Génesis

20 Kõbebʉrʉ, Abrahán’ra iyibadamaebara iyi netatata jʉrepe k’ãrãpe wãsi Négueb drʉa eda mama Cadés akʉza Sur ẽzadrabasi. Iyi Guerardebaside, 2 Abrahánbara iyi kima Sara ʉ̃rʉ jarasi: «Iyira mʉ̃ mebẽã». Maʉ̃ k’area Abimélec, Guerar nok’oba zok’asi Sara eda wãnamarẽã. 3 Maʉ̃ tẽã, Daizezera k’ãĩmok’ãrãde yi ũdubisi Abimélec’a mõbe jarasi: «Bʉra naʉ̃ wẽrã k’area beiseabʉ k’ãwũã eda zok’asi baera, iyira mia k’ãĩbʉ akʉza awuru yumakẽrãne». 4 Mamina Abimélecbara Sarara neida oẽbasi. Maʉ̃ k’area widisi: «Jeowa, ¿bʉa wãrĩnu beaika naʉ̃ pʉwʉrʉ k’ãwũã nekayirua oẽãra? 5 ¿Iyara jarasi ẽka iyira mʉ̃ mebẽãta? akʉza ¿naʉ̃ wẽrãba jarasi ẽka iyira mʉ̃ mebẽãta? Mʉ̃ara krĩña k’ãwũã oẽbasi naʉ̃ra». 6 Aramaʉ̃ta Daizeze wãrĩnuarabara jarasi k’ãĩmok’ãrãde: «Mʉ̃a k’awuachu bʉa krĩña k’ãwũã oẽbasita. Maʉ̃ k’area mʉ̃ara iduaribi ẽ basi mʉ̃ dabʉ nãã kayiruata omarẽã akʉza neida obi ẽ basi iyita. 7 Maʉ̃ba bʉara jẽda edeibara yi kimara, iyira propeta baera. Iyira bʉbari yiwid’iyi mawũã bʉra zok’aibayi. Mamina bʉa jẽda ede ẽ bʉrʉ bʉta akʉza bʉ mebẽrãta jõma beiyi». 8 Abimélec’ra diapeda piradrʉ k’ãrãpe trʉ̃si iyi nezok’arata mõbe jarasi k’ãrẽ berabaridata. Maʉ̃ k’area ãyira mejãcha perasida. 9 Aramaʉ̃ta Abimélecbara trʉ̃bʉesi Abrahánta mõbe jarasi: «¿K’ãrẽa k’ãwũã obʉrʉ bʉara? ¿Daibara k’ãrẽ kayiruata osi bʉ ʉ̃rʉra k’ãwũã mʉ̃ ʉ̃rʉ akʉza mʉ̃ nok’o ʉ̃rʉ kayirua berabarida k’areara? Bʉa dai k’ãwũã obʉrʉra biata oẽbasi». 10 Akʉza Abimélecba jarasi Abrahán’a: «¿K’ãrẽ krĩcha k’ãrãpe k’ãwũã osi?». 11 Aramaʉ̃ta Abrahánba panʉsi: «Mʉ̃a krĩchasi: Namabema ẽbẽrarãbara Daizezeta wawiada ẽ baera mʉ̃ra beadaita mʉ̃ kima k’area. 12 Adewara iyira mʉ̃ mebẽãra. Daira zeze ãbaʉ, papatrʉ awuarapanʉ. Mamina atiara iyira mʉ̃ kima. 13 Maʉ̃ba mʉ̃ Daizezeba zok’aside mʉ̃ zeze dedauba ãĩ wãmarẽã, mawũã ode wã b’aita, mʉ̃a iya jarasi: Mʉ̃a ũdubira mʉ̃ wãrĩnu k’ẽrẽpa kãgabʉta naʉ̃ obʉde: Dayi wãmae bʉara jaraibara dayirã yi mebẽãta». 14 Aramaʉ̃ta Abimélecbara jarasi wedamarẽã obejata, pakata, nezok’arata maʉ̃ra Abrahán’a diadamarẽã. Maʉ̃ awuara yi kima Sarasida jẽda diasida. 15 Akʉza Abimélecbara jarasi: «Akʉra, bʉra mʉ̃ drʉade baseabʉ, bʉyi bakĩrãbʉmae» 16 Adewara Sara’a jarasi: «Nama bʉ mebẽã’a diayi 1000 moneda platade. Mawũã ũdubita bʉra k’ẽrẽpabʉta wuabemara nãã. Mawũã mia k’aiba jarada ẽ bayi bʉ ʉ̃rʉra». 17 Aramaʉ̃ta Abrahán’ra Daizeze’a yiwid’isi ãyibari, mawũã Daizezebara bebisi Abimélecta yi kimata iyi nezok’arata akʉza wũãwũãra barakʉasi. 18 Jeowabara Abimélec deda wẽrã jõmabadara tokata amaesi maʉ̃ta mawũã osi Sara Abrahán kima k’area.