Eski ou ti konnen?

Akoz Labib i repet menm fraz?

SOUVANDFWA, bann ekriven Labib ti repet menm fraz mo pour mo. Annou vwar trwa rezon akoz petet bann ekriven ti fer sa:

Sa letan ki sa resi ti ganny ekrir. Dan letan bann Izraelit, laplipar dimoun ti napa zot prop kopi Lalwa Moiz. Zot ti prensipalman tann Lalwa ganny lir ler nasyon Izrael ti rasanble ansanm kot tabernak. (Det. 31:10-12) I tre probab ki zot ti ganny distrer ler zot ti pe debout pour plizyer erdtan parmi en gran lafoul pe ekout Lalwa kot pe ganny lir. (Nee. 8:2, 3, 7) Alor ler zot ti repet bann fraz enportan, sa ti fer li pli fasil pour dimoun mazin bann verse e aplik li. Ler zot ti repet serten mo, sa ti ed zot rapel bann detay dan Lalwa ki Zeova ti’n donn zot.—Lev. 18:4-22; Det. 5:1.

Lafason ki sa resi ti ganny ekrir. Serten parti dan Labib i bann kantik. Sa i enkli liv Psonm, Kantik Salomon ek liv Lamantasyon. Parfwa bann kantik ti annan en refren. Sa ti ed bann dimoun pour konn tenm sa kantik e i ti ed zot pour aprann bann parol parker. Par egzanp, remark sa ki ganny dir dan Psonm 115:9-11: “Izrael, annan konfyans dan Zeova i zot led ek boukliye. Bann desandans Aaron, annan konfyans dan Zeova i zot led ek boukliye. Zot ki annan en gran respe pour Zeova, annan konfyans dan Zeova i zot led ek boukliye.” Ler bann santer ti repet sa bann parol, sa ti ed zot pour gard sa bann laverite presye dan zot lespri ek leker.

Rezon akoz sa bann parol ti ganny ekrir. Parfwa bann ekriven Labib ti repet bann fraz enportan. Par egzanp, ler Zeova ti donn bann Izraelit lord pour pa manz disan, i ti fer Moiz repet plizyer fwa rezon akoz i ti pe donn zot sa lord. Bondye ti anvi fer bann Izraelit konpran ki lavi i dan disan, setadir ki disan i reprezant lavi. (Lev. 17:11, 14) Pli tar, ler bann zapot ek bann ansyen dan Zerizalenm ti nonm bann keksoz ki bann Kretyen i bezwen evite pour zot kapab fer Bondye plezir, ankor enn fwa zot ti montre ki bann serviter Bondye pa devret servi disan.—Akt 15:20, 29.

Menm si Labib i repet bann fraz plizyer fwa, sa pa vedir ki Zeova i anvi ki nou fer li en labitid pour repet bann lekspresyon dan Labib. Par egzanp, Zezi ti dir: “Ler ou priye, pa repet menm zafer.” (Mat. 6:7) Apre i ti koz lo serten keksoz ki nou kapab koz lo la dan nou lapriyer ki an armoni avek lavolonte Bondye. (Mat. 6:9-13) Alor menm si nou pa repet menm mo dan nou lapriyer, nou lib pour koz lo menm topik plizyer fwa.—Mat. 7:7-11.

I annan bann bon rezon akoz Parol Bondye i repet serten mo ek fraz. Sa i en fason ki nou Gran Ansenyan i ansenny nou pour nou prop byenfe.—Iza. 48:17, 18.