Génesis

8 Mamina Daizezebara kĩrãdua ẽ basi Noéta akʉza nedʉwʉrʉra oidebemata, nedʉwʉrʉra urumʉ̃rʉãbʉta iyiʉ̃me jãba zromane edabadata. Aramaʉ̃ta Daizezebara pʉãdrʉta drʉa ʉ̃rʉ zebisi, mawũã baniara erraʉ jʉ̃drʉsi. 2 Bania jõma naʉ̃ drʉadebemara akʉza bania ʉ̃tʉ bajãne bʉra, jõma poasi, wua kue ze ẽ basi. 3 Wĩka wĩkaʉde bania drʉadebadara erraʉ wãsi, ewari 150 berabaribʉrʉde mejãcha erraʉsi. 4 Ewari 17de jedeko 7de jãba zromara katuma Araratde poanʉmesi. 5 Baniara audre erraʉ wãsi, maʉ̃ta jedeko 10de ewari aba jʉ̃drʉita, ũdusi katuma kĩbʉta. 6 40 ewari berabaribʉrʉde Noébara jãba zromane bentanabʉta ewasi, 7 mõbe zokʼabʉesi semita, maʉ̃ra wãpe zebasi egoro poanʉmʉ ũduyeda. 8 Maʉ̃ tẽã Noébara zokʼabʉesi pũsĩrata, bania naʉ̃ drʉade erraʉsi kʼawuaita. 9 Mamina pũsĩrabara ũdu ẽ basi sama enaʉ̃ita, drʉa jõma baniaba birabasi baera, mawũẽra jẽda zesi jãba zromama. Aramaʉ̃ta Noébara juwa wua kʼãrãpe pũsĩra jidape, jãba zromane edabʉesi. 10 Mõbe jʉ̃ãsi ewari 7 bayeda, maʉ̃ tẽã akʉza pũsĩrata zokʼabʉesi. 11 Pũsĩrara kewarare jẽda zesi, iyi ide chirua olibota ka erbasi, mawũã kʼawuasi Noéba baniara naʉ̃ drʉadera jõma poasita. 12 Akʉza jʉ̃ãsi ewari 7 bayeda, maʉ̃ tẽã jẽda zokʼabʉesi pũsĩrata, mamina naʉ̃ra jẽda ze ẽ basi. 13 Noé 601 poagabaside, ewari aba jedeko aba jʉ̃drʉita baniara naʉ̃ drʉadera jõma poasi. Noébara jãba zroma anabadara ãĩbʉesi, mawũã ũdusi drʉara poabʉsita. 14 Akʉza ewari 27de jedeko ũmene, egorora jõma poasi. 15 Aramaʉ̃ta Daizezeba Noéʼa jarasi: 16 «Ãĩ zera bʉta, bʉ kimata, bʉ wũãwũãrata akʉza bʉ ãĩgʉrata. 17 Jõma ãĩ bʉera yi zokʼaipanʉra: nedʉwʉrʉra ʉ̃tʉ wãbaribʉta, nedʉwʉrʉrata akʉza nedʉwʉrʉra erbari wãbeta. Mawũã ãyi wũãwũã baradamarẽã akʉza naʉ̃ drʉa biramarẽã». 18 Mawũẽra Noéra ãĩ zesi jãba zromaneba yi wũãwũãrabawara, yi kimata akʉza yi ãĩgʉbawara. 19 Akʉza jõma yi zokʼaipanʉrata, jõma nedʉwʉrʉra erbari wãbeta, jõma nedʉwʉrʉra ʉ̃tʉ wãbʉta (nedʉwʉrʉra jõma) jãba zromaneba ãĩ zesida jõma daucha. 20 Maʉ̃ tẽã Noéba osi altarta Jeowaita’a akʉza nedʉwʉrʉrata beasi, jaigʉa ẽãbʉta adewara ʉ̃kʉrʉ nedʉwʉrʉra wãbaribʉ jaigʉa ẽãbʉta maʉ̃ra Jeowaita basida. 21 Jeowabara naʉ̃ra tũãpoabʉta ʉ̃si. Aramaʉ̃ta Jeowaba jarasi iyi sode: «Wua zʉbʉriabi ẽ bayi naʉ̃ drʉara ẽbẽrarãba opanʉ kʼarea, ẽbẽra krĩchara iyi wũãwũãenaʉ̃ba krĩchabʉ nemitia oita. Wuara yi zokʼaibʉra kʼãwũã makena ẽ bayi. 22 Naʉ̃neba ʉ̃tara naʉ̃ drʉadera ne ura zaʉbayi, bayi kʉrãzata, bayi jʉ̃wʉrʉata, bayi poagata, bayi kueidata, bayi ewarita akʉza bayi diamasita».