“Nou devret obei Bondye”

1-3. (a) Akoz bann zapot ti ganny anmennen devan Sannedren e ki desizyon zot ti bezwen fer? (b) Akoz nou vreman enterese avek lafason ki bann zapot ti defann zot lekor?

BANN ziz dan Sannedren i vin pli ankoler! Bann zapot Zezi pe ganny zize devan lakour siprenm. Akoz zot pe ganny zize? Granpret Zozef Kaif ki ti osi sef Sannedren i dir zot seryezman: “Pa nou’n donn zot lord pour aret ansenny lo sa non!” Kaif i sitan ankoler ki i pa ni menm kapab dir non Zezi. I osi dir zot: “Pourtan zot in ranpli Zerizalenm avek zot lansennyman e zot determinen pour blanm nou pour lanmor sa zonm.” (Akt 5:28) Zot oule ki bann zapot i aret prese si non zot pou ganny pini!

² Ki bann zapot pou fer? Zezi ki ti’n dir zot prese e Bondye ki ti’n donn Zezi sa lotorite. (Mat. 28:18-20) Eski bann zapot pou per zonm e reste trankil? Oubyen eski zot pou annan kouraz e kontinyen prese? An realite, zot ti pou bezwen deside si zot pou obei Bondye oubyen si zot pou obei zonm. Pyer pa ezite pour li koz pour tou bann zapot. I ti koz kler e fran.

³ Konman bann vre Kretyen, nou vreman enterese pour konnen ki bann zapot ti fer ler Sannedren ti esey fer zot per. Nou osi nou’n ganny sa lord pour prese. Ler nou pe fer sa travay ki Bondye in donn nou, nou osi nou kapab ganny persekite. (Mat. 10:22) Bann dimoun ki opoz nou i kapab demann nou pour aret prese. Ki nou pou fer? Nou kapab aprann en kantite avek lafason ki bann zapot ti defann zot lekor ek sa ki ti arive avan zot ti al devan Sannedren.a

“Lanz Zeova ti ouver baro” (Akt 5:12-21a)

4, 5. Akoz Kaif ek bann Sadiseen “ti vreman zalou”?

⁴ Rapel ki ler Pyer ek Zan ti ganny sa lord premye fwa pour zot aret prese, zot ti dir: “Nou pa kapab aret koz lo keksoz ki nou’n vwar e tande.” (Akt 4:20) Apre sa ki ti’n pase dan Sannedren, Pyer ek Zan ansanm avek lezot zapot ti kontinyen anons sa bon nouvel dan tanp. Bann zapot ti fer bann mirak, par egzanp geri bann dimoun ki ti malad e sas bann demon. Zot ti fer sa “kot bann kolonn Salomon,” en landrwa ki ti annan en twa, lo kote les tanp kot en kantite Zwif ti rasanble. Aparaman, menm lonbraz Pyer ti geri dimoun! En kantite dimoun ki ti’n ganny geri ti aksepte laverite ki sorti dan parol Bondye. Sa ti fer ki “deplizanpli en kantite zonm ek madanm ki ti krwar dan Senyer ti vin disip.”​—Akt 5:12-15.

⁵ Kaif ek bann Sadiseen ki ti dan menm group larelizyon avek li “ti vreman zalou” e zot ti met bann zapot dan prizon. (Akt 5:17, 18) Akoz bann Sadiseen ti vreman ankoler? Bann zapot ti pe ansennyen ki Zezi ti’n ganny resisite me bann Sadiseen pa ti krwar dan rezireksyon. Bann zapot ti pe dir ki bann dimoun i kapab ganny sove si zis zot annan lafwa dan Zezi. Me bann Sadiseen ti per pangar bann Romen i pini zot si bann dimoun i konsider Zezi konman zot Sef. (Zan 11:48) Sanmenm sa bann Sadiseen ti determinen pour fer bann zapot reste trankil!

6. Lekel sa bann dimoun ki pe persekit bann serviter Zeova plis ozordi e akoz nou pa devret sirprann?

⁶ Ozordi osi, bann dimoun ki pe persekit bann serviter Zeova plis, i bann group larelizyon. Souvan zot esey fer gouvernman ek medya fer nou aret prese. Eski nou devret sirprann? Non. Sa mesaz ki nou pe anonse i montre ki sa bann larelizyon i fo. Ler bann dimoun ki annan leker senser i aksepte bann laverite ki dan Labib, zot lib parski zot nepli krwar dan bann krwayans ek pratik ki pa dan Labib. (Zan 8:32) Alor i pa drol ki nou mesaz i fer bann sef relizye vreman zalou e ay nou!

7, 8. Ki mannyer sa lord ki sa lanz ti donnen ti ed bann zapot e ki kestyon nou devret demann nou lekor?

⁷ Ler zot ti dan prizon pe espere pour ganny zize, i kapab ki bann zapot ti pe mazinen si zot bann lennmi ti pe al touy zot. (Mat. 24:9) Me pandan lannwit, en keksoz ki zot pa ti pe ekspekte ti arive, “lanz Zeova ti ouver baro prizon.”b (Akt 5:19) Apre, sa lanz ti donn zot en lenstriksyon kler. I ti dir zot: “Al dan tanp” e “kontinyen [koze].” (Akt 5:20) Sa lord ti’n bezwen asir bann zapot ki sa ki zot ti pe fer ti byen. Sa ki sa lanz ti’n dir ti’n kapab ankouraz zot pour reste ferm malgre nenport kwa ki arive. Bann zapot ti annan kouraz ek en lafwa ki for e “ler lizour ti fer, zot ti al kot tanp e konmans ansenny dimoun.”​—Akt 5:21.

⁸ Nou tou nou devret demann nou lekor sa kestyon, ‘Si mon ti dan menm sityasyon avek sa bann zapot, eski mon ti pou annan lafwa ek kouraz pour kontinyen prese?’ I ankourazan pour konnen ki bann lanz pe ed nou e zot pe gid sa travay enportan pour “rann temwannyaz afon konsernan Rwayonm Bondye.”​—Akt 28:23; Rev. 14:6, 7.

“Nou devret obei Bondye plito ki zonm” (Akt 5:21b-33)

9-11. Ki bann zapot ti fer ler Sannedren ti demann zot pour aret prese e ki mannyer sa ti vin en bon legzanp pour bann vre Kretyen?

⁹ Kaif ek bann lezot ziz dan Sannedren ti pare pour ziz bann zapot. Alor, zot ti fer bann gard al sers bann zapot dan prizon, me zot pa ti konnen sa ki ti’n arive dan prizon. Esey mazinen ki mannyer bann gard ti sirprann ler zot pa ti vwar bann zapot dan prizon menm si “baro prizon [ti] byen fermen e bann gard prizonnyen ti pe debout kot baro.” (Akt 5:23) Pa bokou letan apre, sef gard tanp ti tande ki bann zapot ti’n retourn dan tanp e zot ti pe rann temwannyaz lo Zezi Kri, menm si zot ti’n fek ganny mete dan prizon akoz zot ti pe fer sa travay. Deswit sa sef ek son bann gard ti al kot tanp pour pran sa bann prizonnyen e anmenn zot dan Sannedren.

¹⁰ Parey nou’n vwar o konmansman sa sapit, bann sef relizye ki ti ankoler ti anvi ki bann zapot i aret prese. Ki bann zapot ti fer? Pyer ti koz pour tou bann zapot e i ti dir: “Nou devret obei Bondye plito ki zonm.” (Akt 5:29) Alor bann zapot ti kit en bon legzanp pour lezot vre Kretyen swiv pli tar. Nou pa obei bann lotorite ki mal servi sa lotorite ki Bondye in donn zot ler zot anpes nou fer sa ki Bondye i demann nou pour fer oubyen ler zot anvi nou fer bann keksoz ki Bondye pa kontan. Alor, si ozordi “bann lotorite” i demann nou pour aret prese, nou pa devret aret fer sa travay ki Bondye in donn nou pour pres sa bon nouvel. (Rom. 13:1) Plito, nou pou pridan e nou pou rod bann lezot fason pour kontinyen rann temwannyaz afon lo Rwayonm Bondye.

¹¹ I pa drol ki bann ziz ti vreman ankoler akoz lafason ki sa bann zapot ti reponn zot. Zot ti vreman anvi “touy” bann zapot. (Akt 5:33) I ti paret ki sa bann temwen ki ti kouraze e devoue ti pe al ganny touye. Me sa bann zapot ti pou ganny led dan en fason ki zot pa ti pe ekspekte.

“Zot pa pou kapab anpes zot” (Akt 5:34-42)

12, 13. (a) Ki konsey Gamalyel ti donn son bann koleg e ki zot ti fer? (b) Ki Zeova i kapab fer pour ed son pep ozordi e ki nou kapab asire si i les nou “soufer akoz ladrwatir”?

¹² Gamalyel ki ti “en ansenyan Lalwa byen respekte” ti koze.c I bezwen ki lezot ziz ti byen respekte li parski i pa ti ezite pour koz premye e i ti menm “donn lord pour met sa bann [zapot] deor pour en pti moman.” (Akt 5:34) Gamalyel ti koz lo diferan legzanp dan lepase kot i ti annan bann group larelizyon ki ti ganny formen me apre ler zot bann dirizan ti mor, sa bann dimoun ti aret zwenn ansanm. Alor Gamalyel ti ankouraz bann ziz pour annan pasyans e pa fer bokou problenm avek bann zapot vi ki zot Sef, Zezi ti’n fek mor. Sa ki Gamalyel ti dir ti konvenk zot. I ti dir zot: “Pa enterfer avek sa bann zonm, me les zot trankil. Parski si sa zafer ouswa sa travay i sorti kot zonm, i pa pou dire, me si i sorti kot Bondye, zot pa pou kapab anpes zot. Si non, zot kapab vwar zot pe lager avek Bondye li menm.” (Akt 5:38, 39) Bann ziz ti ekout son konsey. Me kantmenm sa, zot ti fwet bann zapot e donn zot lord “pour aret koz lo non Zezi.”​—Akt 5:40.

¹³ Ozordi osi, Zeova i kapab fer bann dimoun enportan parey Gamalyel ed Son pep. (Prov. 21:1) Zeova i kapab servi son lespri sen pour fer bann dirizan, bann ziz oubyen bann dimoun ki fer lalwa, fer keksoz dapre son lavolonte. (Nee. 2:4-8) Me i kapab arive ki i les nou “soufer akoz ladrwatir.” Si sa i arive, i annan de keksoz nou kapab asire. (1 Pyer 3:14) Premyerman, Bondye i kapab donn nou lafors pour andire. (1 Kor. 10:13) Dezyenmman, bann dimoun ki opoz nou “pa pou kapab anpes” travay Bondye.​—Iza. 54:17.

14, 15. (a) Ki bann zapot ti fer apre ki zot ti’n ganny fwete e akoz? (b) Donn en legzanp ki montre ki pep Zeova i andire avek lazwa.

¹⁴ Eski bann zapot ti dekouraze menm si zot ti ganny fwete? Non! Zot “ti kit Sannedren byen kontan.” (Akt 5:41) Akoz zot ti “byen kontan”? I pa akoz zot ti’n ganny fwete e zot ti dan douler. Zot ti kontan parski zot ti konnen ki zot ti pe ganny persekite akoz zot ti pe reste fidel avek Zeova e zot ti pe swiv legzanp Zezi.​—Mat. 5:11, 12.

¹⁵ Parey nou bann frer dan premye syek, nou devret andire avek lazwa ler nou soufer akoz sa bon nouvel. (1 Pyer 4:12-14) Sa pa vedir ki nou kontan ler nou ganny menase, persekite oubyen ler nou ganny met dan prizon. Me plito, nou kontan akoz nou’n reste fidel avek Zeova. Annou get sa ki ti arive avek Henryk Dornik. Pour plizyer lannen, i ti andir bann move keksoz ki gouvernman ti fer avek li. An Out 1944, bann lotorite ti anvoy li ek son frer dan en kan konsantrasyon. Bann dimoun ki ti opoz zot ti dir: “Ou pa kapab persyad zot pour fer nanryen. I en lazwa pour zot pas martir pour zot krwayans.” Frer Dornik ti dir: “Menm si mon pa ti anvi soufer akoz mon krwayans, i ti en lazwa pour annan sa kouraz ek dinyite pour soufer akoz mon ti fidel anver Zeova.”​—Zak 1:2-4.

16. Ki mannyer bann zapot ti montre ki zot ti determinen pour rann temwannyaz afon e ki mannyer nou pe pres parey zot ozordi?

¹⁶ Bann zapot pa ti tarde pour rekonmans zot travay predikasyon. San okenn lafreyer, “zour apre zour” zot ti kontinyen “anons sa bon nouvel konsernan Kris Zezi, dan tanp e kaz an kaz.”d (Akt 5:42) Sa bann proklanmater devoue ti determinen pour rann temwannyaz afon. Remarke ki zot ti al kot lakaz bann dimoun pour pres avek zot parey Zezi ti’n dir zot fer. (Mat. 10:7, 11-14) Koumsanmenm ki zot ti ranpli Zerizalenm avek zot lansennyman. Ozordi, bann Temwen Zeova i pres parey bann zapot ti fer. Ler nou pres kot tou lakaz dan nou teritwar, nou montre ki nou osi nou anvi rann temwannyaz afon e donn tou dimoun sa posibilite pour tann sa bon nouvel. Eski Zeova in beni nou travay predikasyon ki nou pe fer kaz an kaz? Wi! Plizyer milyon dimoun in aksepte sa mesaz Rwayonm dan sa letan lafen e en kantite zot in tann sa bon nouvel pour premye fwa ler en Temwen Zeova ti pas kot zot lakour.

Bann zonm kalifye pour ganny “responsabilite” (Akt 6:1-6)

17-19. Ki problenm ki ti arive ki ti kapab fer divizyon e ki mannyer bann zapot ti rezourd sa problenm?

¹⁷ I ti annan en problenm ki ti arive dan sa kongregasyon ki ti’n fek ganny formen e zot pa ti realize ki sa ti en danze. Ki problenm ki ti arive? En kantite disip ki ti pe batize ti bann dimoun ki ti’n vin vizit Zerizalenm e zot ti anvi aprann plis keksoz konsernan sa bon nouvel avan ki zot retourn kot zot. Bann disip ki ti pe reste Zerizalenm ti pare pour donn larzan pour aste manze ek lezot keksoz. (Akt 2:44-46; 4:34-37) Dan sa letan, i ti annan en problenm ki ti arive. Bann vev ki ti koz Grek “pa ti pe ganny zot porsyon manze sak zour.” (Akt 6:1) Par kont, bann vev ki ti koz Ebre ti pe ganny zot porsyon manze. I paret ki i ti annan diskriminasyon e sa ti kapab fer divizyon.

¹⁸ Bann zapot ki ti konsey direkter pour sa kongregasyon ki ti pe agrandi, ti realize ki i pa ti pou bon pour zot “aret ansenny parol Bondye pour [zot] servi manze.” (Akt 6:2) Pour rezourd sa problenm, zot ti demann bann disip pour rod set zonm “ki [ti] ranpli avek lespri sen ek lasazes” pour bann zapot donn zot sa “responsabilite.” (Akt 6:3) Sa bann zonm ti pou bezwen bann zonm kalifye akoz zot pa ti pou zis servi manze me zot ti pou osi bezwen anmas larzan, aste bann keksoz e gard byen bann rikord. Tou sa bann zonm ki ti ganny swazir ti annan bann non Grek e petet sa ti fer li pli fasil pour sa bann vev ki ti’n ganny ofanse aksepte zot led. Apre ki bann zapot ti’n fini priye konsernan sa set zonm ki ti’n ganny swazir, bann zapot ti donn zot sa “responsabilite.”e

¹⁹ Vi ki sa set zonm ti’n ganny sa responsabilite pour partaz manze, eski sa ti vedir ki zot pa ti pou bezwen pres sa bon nouvel? Non! Etyenn ti parmi sa set zonm ki ti’n ganny swazir e i ti annan kouraz ek pwisans pour anons sa bon nouvel. (Akt 6:8-10) Filip osi ti parmi sa set zonm ki ti’n ganny swazir e Labib i dir ki i ti en “predikater.” (Akt 21:8) Alor, i kler ki sa set zonm ti kontinyen anons sa bon nouvel lo Rwayonm avek devouman.

20. Ki mannyer pep Zeova ozordi i swiv legzanp bann zapot?

²⁰ Ozordi, pep Zeova i swiv legzanp bann zapot. Bann zonm ki ganny demande pour annan serten responsabilite dan kongregasyon i devret montre ki zot annan lasazes sorti kot Bondye. Zot devret montre ki zot pe les lespri sen ed zot fer bann desizyon dan zot lavi. Anba direksyon Konsey Direkter, bann zonm kalifye i ganny apwente pour vin bann ansyen oubyen bann serviter kongregasyon.f (1 Tim. 3:1-9, 12, 13) Alor, nou kapab dir ki sa bann zonm kalifye in ganny apwente par lespri sen. Sa bann zonm ki travay dir i fer en kantite keksoz enportan. Par egzanp, bann ansyen i kapab rod fason pour ed bann frer ek ser aze ki vreman bezwen led. (Zak 1:27) Serten ansyen i travay dan konstriksyon bann Lasal Rwayonm, zot organiz bann lasanble oubyen zot lo Komite lyezon lopital. Bann serviter kongregasyon i fer en kantite travay ki pa direkteman annan pour fer avek ankouraz oubyen ansenny bann frer ek ser. Sa bann zonm kalifye i bezwen veye ki zot pa pas tro bokou letan dan responsabilite kongregasyon ki zot napa letan pour fer sa travay ki Bondye in donn zot pour pres sa bon nouvel lo Rwayonm.​—1 Kor. 9:16.

“Parol Bondye ti kontinyen propaze” (Akt 6:7)

21, 22. Kwa ki montre ki Zeova ti beni sa kongregasyon ki ti’n fek ganny formen?

²¹ Vi ki Zeova ti ed sa kongregasyon ki ti’n fek ganny formen, zot ti kapab fer fas avek persekisyon ek en problenm dan kongregasyon ki ti kapab fer divizyon. Zeova ti beni zot akoz Labib i dir: “Parol Bondye ti kontinyen propaze e lakantite disip ti kontinyelman ogmante en kantite Zerizalenm e bokou pret ti konmans annan lafwa.” (Akt 6:7) Sa i zis enn parmi bann progre ki sa kongregasyon ti fer ki liv Akt i koz lo la. (Akt 9:31; 12:24; 16:5; 19:20; 28:31) Ozordi, nou kontan ler nou tande ki mannyer sa bon nouvel lo Rwayonm pe kontinyen ganny anonse dan lezot landrwa dan lemonn.

²² Bann sef relizye dan premye syek ki ti byen ankoler pa ti pou aret persekit bann disip. Bann disip ti pou ganny persekite plis ankor. Parey nou pou vwar sa dan sa lot, Etyenn pou ganny persekite en kantite.