Mateo
Doceta jʉrʉkuadʼa zokʼakuaita
(Marcos 3:13-19; Lucas 6:12-16)
10 Mobebʉrʉ Jesúsbara izha jʉrʉkuadʼa doceta trʉ̃pe zareata dedʼekasia jaita ãĩ jʉrekuadʼamarẽã, bʼebidʼamarẽã ne bariduba kʼaya bʼeta, ne bariduba pua bʼeta. 2 Doce zokʼakuadʼa trʉ̃rã naʉ̃rãã: Simón, Pedro abadata, Andrés zhi mebeata, Jacobo Zebedeo warrata, Juan zhi mebeata. 3 Felipeta, Bartolomé, Tomás, Mateo impuesto widʼi bʼadʼata, Jacobo Alfeo warrata, Lebeo ijaramiã trʉ̃ta Tadeota. 4 Simón Canaán bidʼata, Juda Iscariote Jesús chupea jidabidʼata.
Zokʼakuadʼa doceta
5 Jesúsbara doce maʉ̃rãta zokʼabʉrʉta mawũãsia: Judíorã ẽãta bʼema wãrãũdua, Samaria druadʼebema pʉwʉrʉdʼera edʼa wãrãũdua. 6 Awuarabʉrʉ wãũdua oveja adua bʼe kĩrãkʼa bʼema Israel bʼema. 7 Jarakʼa wãbʉdata mawũãũdua: Daizezeta Nokʼodʼebema kʼaita basia. 8 Kʼaya bʼera bʼebiudua, aidʼaba kʼaya bʼera nene ẽã bʼebiudua, beudʼapeadʼara piradrʉbiudua, jaira ãĩ jʉrekuaudua. Maʉ̃ zareara marãbara bari jidasidʼa, mawũẽ bari maʉ̃ kʼaudʼa bʼeaudua. 9 Ederãũdua orota, miã platata. 10 Miã odʼera talegora ederãũdua, miã wua trokʼa jʉ̃ĩta, miã sandalia trokʼa jʉ̃ĩta, miã barrata ederãũdua. Traja bʼʉra zhiko diadʼaidʼe bʼʉa. 11 Pʉwʉrʉ zromane o pʉwʉrʉ zakedʼe marã edʼa wãbʉda maẽ mazhi bia edai bʼʉta jʉrʉudua, mobe mama kʼãĩũdua mamaʉ̃ba wãnañeẽna. 12 Mama deidʼu wãbʉdadʼera mawũãũdua: Daizezedʼeba marã adu-a bʼeaya. 13 Mama dedʼa bʼeta mawũã bʼeaidʼe bʼebʉrʉ, marãba adu-a bʼaidʼebema jarabʉdara ãzhima wãña. Mawũãmina mawũã bʼeaidʼe duanu ẽbʉrʉ, maʉ̃ adu-a bʼaidʼebema mazhima zeya. 14 Iabʼaʉba marãta bia eda ẽbʉrʉ, miã marã bedʼeata ũrĩ ẽbʉrʉ, maʉ̃ dedʼaubara o maʉ̃ pʉwʉrʉdʼebara ãĩ wãũdua, egoro jarra marã jẽrũnebema niãweudua. Aramaʉ̃ne kʼawuabidʼaya ãzhira Daizezebara pua kʼawua oita. 15 Mʉã wãrĩnu marãã jaraya, Daizezeba kʼawua obʉrʉ ewadera Sodoma pʉwʉrʉdʼe, Gomorra pʉwʉrʉdʼe bʼeadʼara yarebai zuburia bʼeabiya maʉ̃ pʉwʉrʉdʼe bʼe kʼãñabara.
Jesús kʼarea zuburia odʼaidʼebema
(Marcos 13:9-13; Lucas 21:12-19)
16 Mʉã marã zokʼabʉrʉa ovejarãta zokʼabʉrʉ kĩrãkʼa usa pãta bʼedʼe edʼa. Mawũẽ krĩcha bara bʼeaudua dãma kĩrãkʼa, adu-a bʼeaudua pusirã kĩrãkʼa. 17 Aramaʉ̃ne kĩrãkuita bʼeaudua zhãrã kʼarea, marã chãbʼaridʼaya nokʼorã wagʼaurãã, de zhi jʉrebadata nʉme maẽ marã udʼaya. 18 Nokʼorã kĩrãbita, reyrã kĩrãbita marã ededʼaya mʉ kʼarea, aramaʉ̃ne marãbara mʉnebemata maʉ̃rãã jaradʼaya, judíorã ẽãta bʼeabidʼa jaradʼaya. 19 Mawũãmina marãta nokʼorãã chãbʼaribʉdadʼera sopuarãũdua sãwũã bedʼeadʼai kʼareara, maʉ̃nerã Daizezeba marãã diaya sãwũã bedʼeadʼaita. 20 Aramaʉ̃nerã marãta bedʼea ẽã, awuarabʉrʉ Jawurebia marã Zezedʼeta bedʼeaya marãneba. 21 Mebeabara beadʼamarẽã chãbʼariya zhi mebeata, zezebara zhi warrata, warrarã bĩ ẽãdʼaya ari ãzhi zhibarirã bawara, aramaʉ̃ne beakuabidʼaya. 22 Jõmaʉ̃ba marã juradʼaya mʉ kʼarea, mawũãmina mʉta pẽwã zuburiata jõñiĩnu nʉmʉrã ẽdrʉya. 23 Pʉwʉrʉ abʼaʉdʼe marã pẽwã jirpanebʉdadʼera merũ wãũdua awʉrʉ pʉwʉrʉedʼa. Mʉã wãrĩnu marãã jaraya, Daizezedʼebema jara bʼeta marãbara ma pʉrrʉadʼa ẽã Israeldʼe pʉwʉrʉ tabʼe jõmarã mʉta zei nawedʼara mʉ Beubari Bape bʼadʼata.
24 Ne kʼawa bʼʉra audre bʼʉ ẽã izhi ne jaradia nʉmʉ kʼãñabara, miã nezokʼara audre bʼʉ ẽã izhi nokʼo kʼãñabara. 25 Biga ne kʼawa bʼʉta nʉmʉbʉrʉ izhi ne jaradia bʼʉ kĩrãkʼa, biga nezokʼata nʉmʉbʉrʉ izhi nokʼo kĩrãkʼa. Aramaʉ̃ kĩrãkʼa mʉ zhidekʉta Beelzebú apanʉbʉrʉ, ¡audre jaradʼaya marã mʉ dedʼabema!
Kʼaita wawiaita barape
26 Zhãrãta wawiarãũdua, kʼãrẽ chũwẽã nʉmʉta kʼawuadʼa ẽã nʉmaĩrã ne ẽã, miã kʼãrẽ merã bʼʉta kʼawuadʼa ẽã nʉmaĩrã ne ẽã. 27 Mʉã mazhi dobʼaʉa jarabʉrʉra jõmaʉ̃ã jaraudua, mʉã kʉwʉrʉ kʼawa jarabʉrʉra jĩgua jaraudua de ʉ̃rʉ̃ba. 28 Wawiarãũdua kʼakua bea bʼeta, maʉ̃rãbara jawurera bea bʼedʼa ẽã. Awuarabʉrʉ Daizezeta wawiaudua, izhara jawureta kʼakuata zuburiabi bʼeya tebʉdʼe. 29 ¿Nendobada ẽka ibana zake ũmeta plata pichi abʼaʉbari? Maʉ̃ta miã abʼabidʼa egorodʼe beu bʼae ẽã marã Zezeba idaribi ẽãrã. 30 Marãẽnabema mazhi budʼasidʼa jõma juacha nʉmʉkʼãrĩã. 31 Mawũẽ perarãũdua, Daizezema marã audre vale bʼea ibana zaketa bio kʼãñabara.
32 Bariduba zhãrã kĩrãbita mʉ pẽwã bʼʉa ara, mʉãbidʼa mʉ pẽwã bʼʉa aya mʉ Zeze ʉ̃tre bʼʉ kĩrãbita. 33 Bariduba zhãrã kĩrãbita mʉ pẽwã bʼʉ ẽã ara, mʉãbidʼa mʉ pẽwã bʼʉ ẽã aya mʉ Zeze ʉ̃tre bʼʉ kĩrãbita.
Jesúsdʼebema juradʼaya
34 Krĩcharãũdua mʉrã zesita druadʼe zhãrã adu-a bʼeabiita, mʉrã zesi ẽã zhãrã adu-a bʼeabiita, awuarabʉrʉ mʉ kʼarea zhõnaña. 35 Mʉ zebʉrʉbara mʉnebemata juradʼaya, zhãrãbara juraya zhi zezeta, kʼaubara juraya zhi papata, ãĩgubara juraya zhi pakʼõrẽta. 36 Mawũẽ ãzhi juraira zhãrãnerã ãzhi dedʼabema baya. 37 Iabʼaʉba zhi zezeta zhi papata mʉ audre kʉãgʼabʉrʉ mʉrẽta bʼaidʼe bʼʉ ẽã, iabʼaʉba zhi warrata zhi kʼauta mʉ audre kʉãgʼabʉrʉ mʉrẽta bʼaidʼe bʼʉ ẽã. 38 Iabʼaʉba bebudʼe basiidʼu mʉta pẽwã ẽbʉrʉ mʉrẽta bʼaidʼe bʼʉ ẽã. 39 Mʉ kʼarea beu ẽãrã aduaya, mawũãmina mʉ kʼarea beubʉrʉra ẽdrʉya.
Daizezeba kʼãrẽ diaidʼebema
40 Iabʼaʉba marãta bia edabʉrʉra mʉta bia edabʉrʉa, mʉta bia edabʉrʉra bia edabʉrʉa mʉ zokʼadʼata. 41 Iabʼaʉba bia edabʉrʉta Daizezeba bedʼeata jarabibarita bʼʉ baera bia edara, Daizezebara maʉ̃ã ne biata diaya izha bedʼeata jarabibaria diai kĩrãkʼa. Iabʼaʉba bia edabʉrʉta Daizezedʼeta biata bʼʉ baera bia edara, Daizezebara maʉ̃ã ne biata diaya izhidʼeta biata bʼʉa diai kĩrãkʼa. 42 Bariduba maʉ̃rãnebema abʼa zhi zroma ẽã arigu baniã kũrãsãta dobira, mʉta pẽwã bʼʉ baera mawũã dobira, mʉã wãrĩnu marãã jaraya, Daizezebara maʉ̃barira kʼãrẽ diaya.