Juan

3 Nicodemora pariseobasi, iyira judiora nokʼobasi. 2 Iyara Jesúsʼra diamasi akʉde jʉ̃ẽsi akʉza jarasi: «Rabí, daibara kʼawuapanʉ bʉra jaradiabarita akʉza Daizezeba zokʼasita, mia abaʉ ẽbẽraba oda ẽ bʉa obʉra, Daizeze kʼarebata neẽbʉrʉ obe ẽ maʉ̃ra». 3 Jesúsba jarasi: «Mʉ̃a bʉa jarayi dayita akʉza jẽda toda ẽ bʉrʉ ũdu ẽ bayi Daizeze Nokʼora». 4 Nicodemoba jarasi: «¿Sãwũã akʉza jẽda todaipe­? Bʉmabida todapeada tẽãra yi papa bitedara jẽda bʉebeda ẽ mae». 5 Jesúsba jarasi: «Akʉza mʉ̃a bʉaꞌa jarayi, dayita toda ẽ bʉrʉ baniane akʉza jaurede, eda wã ẽ bayi Daizeze Nokʼodera. 6 Yarade todapeadara yara, jaurede todapeadara jaure. 7 Perarãra mʉ̃a jarasi baera ‹Marara jẽda todaibarata›. 8 Pʉãdrʉra badumae wãbʉ, bʉara ũrĩseabʉ pʉãdrʉra, mamina kʼawua ẽ samaʉ̃ba uruta akʉza sama wãta. Maʉ̃ kĩrãkʼa berabaribʉ yi jaurede todara». 9 Aramaʉ̃ta Nicodemoba widisi: «¿Sãwũã mawũãra?». 10 Jesúsba jarasi: «¿Bʉara Israelde nejaradiabʉmina, kõbe kʼawua ẽka naʉ̃ ʉ̃rʉra? 11 Daibara jaradiapanʉ daiba kʼawuapanʉta akʉza daiba ũdupanʉta, mamina marabara ĩjãna ẽ maʉ̃ra. 12 Mʉ̃a mara jaradiabʉ maraba naʉ̃ drʉade ũdubʉdeba mamina ĩjãna ẽ, kõbe ¿sãwũã ĩjãnaipe ʉ̃tʉbema jaradiabʉrʉdera? 13 Adewara miõta ʉ̃ta wãka, awuarabʉrʉ ʉ̃treba zedatrʉ, Yumakẽrã Warrata. 14 Moisésba dama desiertode jirabʉda kĩrãkʼa, Yumakẽrã Warrasida mawũã jirabʉdayi 15 iyi ĩjãpanʉrãra ewari jõmaʉ̃nẽ jõma zokʼaipanamarẽã. 16 «Daizezebara ẽbẽrarã mejãcha kãgabʉ baera diasi yi Warra ababʉta iyi ĩjãbʉra beida ẽ bamarẽã, awuarabʉrʉ ewari jõmaʉ̃nẽ bamarẽã. 17 Yi Warrara zoka ẽ basi ẽbẽrarã ʉ̃rʉ imitia bedʼeaita, awuarabʉrʉ zokʼasi iyideba ẽdrʉdamarẽã. 18 Iyi ĩjãbʉra kʼawua oda ẽ bayi, mamina iyi ĩjã ẽãra kʼawua odayi, ĩjãta ũdubi ẽ basi baera Daizeze Warra abapaibʉ ʉ̃rʉ. 19 Maʉ̃neba kʼawua odayi ẽbẽrarãra: ʉ̃nara zesi naʉ̃ drʉaeda, ʉ̃na kãgai kaude ẽbẽrarãbara kãgasida parĩgʉata, ãyara kayiruata opanasi baera ewari jõmaʉ̃nẽ. 20 Kayirua obʉbara jʉra ʉ̃nara akʉza wã ẽ ʉ̃namara, mawũã ũduda ẽ marẽã iya kayirua obʉta. 21 Mamina nebia obʉra wãbʉ ʉ̃nama, mawũã biʼia ũdudamarẽã iya nebia obʉra Daizezeba kãga kĩrãkʼa obʉta». 22 Maʉ̃ tẽã jʉ̃nẽã Jesúsʼra wãsi iyi kʼaidupanʉbawara Judea drʉaeda, mamabasi ãyibawara akʉza buru kʼoekʉabasi ẽbẽrarãta. 23 Akʉza Juanbida ẽbẽrarãra buru kʼoenʉmasi Enón Salim arakʼaita, mamara do zromata basi akʉza ẽbẽrarãra mama wãpanasi iya buru kʼoemarẽã; 24 maʉ̃ ewaridera Juanʼra waidide ededa ẽ basi karselʼedara. 25 Maʉ̃ne Juan kʼaidubʉrãra bedʼeakabarabasi judioʉ̃me neneẽã bai ʉ̃rʉ. 26 Maʉ̃are jarasida Juanʼa: «Rabí, yumakẽrã bʉme Jordánʼne badaba, bʉa daiʼa ʉ̃dubidaba, buru kʼoenʉmʉ akʉza jõmaʉ̃ta iyima wã». 27 Juanba jarasi: «Mia abaʉba kʼãrẽ obe ẽ ʉ̃tʉbemaba omarẽã jara ẽ bʉrʉ. 28 Marabara bia kʼawuabʉ mʉ̃a jarasibasita ‹Mʉ̃ra Kristo ẽãta, awuarabʉrʉ iyi nãã wã›. 29 Nobiara erbʉ yi nobioba. Yi neũdukʼawuaba ũdubʉrʉde nobio bedʼeabʉta iyi nobiaʉ̃me, maʉ̃ kʼarea iyira mejãchade sobiabʉ jipa. Atiara mʉ̃ra mejãchade sobiabʉ jipa. 30 Iya obʉra audre eaba wãñi, mamina mʉ̃a obʉra jõ wã». 31 Yi ʉ̃tʉba zedara wuabemara audre yi zroma. Yi naʉ̃ drʉadebema egoro oma baera bedʼeabʉ nekʼãrẽ naʉ̃ drʉadebema ʉ̃rʉ. Yi ʉ̃treba zedara ẽbẽrãra audre yi zroma. 32 Adewara iyara jaradiabʉ iya ũdubʉdeba akʉza iya ũrĩbʉdeba, mamina miõba ĩjãkĩrã ẽ. 33 Yi ĩjãbʉbara ũdubibʉ Daizezeba jarabʉra wãrĩnuarata. 34 Daizezeba zokʼadabara Daizeze bedʼeata jarabʉ, Daizezebara diakĩrã diabʉ baera iyi jaure zareara. 35 Yi Zezebara yi Warrara mejãchade kãga baera, jõma diasi iya zokʼamarẽã. 36 Yi Warra wãrĩnu ĩjãbʉ ũdubibʉra ewari jõmaʉ̃nẽ bayi, mamina yi Warra bedʼea ũrĩ ẽãra ewari jõmaʉ̃nẽ ba ẽ bayi. Awuarabʉrʉ Daizeze kĩrʉbira iyi ʉ̃rʉbayi.