Ki Labib i dir lo de dimoun ki viv ansanm san marye?

Sa ki Labib i dir

Labib i dir ki lavolonte Bondye i ki dimoun i “rezet imoralite seksyel.” (1 Tesalonisyen 4:3) Dan Labib, sa term “imoralite seksyel” i enkli adilter, omoseksyalite e sèks ant en zonm ek en madanm ki pa’n marye.

• Eski i enportan pour Bondye si en koup i marye oubyen non?

• Eski de dimoun i kapab viv ansanm pour gete si pli tar zot maryaz pou reisi?

• Ki mannyer bann koup i kapab fer zot maryaz vin solid?

Eski i enportan pour Bondye si en koup i marye oubyen non?

• Maryaz i sorti kot Bondye. Bondye ti fer sa laranzman ler i ti ini sa premye koup imen ansanm. (Zenez 2:22-24) I pa ti dan plan Bondye pour en zonm ek en madanm viv ansanm san ki zot marye.

• Bondye i konnen kwa ki bon pour bann imen. Bondye in fer ki sa laranzman maryaz ant en zonm ek en madanm i dire pour lavi. Sa laranzman ti pou benefisye e protez tou dimoun dan fanmir. Annou pran en senp legzanp. Normalman, en meb i vin avek bann lenstriksyon lo ki mannyer pour asanble li pareyman, Bondye i donn nou bann lenstriksyon lo ki mannyer nou lavi fanmir i kapab ere. Bann standar Bondye i toultan benefisye sa bann ki swiv zot.​—Izai 48:17, 18.

  

• Sèks an deor maryaz i kapab anmenn move konsekans. Par egzanp, en dimoun i kapab tonm ansent kan i pa ti oule, ganny maladi ki transmet par sèks ek bann problenm emosyonnel.

• Bondye in donn bann zonm ek madanm sa abilite pour fer zanfan atraver relasyon seksyel. Bondye i konsider lavi konman sakre e sa abilite pour fer zanfan i en kado presye. Bondye i oule ki nou respekte sa kado par onor maryaz.​—Ebre 13:4.

Eski de dimoun i kapab viv ansanm pour gete si pli tar zot maryaz pou reisi?

Pour en maryaz reisi, i pa neseser pour de dimoun viv ansanm pour en pe letan. Plito, zot relasyon pou vin pli solid si tou le de konzwen i pare pour reste fidel avek kanmarad e travay ansanm pour rezourd problenm.a Alor, maryaz pou ranforsi sa langazman.​—Matye 19:6.

Ki mannyer bann koup i kapab fer zot maryaz vin solid?

Napa okenn maryaz ki parfe. Kantmenm sa, bann koup i kapab reisi dan zot maryaz par aplik bann konsey Labib. La detrwa legzanp:

• Met bezwen ou konzwen avan sa ki pour ou.​—1 Korentyen 7:3-5; Filipyen 2:3, 4.

• Devlop lanmour ek respe pour kanmarad.​—Efezyen 5:25, 33.

• Aprann kontrol sa ki ou dir.​—Proverb 12:18.

• Demontre pasyans e pa tarde pour pardonnen.​—Kolosyen 3:13, 14.