Juan

2 Ewari ũbea berabaribʉrʉde juwa jidada piestata osida Caná Galileade, mama basi Jesús papara. 2 Akʉza jarasida juwa jipanʉ piestama jʉ̃ẽmarẽã Jesústa iyi kʼaidubemarabawara. 3 Bino jõbʉrʉde Jesús papaba jarasi: «Jõdogo binora». 4 Aramaʉ̃ta Jesúsba panʉsi: «¿Wẽrã dayara sãwũãi maʉ̃ra? Waidide ze ẽ mʉ̃ ewarira». 5 Yi papaba jarasi bino diapanʉra: «Oidua iya jarabʉta». 6 Mamara basi sei kʉgʉrʉ mõgara omarata baniaita, judiorata juwa sʉgʉdamarẽã. Kʉgʉrʉ abaʉde arabasi 44 mawũã ẽ bʉrʉ 66 litro. 7 Jesúsba jarasi: «Baniaba biraidua». Aramaʉ̃ta birabisida. 8 Maʉ̃are jarasi: «Wiña jʉedadape edeidua yi piesta obarima». Aramaʉ̃ta ãyara jʉe edesida. 9 Yi piesta ara obʉba doakʉbʉrʉdera bania binobabidata, kʼawua ẽ basi baera samaʉ̃ba wedata (mamina yi bania ededabara kʼawuabasi samaʉ̃ba zedara), trʉ̃si yi juwa jidadata 10 mõbe jarasi: «Jõmaʉ̃ba nããra diapanʉ bino warrata maʉ̃are ẽbẽrarã kirapʉrrabʉrʉde diapanʉ bino warra ẽãta. Mamina bʉara bino warrara wuagasi ʉ̃rabʉrʉ diaita». 11 Jesúsba Caná Galileade miõba okata osi, naʉ̃ra yi nããrabema basi. Maʉ̃ne ũdubisi iyi zareata, maʉ̃ kʼarea iyi kʼaidupanʉrabara ĩjãsida iyi ʉ̃rʉ. 12 Maʉ̃ tẽã jʉ̃nẽã wãsida Capernaúmʼena yi papaʉ̃me akʉza yi mebẽrabawara, adewara iyi kʼaidupanʉrabawara, mamina mamara ewari bio pana ẽ basi. 13 Judioraba Paskua ewari opanʉ zebodoare, Jesúsʼra wãsi Jerusalénʼena. 14 Iyara templodera ũdusi paka nẽdopanʉta, obeja nẽdopanʉta akʉza paloma nẽdopanʉta. Akʉza plata kambiapanʉrãra jewedapanasi. 15 Maʉ̃are rejo oeda kʼãrãpe jõma jʉrekʉasi templodebara, jʉrekʉasi obejarata akʉza pakarata, adewara plata kambiapanʉra monedara balbʉekʉasi, ãyi mesasida balbʉekʉasi. 16 Yi paloma nẽdobʉara naʉ̃ta jarasi: «Jõma ãĩ bʉeidua namaʉ̃bara. Mʉ̃ zeze dedara wua ne nẽdoraidua». 17 Iyi kʼaidubʉrabara kĩrãbesida maʉ̃ ʉ̃rʉ jaradata: «Bʉ dera mʉ̃ara mejãchade kãga baera tʉbʉba babʉ kĩrãkʼa sentibʉ mʉ̃ara». 18 Maʉ̃ta ũdusidade judíorãba widisida: «¿ũdubira daiʼa kaiba kʼãwũã omarẽã jaradata?». 19 Jesúsba panʉsi: «Ãrĩdua naʉ̃ templora mʉ̃a ewari ũbeade akʉza jẽda paraña». 20 Judioraba jarasida: «Naʉ̃ templora 46 poagade maparãsida, ¿maʉ̃ta bʉa ewari ũbeade jẽda parãtaika?». 21 Mamina maʉ̃ templo iya jaradara iyi kakuabasi. 22 Iyi beida tẽã jẽda piradrʉside iyi kʼaidupanʉrabara kĩrãbesida iyara badua jarabasita maʉ̃ bedʼeara, maʉ̃ kʼarea audre ĩjãsida Daizeze bedʼeaba jarabʉra akʉza Jesúsba jaradara. 23 Iyi Jerusalénʼena jʉ̃ẽside Paskua piesta eda, ẽbẽrarã mejãchaʉba ĩjãsida iyi ʉ̃rʉ ũdusida baera iyara miõba okata obʉta. 24 Mamina Jesúsbara ĩjã ẽ basi ãyi ʉ̃rʉra bia ũdukawuabasi baera wãrĩnu sãwũã bʉta ãyi sora, 25 iyara nesida ẽ basi kʼaiba jara ũrĩbira ẽbẽrarã ʉ̃rʉra, iyara bia ũdukʼawuabasi baera ẽbẽra sora.