Éxodo

3 Moisés’ra yi zaware Jetró obejara akʉbaribasi, Madián saserdotedeta. Ewari aba obejara edesi drʉa ibʉawabʉde Horeb’idu jʉ̃ẽñena, Daizeze wãrĩnuara katumainʉ. 2 Aramaʉ̃ta Jeowa angelba yi ũdubisi bakʉrʉ pʉreadeba. Moisésba maʉ̃ bakuru kĩrãkita akʉsidera, maʉ̃ra banʉma ẽ basi. 3 Maʉ̃ kʼarea Moisésba jarasi: «Mʉ̃ara orraedayi kʼãrẽa kʼãwũãminata, mawũã kʼawuaita kʼãrẽa bawa ẽãta maʉ̃ bakurura». 4 Jeowabara ũdusi iya orraedata maʉ̃ akʉita. Aramaʉ̃ta Daizezeba jarasi maʉ̃ bakurudeba: «Moisés, Moisés». Iya panʉsi: «Za chu mʉ̃ra». 5 Daizezeba jarasi: «Wua orrarãra, bʉa jĩrʉne jʉ̃bʉta wẽãra, naʉ̃ drʉa bʉ edaʉnʉmʉra neneẽãbʉ baera» 6 Maʉ̃ are jarasi: «Mʉ̃ra bʉ zeze Daizeze, Abrahán, Isaac akʉza Jacob Zeze». Maʉ̃ kʼarea Moisésbara iyi kĩrã darra anasi, perabasi baera Daizeze wãrĩnuara akʉita. 7 Jeowaba jarasi: «Mʉ̃a ũdubʉrʉ mʉ̃ pʉwʉrʉra zʉbʉrianʉmʉta Egiptode akʉza ũrĩbʉrʉ ãyi zʉbʉria bedʼeabʉ ʉ̃rʉ wuabemara nezokʼa baera. Mʉ̃a ãyi kʼãwũã zʉbʉriabʉra biʼia kʼawuabʉ. 8 Maʉ̃ kʼarea mʉ̃ra wãñi ãyi kʼarebade egipsioraneba ẽdrʉbita drʉa biama edei baera, drʉa zromaena, drʉa kũrabari kũa diabʉmae akʉza leche bʉmae, cananeora drʉata, hititara drʉata, amorreora drʉata, perizitara drʉata, heveora drʉata akʉza jebuseora drʉata. 9 Mʉ̃a ũrĩbʉrʉ mʉ̃ pʉwʉrʉ zʉbʉrianʉmʉra akʉza ũdubʉ egipsioraba sãwũã zʉbʉria onʉmʉta. 10 Atiara wãra, paraonma zok’a bʉeyi mʉ̃a. Bʉa Egiptodeba ẽdrʉbiyi mʉ̃ pʉwʉrʉra, israelitarata». 13 Mamina, Moisésba jarasi Daizeze wãrĩnu’a: «K’ãwũãne mʉ̃ta wãra israelitarainʉ, mõbe ãya’a jarayi: Daizeze mara zõrãrãenabemaba mʉ̃ta zok’a bʉesi marama. Mamina ãya mʉ̃a widira: ¿K’ai iyi trʉ̃ra? ¿K’ãrẽta jarai mʉ̃ara?». 14 Aramaʉ̃ta Daizezeba panʉsi Moisés’a: «Mʉ̃a Jidabʉ Mʉ̃a Okĩrãbʉta». Adewara jarasi: «Naʉ̃ta jaraibara israelitara: Mʉ̃a Jidabʉ mʉ̃ta zok’asi marama». 15 Daizezebara akʉza jarasi Moisés’a: «Naʉ̃ta jarada israelitara wũãwũãra: Jeowara Abrahán zeze Isaac zeze Jacob zeze, zok’a bʉesi mʉ̃ra marama». Naʉ̃ mʉ̃ trʉ̃ra ewari jõmaʉ̃nẽbayi akʉza kĩrãbepanañi ewari jõmaʉ̃nẽ.