Lafason pour tous leker bann dimoun ki nou ansennyen
1. Ki lefe lansennyman Zezi ti annan lo leker bann ki ti ekout li?
1 Zezi Kri ti tous leker bann dimoun ki ti ekout li. Omwen en fwa, apre ki i ti’n klerman eksplik son bann disip Lekritir, i ti konmsi ti annan en dife ki ti pe “brile” anndan zot. (Lik 24:32) Vi ki lobeisans anver Bondye i sorti dan leker, ki mannyer nou kapab motiv bann dimoun ki nou ansennyen pour kapab ed zot fer bann sanzman dan zot lavi?—Rom. 6:17.
2. Ki mannyer ler nou servi bon zizman ek disernman sa i kapab tous leker en dimoun?
2 Servi bon zizman ek disernman: Si ou senpleman dir dimoun kwa ki byen ouswa kwa ki mal, sa pa pou tous zot leker. Anfet, letan ou atak zot krwayans e bonbard zot avek en ta verse Labib, sa i kapab fer zot pa anvi ekoute. Pour motiv en dimoun, nou bezwen premyerman konnen akoz i krwar e azir dan en serten fason. Si nou servi bann kestyon avek bon zizman, sa pou ankouraz li pour eksprim son bann panse pli profon. (Prov. 20:5) I selman apre sa ki nou kapab swazir bann lenformasyon sorti dan Parol Bondye ki kapab tous son leker. Alor, nou bezwen annan pasyans e demontre lentere personnel dan sa dimoun. (Prov. 25:15) Rapel ki sak dimoun i fer progre spirityel dapre son abilite. Nou bezwen donn letan sa dimoun pour ki lespri sen Zeova i enfliyans son fason panse ek aksyon.—Mark 4:26-29.
3. Ki mannyer nou kapab ed bann etidyan Labib devlop bann bon kalite?
3 Ed zot devlop bann bon kalite: Bann verse ki koz lo labonte ek lanmour Zeova i kapab ed bann etidyan Labib devlop bann bon kalite. Nou kapab servi bann verse parey Psonm 139:1-4 oubyen Lik 12:6, 7 pour montre ki kantite Zeova i enterese avek zot endividyelman. Kan en dimoun i devlop lapresyasyon pour labonte ekstraordiner Zeova, son lanmour ek devosyon pour Bondye pou ogmante. (Rom. 5:6-8; 1 Zan 4:19) Ler zot osi aprann ki zot kondwit i annan en lefe lo Zeova, sa i kapab motiv zot pour azir dan en fason ki anmenn loner lo li.—Ps. 78:40, 41; Prov. 23:15.
4. Ler nou pe ansenny bann dimoun dan predikasyon ki mannyer nou kapab demontre respe pour swa sa dimoun?
4 Zeova pa fors personn pour obei son bann komannman. Par kont, i ankouraz tou dimoun par montre zot ki i saz pour swiv son bann konsey. (Iza. 48:17, 18) Nou imit Zeova ler nou ansenny bann dimoun dan en fason ki zot kapab tir zot prop konklizyon. Kan dimoun par zot menm i konvenki ki zot bezwen fer sanzman dan zot lavi, rezilta i dirab. (Rom. 12:2) I osi fer zot vin pli pros avek Zeova “sa enn ki egzamin leker.”—Prov. 17:3.