Ki mannyer mon kapab aprann konsantre?

• Akoz mon pa kapab konsantre?

• Ki mannyer mon kapab amelyore dan mon konsantrasyon?

• Ki lezot zenn i dir?

Akoz mon pa kapab konsantre?

“Mon pa kapab lir bann liv parey mon ti abitye. Mon nepli menm kontan lir bann gran paragraf.”​—Elaine.

“Mon pou fer en video al pli devan si mon war i annan bann bout ki pa neseser.”​—Miranda.

“Ler mon pe konsantre lo en keksoz e en mesaz i antre lo mon telefonn, mon pa kapab aret mazinen lekel ki pe anvoy mwan mesaz.”​—Jane.

Eski teknolozi i kapab anpes nou konsantre? Serten dimoun i dir wi. En ekriven e konsiltan pour bann direkter, Nicolas Carr i dir: “Pli nou servi Enternet, pli nou pe kondisyonn nou lespri pour ganny distrer, setadir nou konpran lenformasyon vitman e dan en fason efikas, me avek en pti gin konsantrasyon.”a

Annou vwar trwa sityasyon kot teknolozi i annan en lefe lo ou konsantrasyon.

• Dan en konversasyon. En fiy ki apel Maria i dir sa: “Menm ler i annan dimoun la pe koze, serten pe anvoy mesaz oubyen pe zwe lo telefonn oubyen pe tyek bann mesaz lo medya sosyal. Zot pa pe donn sa dimoun ki zot pe koz avek tou zot latansyon.”

• Letan ou dan laklas. Liv Digital Kids i dir: “Mazorite etidyan i dir zot servi zot lekipman elektronik pandan laklas pour anvoy mesaz, fouraye lo Enternet oubyen pas letan lo medya sosyal.” I azoute ki zot pe servi zot bann lekipman elektronik “pour bann aktivite ki napa nanryen pour fer avek zot ledikasyon.”

• Ler ou etidye. Chris aze 22 an i dir: “Mon pli gran defi se pour pa get mon telefonn sak fwa i sonnen. Si ou en etidyan lekol, enn erdtan devwar lakour i kapab vin trwa erdtan si ou telefonn pe dekonsantre ou.”

A la fen di zour: Ou pou vwar li difisil pour konsantre si ou les teknolozi distrer oubyen kontrol ou.

Ki mannyer mon kapab amelyore dan mon konsantrasyon?

• Dan en konversasyon. Labib i dir: “Pa rod zis zot prop lentere, me lentere lezot osi.” (Filipyen 2:4) Montre ki ou enterese dan lezot par ekout zot atantivman. Get zot ler zot koze e pa les ou telefonn distrer ou.

  “Ler ou dan en konversasyon, reziste sa lanvi pour get ou telefonn. Montre respe pour sa dimoun ki ou pe koz avek par donn li tou ou latansyon.”​—Thomas.

  SIZEZYON: Ler ou pe konverse avek en dimoun ou kapab met ou telefonn en landrwa kot i pa pou dan ou lizye. Resers i montre ki en dimoun i kapab ganny distrer senpleman si son telefonn i avek li, akoz nenport ler i kapab ganny enteronpe.

• Ler ou dan laklas. Labib i dir: “Vey byen ki mannyer zot ekoute.” (Lik 8:18) Avek sa prensip antet, si ou lekol i permet ki ou servi Enternet dan laklas, pa bezwen tyek ou bann mesaz, zwe oubyen koz avek lezot lo Enternet ler ou sipoze pe konsantre lo ou laprantisaz.

  “Esey port plis latansyon dan laklas. Pran not. Si posib, asiz en pe devan dan laklas pour ou pa tro ganny distrer.”​—Karen.

  SIZESYON: Pran not lo papye dan plas lo en lekipman elektronik. Resers i montre ki ou pa pou ganny distrer otan e ou pou rapel pli byen sa ki ou’n aprann.

  

• Ler ou pe etidye. Labib i dir: “Rod lasazes, rod disernman.” (Proverb 4:5) Sa i enkli reflesir o profon, pa zis lir en lenformasyon an pasan avek bi pour pas en tes.

  “Ler mon pe etidye, mon met mon tablet lo “airplane” zis pour mwan kapab konsantre lo sa ki mon pe fer. Mon pa get bann notifikasyon. Si mon mazinen i annan en keksoz ki mon bezwen fer, mon fer en not.”​—Chris.

  SIZESYON: Fer sir landrwa ki ou swazir pour etidye i permet ou pour konsantre. Gard li prop e annord.