Mateo
Dazhi sãwũã mitiabaridʼebema
15 Mobebʉrʉ Jesús orrasidʼa ũrãgʼa Moisédʼe jarabadaba ʉ̃kʉrʉba fariseorãba ʉ̃kʉrʉba, ãzhira zekuasia Jerusalénneba, maʉ̃rãbara mawũãsidʼa: 2 ¿Kʼãrẽã bʉa jʉrʉkuadʼabara aribʼaedʼa ẽpe zõrãrãba okʼawa bʼeadʼara? Mitia ne ẽã obʉdata juwuara surrua odʼa ẽã nekʼobʉdadʼera.
3 Mawũãnaĩ izhara panaʉ̃ mawũãsia: ¿Kʼãrẽã marãbidʼa aribʼaedʼa ẽpe Daizezeba aribʼaemarẽã jara bʼʉra, mazhidʼeta aribʼaedʼai kʼarea ẽka? 4 Daizezebara mawũãsia: Wawiarua bʉ zezera bʉ papara. Zezeta o papata ikʼazhirua jarabʉrʉra beadʼaibara. 5 Mawũãmina marãbara mawũãbada: Bariduba zhi zezea o zhi papaa mawũãsia bʼʉa: Mʉãrã jõma Daizezea diasia bʉ kʼarebaita mʉã erubʼadʼara. 6 Mawũãbʉrʉba marãma ya kʼarebaidʼe bʼʉ ẽã zhi zezera o zhi papara. Daizezeba aribʼaemarẽã jara bʼʉra aramaʉ̃ne seribidʼa ẽã mazhidʼeta aribʼaedʼai kʼarea. 7 Marã sewa bibaʉta bʼea, bia marãẽnabemata Daizezedʼeba Isaíabara mawũãsia:
8 Za bʼebara bari iba mʉrã wawidea, aramaʉ̃ne ãzhi sora wawara nʉmʉã mʉnebara.
9 Mʉrã bari ibia jara bʼeba mʉ ũrãgʼa kĩrãkʼa jaradia bʼea aribʼaemarẽã jara bʼeta beubari bʼeba.*
10 Maʉ̃ jarape Jesúsbara kʼabanata trʉ̃pe mawũãsia: Mʉã jaraita ũrĩũdua, mobe sãwũãta kʼawuaudua. 11 Zhikota yedʼa wãbʉrʉbara dazhira mitia o ẽã, mawũãmina yedʼauba ze bʼʉbara Daizeze kĩrãbitara dazhira mitia obʼʉa.
12 Mawũãĩ izha jʉrʉkuadʼabara orradʼape mawũãsidʼa: ¿Bʉara kʼawuasika fariseorã bĩ ẽãbʉdara ũrĩbʉdaba maʉ̃ bedʼeata?
13 Mawũãnaĩ izhara panaʉ̃ mawũãsia: Nekʼarra kĩrãkʼa bʼedʼeba nekʼarra mʉ Zeze ʉ̃trebemaba u ẽbadʼara izha ẽũkuaya. 14 Idaribiudua, jipa ededʼa ẽã Daizezedʼebema kʼawuadʼa ẽãba daʉbʼerrea bʼe kĩrãkʼa bʼera. Daʉbʼerrea bʼʉba daʉbʼerrea bʼʉta erbʼari edera abʼarika bʼaedʼaya zobʼeadʼe.
15 Mobebʉrʉ Pedroba mawũãsia: Sãwũãta daia jaradua bʉa jarabʉrʉta.
16 Mawũãĩ Jesúsbara mawũãsia: ¿Marãbidʼa sãwũãta kʼawuadʼa ẽka? 17 ¿Kʼawuadʼa ẽka jõma kʼãrẽ yedʼa wãbʉrʉra bʼitaedʼa wãpe ãĩ wã bʼʉra? 18 Mawũãmina yedʼauba ze bʼʉra sodʼeba ze bʼʉa, Daizeze kĩrãbitara dazhira maʉ̃ba mitia obʼʉa. 19 Sodʼebara ze bʼʉa krĩchata bia ẽãta, miã beaita, kĩma ẽãta erukʼãĩta, nezrʉgaita, sewa nebʉrʉita, zhãrã ikʼazhirua jaraita. 20 Daizeze kĩrãbitara maʉ̃ jõmaʉ̃ba dazhira mitia obʼʉa. Mawũãmina juwua surrua o ẽã nekʼobʉrʉbara dazhira mitia o ẽã.
Soidʼu kʼobʼadʼa wũẽrã Canaán bidʼata
21 Jesús mamaʉ̃ba wãbʉrʉdʼera wãsia Tiro druaedʼa Sidón druaedʼa. 22 Maʉ̃ne wũẽrã Canaán druadʼebemaba nemi jĩgua mawũãsia: ¡Nokʼó, bʉra rey Davidʼeba uruta bʼʉba mʉta sozuburiarua! Mʉ kʼauta kʼãbãẽã zuburia bʼʉa jaiba.
23 Jesúsbara panaʉ̃ ẽbasia, mawũẽ izha jʉrʉkuadʼabara orradʼape zuburia bedʼea mawũãsidʼa: Wãmarẽã jaradua, bʼia taia dazhirã kʼaidʼu.
24 Mawũãnaĩ izhara panaʉ̃ mawũãsia: Daizezebara mʉrã awuarabʉrʉ zokʼasia Israel adua bʼema.
25 Aramaʉ̃ne wũẽrã zepe izhi kĩrãbita sãkʼokʼodʼe kʼobʼepe mawũãsia: ¡Nokʼó, mʉrã kʼarebarua!
26 Mawũãĩ izhara panaʉ̃ mawũãsia: Mʉã bʉta kʼarebaira biga ẽã, mawũãrã zhiko warrarãneta jiraedape diabʉrʉkaya usarãã.
27 Mawũãĩ izhara mawũãsia: Ããjã Nokʼó, mawũãmina usarãbidʼa ãzhi zhibarirã mesadʼeba zhiko jarra bʼaedʼata kʼobada. Mawũẽ mʉrã judía ẽmina kʼarebarua.
28 Mawũãĩ Jesúsbara panaʉ̃ mawũãsia: Wũẽrã, bʉra kʼãbãẽã soidʼu kʼobʼʉdʼeba aribʼae nʉmaẽdaya bʉa krĩñane.
Izhi kʼaura bʼesia aramaʉ̃ta.
Jesúsba bʼebikuadʼa bio
29 Jesús mamaʉ̃bara doyaa wãsia Galilea dota jedʼea õbʼʉidʼu. Mobe kʼatumaĩnu wãrĩzepe mama jewedʼasia. 30 Zhãrã bioba orrasidʼa zhi wedʼapeadʼaba wã bʼe ẽã bʼeta, daʉbʼerrea bʼeta, bedʼea bʼe ẽã bʼeta, juwua dorrabʼari bʼeta, dewara bio wesidʼa kʼayarãta. Maʉ̃ta Jesús jẽrũ kʼaita bʼʉkuasidʼa, mawũẽ bʼebikuasia. 31 Maʉ̃ta kʼabanaba bia akʉdrua ũdubʉdara bedʼea bʼe ẽã bʼera bedʼeasidʼa, juwua dorrabʼari bʼera bʼesidʼa, wã bʼe ẽã bʼera wãsidʼa, daʉbʼerrea bʼera ne ũdusidʼa. Mawũẽ ibia jarasidʼa Daizeze Israel bʼedʼera.
Nekʼobigadʼa cuatro mil
32 Jesúsbara izha jʉrʉkuadʼata trʉ̃pe mawũãsia: Mʉãrã zhãrã sozuburia kʼobʼʉa, mʉ bawara bʼeta ewari ũbea babʉrʉta kʼãrẽ kʼoi ne ẽã bʼea. Mʉãrã krĩña ẽã nekʼo ẽã wãbigaira, manebʉrʉ nomadrʉdʼaya odʼe.
33 Mawũãĩ izha jʉrʉkuadʼabara mawũãsidʼa: ¿Miõ ne ẽã maẽrã dazhirãbara zhiko sãma ũdudʼaipe mawũã nekʼobigaira kʼãbãẽã kʼabanata?
34 Mawũãnaĩ Jesúsbara mawũãsia: ¿Marãbara pan sõmbe erubʼe?
Mawũãĩ ãzhara mawũãsidʼa: Erupanʉã pan siete, bʼeda zakerãta ʉ̃kʉrʉ.
35 Mawũãnaĩ kʼabanata kʼobʼea jarasia jewedʼa duanemarẽã egorodʼe. 36 Mobebʉrʉ jiraedasia pan sieteta, bʼeda zakerãta, mobe Daizezea zhibia jipe bʼʉekuape diasia izha jʉrʉkuadʼaa, mawũẽ izha jʉrʉkuadʼabara jedʼekasidʼa kʼabanata kʼobʼea. 37 Jõma jãwũã nekʼosidʼa, adʼubadʼapeadʼa zhi bʼʉgʉzoamata jʉrepesidʼa jamara siete bira. 38 Zhi nekʼodʼapeadʼara zhũmakĩrãrãta nʉmasia cuatro mil, wũẽrãrãta wũãwũãrãta juacha ẽã. 39 Zhãrã wãbigape jãbadʼe bʼaripe wãsia Magdala druaedʼa.