Génesis

7 Maʉ̃ tẽã, Jeowaba jarasi Noéʼa: «Eda wãra bʉta akʉza bʉ mebẽrãta jãba zromane, mʉ̃a ũdubʉrʉ naʉ̃ra ẽbẽrarãira bʉra kʼẽrẽpabʉta. 2 Nedʉwʉrʉra jaigʉa ẽã bʉdeba zedata bʉ k’aidu edeseabʉ siete: yumakẽrãta akʉza yuwẽrãta. Mamina maʉ̃ra nedʉwʉrʉra jaigʉa bʉdeba zedata bʉ k’aidu edeseabʉ ũme: yumakẽrãta akʉza yuwẽrãta. 3 Nedʉwʉrʉra ʉ̃tʉ wũãbaribʉdebemara edera siete (yumakẽrãta akʉza yuwẽrãta) mawũã nedʉwʉrʉra bamarẽã naʉ̃ drʉade. 4 Naneba ewari sietede kueta zebiyi, ewari 40 bayeda akʉza diamasi 40 bayeda, mawũã jõma makenañi ẽbẽrarã mʉ̃a naʉ̃ drʉade parãnara». 5 Mawũẽra Noébara jõma aripe osi Jeowaba zokʼadara. 6 Noéra 600 poagabasi kue zromaba naʉ̃ drʉ birasidera. 7 Kue zroma zei naweda, Noéra jãba zromane eda wãsi yi wũãwũãrabawara, yikimata akʉza yi ãĩgʉbawara. 8 Akʉza nedʉwʉrʉra jaigʉbʉ ẽãta, nedʉwʉrʉra jaigʉabʉta, nedʉwʉrʉra ʉ̃tʉ wũãbaribʉta akʉza nedʉwʉrʉra jõma egorode bʉta 9 Naʉ̃rata jõma wãsida Noéma, jõma jãba zromane eda wãsida ũme ũmeka, yumakẽrãta akʉza yuwẽrãta, Daizezeba Noéʼa zokʼada kĩrãkʼa. 10 Ewari siete berabaribʉrʉde kue zromata zesi drʉa ʉ̃rʉ. 11 Noé 600 poaga baside, ewari 17de jedeko ũmenebemane, maʉ̃ ewaride bania jõma naʉ̃ drʉadebemara jẽzasi akʉza do ʉ̃tʉ bajãnebʉsida. 12 Mawũã kue zroma zesi drʉa jõma birayeda ewari 40 akʉza diamasi 40. 13 Maʉ̃ ewaridera eda wãsi jãba zromane Noéta, yi kimata yi wũãwũãra Sem, Cam, Jafet akʉza yi ãĩgʉrata. 14 Ãyira jõma eda wãsi, nedʉwʉrʉra oidebemabawara mamaʉ̃ba zedata, nedʉwʉrʉra erbari wãbʉbawara mamaʉ̃ba zedata, nedʉwʉrʉra ʉ̃tʉ wũãbaribʉbawara mamaʉ̃ba zedata. 15 Mawũã Noéma zesida jãba zroma bʉidu, eda wãsida ũme ũmekade nedʉwʉrʉra jõma zokʼaibʉra. 16 Nedʉwʉrʉra jõma eda wãsida yumakẽrãta, yuwẽrãta, Daizezeba zokʼada kĩrãkʼa, maʉ̃ tẽã Jeowaba puertara anasi. 17 Kue zromara kuareta ewaribayeda mejãcha zesi, baniaba birasi mawũã jãba zromara oʉ̃besi drʉa ʉ̃rʉ. 18 Mawũẽra baniaba birasi naʉ̃ drʉara, mamina jãba zromara bania ʉ̃rʉ oʉ̃basi. 19 Baniara mejãcha zesi baera katumara jõma anasi. 20 Baniara warisi katumane ʉ̃ta 44,5 sentimetros. 21 Mawũã jõma besi naʉ̃ drʉade zokʼaipananara, nedʉwʉrʉra ʉ̃tʉ wũãbaribʉta, nedʉwʉrʉra urumʉ̃rʉãbʉta, nedʉwʉrʉra oidebemata, nedʉwʉrʉra erbari wãberata akʉza ẽbẽrarã jõma. 22 Beisi jõma naʉ̃ egorodebʉra, jõma yi zokʼaipananara. 23 Mawũã jõma jõbisi nekʼãrẽ naʉ̃ drʉadebadara ẽbẽrata akʉza nedʉwʉrʉrata, ʉ̃tʉ wũãbaribʉrata jõma jõbisi, Noéta akʉza iyi kʼaidu jãbade baridaratrʉ beida ẽ basi. 24 Baniara naʉ̃ drʉa ʉ̃rʉbasi 150 ewaribayeda.