipliy zot.” (2 Kor. 5:20; Akt 16:14) Zeova i pa fors personn pour aksepte laverite, me ler nou servi Labib, i kapab fer sa bann ki ekout nou realize ki sa ki zot pe tande i larepons pour zot kestyon—oubyen pour zot lapriyer. Kit sa antet sak fwa ki ou ganny loportinite pour ansenny lezot.—1 Kron. 29:18, 19; Efe. 1:16-18.