“Aplatir sa semen ki ou pou mars lo la” pour fer progre

KAN pep Bondye ti kit Babilonn lannen 537 A.N.L, Zeova ti konsernen avek zot traze pour al Zerizalenm. I ti dir zot: “Prepar semen pour lepep. Aranze, aranz gran semen. Tir bann ros.” (Iza. 62:10) Zis mazinen ki mannyer serten Zwif ti’n kapab swiv sa lenstriksyon. Petet i ti annan serten ki ti par devan pe konstri semen, ranpli bann transe e aplatir bann landrwa kot ti ankor annan bann bos bos. Sertennman sa zefor ti pou fer traze sa bann frer ki ti pe retourn dan zot pei pli fasil.

Pareyman, i konmsi nou pe swiv en semen ler nou pe desarz diferan responsabilite dan servis Zeova. Zeova i anvi ki tou son bann serviter i mars lo sa semen avek mwens lobstak posib. Son Parol i ankouraz nou: “Aplatir sa semen ki ou pou mars lo la e tou keksoz i ava al byen pour ou.” (Prov. 4:26) Ki swa ou zenn oubyen non, ou kapab vwar ki sa konsey sorti kot Bondye i saz.

PREPAR SA SEMEN PAR FER BANN BON DESIZYON

Petet ou’n tann dimoun dir sa lo en adolesan: ‘I annan en ta loportinite devan li’ oubyen ‘I pou akonplir en ta keksoz.’ Bann zenn i souvan annan bon lasante, zot entelizan e zot vreman annan sa dezir pour reisi. Labib i dir: “Laglwar bann zennonm se zot lafors.” (Prov. 20:29) En zenn ki servi son talan ek lenerzi pour servi Zeova i kapab atenn bann lobzektif spirityel e konn vre boner.

Me parey ou konnen, abilite nou bann zenn i annan en gran valer dan sa lemonn. Kan en zenn Temwen i travay byen lekol, en counselor, ansenyan oubyen kanmarad lekol i kapab met presyon lo li pour fer bann letid avanse pour prepar li pour reisi dan sa lemonn. En zenn frer oubyen ser ki en bon atlet i kapab ganny swazir e atire pour fer en karyer dan sport. Eski ou’n vwar ou dan en tel sityasyon oubyen eski ou konn en dimoun ki pe fer fas avek sa kalite presyon? Kwa ki pou ed en Kretyen fer sa bon swa?

Bann lansennyman Labib i kapab ed en dimoun prepar li pour mars lo sa pli bon semen lavi. Eklezyast 12:1 i dir: “Alor, mazin ou Gran Kreater letan ou zenn.” Ki mannyer ou oubyen en zenn ki ou konnen i kapab pli byen ‘mazin zot Gran Kreater’?

Reflesir lo sa ki ti arive avek Erica dan Was Lafrik. I ti kontan zwe foutbol. Ler Eric ti annan 15 an i ti’n deza fini ganny swazir pour zwe dan en tim nasyonal. Sa ti vedir ki i ti pe ekspekte ki i ti pou ganny sa lantrennman o nivo Lerop, petet sa ti pou fer li ganny en karyer konman en profesyonnel. Me ki mannyer sa konsey pour “mazin ou Gran Kreater” ti pou aplikab dan son ka? Ki mannyer ou oubyen serten ou bann zanmi ki ankor zenn i kapab benefisye avek sa konsey?

Kan i ti ankor pe lekol Eric ti konmans etidye Labib avek bann Temwen Zeova. Alor i ti konmans aprann ki son Kreater ti pou rezourd bann problenm lo later pour touzour. Eric ti konpran lenportans pour servi son letan ek lenerzi pour fer lavolonte Bondye. Lefet ki i ti konpran sa realite, Eric pa ti swazir pour pourswiv en karyer profesyonnel dan sport. Plito, i ti batize e servi son letan ek lenerzi pour fer bann keksoz spirityel. Avek letan, i ti kalifye pour vin en asistan ministeryel e pli tar ankor i ti ganny envite pour al Lekol pour bann frer selibater.

Si Eric ti’n pourswiv en karyer dan sport, i kapab ki i ti pou’n vin ris e renonmen. Me i ti konpran sa laverite ki ganny trouve dan en prensip Labib: “Larises en dimoun ris i son lavil for, dan son limazinasyon i parey en miray proteksyon.” (Prov. 18:11) Wi, sa sekirite ki en dimoun i paret gannyen atraver larises i zis en rev. Deplis, sa bann ki pe tay deryer larises i souvandfwa “met zot lekor dan en kantite tourman.”​—1 Tim. 6:9, 10.

Erezman, bokou zenn in trouv lazwa e vre sekirite par fer servis a plen tan. Eric i dir: “Mon’n zwenn ansanm avek sa gran ‘tim,’ setadir bann serviter a plen tan Zeova. Sa i sa pli bon tim ki mon kapab form parti e mon remersye Zeova pour montre mwan sa sel fason pour ganny vre boner ek sikse dan lavi.”

Be ou menm? Olye pourswiv bann lobzektif dan sa lemonn, akoz ou pa etablir “ou semen” solidman devan Zeova par fer servis pionye?​—Vwar bwat “Bann benediksyon ki ou pa gannyen dan liniversite.”

TIR BANN LOBSTAK DAN OU SEMEN

Kan en koup ti pe vizit biro brans Leta-z-ini, zot ti santi lazwa ki bann Betelit ki ti pe servi Zeova laba ti annan. Pli tar, sa ser ti ekrir: “Nou ti’n vin tro konfortab dan nou lavi tou le zour.” Sa koup ti deside ki zot ti pou fer letan e byen servi zot lenerzi pour fer plis dan servis Zeova.

A serten moman, bann sanzman ki sa koup ti anvi fer ti paret tro bokou. Me en zour, zot ti medit lo teks pour lazournen. I ti Zan 8:31, kot nou lir parol Zezi ki dir: “Si zot obei byen sa ki mon ansenny zot, zot a vin vreman mon disip.” Avek sa antet, zot ti dir: “Nenport kwa ki nou fer pour senplifye nou lavi, i vo lapenn fer sa sakrifis.” Zot ti vann zot gran lakaz, senplifye zot lavi e al dan en kongregasyon ki ti bezwen led. Aprezan zot pe fer pionye, me zot osi ede konstri bann Lasal Rwayonm e port zot volonter dan bann lasanble distrik. Ki mannyer zot santi? “Nou sirprann lazwa ki nou’n gannyen par senplifye nou lavi e fer egzakteman sa ki lorganizasyon Zeova i ankouraz nou pour fer.”

KONTINYEN FER PROGRE SPIRITYEL

Salomon ti ekrir: “Ou lizye i devret get drwat devan, wi fikse ou regar drwat devan ou.” (Prov. 4:25) Parey en drayver ki pe konsantre lo son semen, nou devret evite les nou ganny distrer par bann keksoz ki kapab anpes nou annan bann lobzektif spirityel e atenn zot.

Ki bann lobzektif spirityel ou kapab annan e atenn? Fer servis a plen tan i sertennman en bon lobzektif. En lot lobzektif ou kapab annan se pour servi dan en kongregasyon pa tro lwen kot ou reste kot i annan en bezwen pour bann proklanmater eksperyanse pour ede kouver sa gran teritwar. Petet osi en kongregasyon i kapab annan en kantite proklanmater eksperyanse me napa ase ansyen ek asistan ministeryel. Eski ou ti pou kapab ede? Akoz ou pa koz avek ou sirveyan rezyonal pour vwar si ou kapab ede? Si ou enterese pour al ede dan en teritwar ki pli lwen, ou kapab rod lenformasyon lo sa bann kongregasyon ki bezwen sa kalite led.b

Annou revwar sa senn ki ti ganny dekrir dan Izai 62:10. Serten Zwif ti’n kapab travay dir pour aplatir e netway sa semen ler zot ti pe retourn dan zot pei afen ki pep Bondye ti kapab ariv ver zot destinasyon. Si ou pe fer tou zefor pour reisi akonplir ou lobzektif dan servis sakre, pa dekouraze. Avek led Bondye, ou osi ou pou kapab atenn sa bann lobzektif. Kontinyen demann Zeova lasazes anmezir ki ou esey retir bann lobstak ki devan ou. Dan letan apropriye, ou osi ou pou vwar ki mannyer Zeova i kapab ed ou “aplatir sa semen ki ou pou mars lo la.”​—Prov. 4:26.

[Not anba lo paz]

[Bwat lo paz 6]

Bann benediksyon ki ou pa gannyen dan liniversite

KAN Flavia ti ankor en pti fiy, son granmanman ki ti en Temwen Zeova, ti koz avek li lo Labib. Par kont, son papa ki ti en ansenyan ti esey ankouraz li pour aprann konsernan lanatir e ganny en letid avanse. Lezot dimoun ti dir li, “Ou zenerasyon i kapab anpes later ganny detri.” Avek sipor son papa, i ti al en bon liniversite kot i ti konmans fer resers lo bann diferan fason pour prodwir en bennzin ki pa detrir lanvironnman.

Deswit Flavia ti remarke ki bokou etidyan pa ti enterese pour sov later. Serten progranm kot sa liniversite ti osi depan lo larzan bann biznes, alor bann serser ti kapab santi zot pli anvi fer faver sa bann biznes. Sa ti fatig Flavia. Kan bann Temwen Zeova ti pas kot li, son lentere konsernan sa ki Labib i dir lo Bondye ek lavenir ti ganny renouvle.

Flavia ti aksepte laverite ki ganny trouve dan Labib e i ti batize. Me parski i ti pe fer letid avanse, i ti napa bokou letan pour prese. En zour i ti pe ekout en sirveyan rezyonal diskit lo Zak 4:17: “Tou dimoun ki konn sa ki byen ki i devre fer e ki pa fer li, i koupab, i komet en pese.” Sa ti motiv Flavia pour mazin lo son prop sityasyon. I dir: “Anmezir ki mon ti oule ganny benediksyon Zeova, mon ti osi anvi ganny satisfaksyon avek mon karyer dan lasyans. Mon ti bezwen fer en swa.”

Flavia ti deside pour aret son letid dan liniversite. Eski i ti regrete? I dir:

“Dan servis Zeova mon’n ganny bann benediksyon ki ou pa gannyen dan liniversite. Zeova in bon anver mwan. I’n ansenny mwan ki mannyer pour demontre lanmour, pour ed lezot spirityelman e pour zantiy. Mon annan en bon lavi maryaz e en lavenir bokou pli bon ki sa enn ki lasyans i ofer. Zis Zeova ki kapab sov later. Mon pa pou abandonn li.” Flavia avek son msye pe servi kot biro prensipal Temwen Zeova New York.