Génesis
6 Kõbebʉrʉ, ẽbẽrarã naʉ̃ drʉade audre eaba wãside ãyira kaubarakʉasi, 2 Daizeze wũãwũãrabara wẽrãra nama naʉ̃ drʉadebʉra bia kiruta akʉnʉmesi. Maʉ̃ba ãyira mia k’ãĩkʉasi ãya kãgaʉ̃me. 3 Akʉza Jeowaba jarasi: «Mʉ̃ara wuara bari akʉ ẽ ẽbẽrarãba obʉra, maʉ̃ra yara baera. Maʉ̃ k’area mara ewarira 120 poagabai bayi». 4 Maʉ̃ ewaribasidera nepilim’rãra nama naʉ̃ drʉade panasi. Maʉ̃ daucha ʉ̃kʉrʉ Daizeze wũãwũãra angelerasida wẽrãrabawara ãba k’ãĩkʉasida akʉza maʉ̃ daucha wũãwũã barakʉasida. Maʉ̃ra wũãwũãrãra mejãcha zareabarachubeabayi maʉ̃ k’area jõmaʉ̃ba ũduk’aʉdebasi. 5 Jeowabara ũdusi naʉ̃ drʉara ẽbẽrã kayiruaraba wuabʉrʉ bira wãta akʉza ãyi krĩchara ewari jõmaʉ̃nẽ kayirua krĩchapanasita soiduba. 6 Maʉ̃ba Jeowara sobia ẽ basi ẽbẽrarã naʉ̃ drʉade oda kʼarea. Maʉ̃ kʼarea sopʉabasi. 7 Jeowaba jarasi: «Mʉ̃a jõma makenañi ẽbẽrarã naʉ̃ drʉade parãnara, nedʉwʉrʉra urumʉ̃rʉãbʉta, nedʉwʉrʉra erbari wãbʉta, nedʉwʉrʉra awãbʉta, bia ẽ bʉ maʉ̃ra oda k’area». 8 Mamina, Noéra Jeowaba bia akʉbasi. 9 Naʉ̃ra Noé nebʉra. Noéra ẽbẽra biabasi. Iyira k’ẽrẽpabasi ẽbẽra iyi ewaridebemane. Iyira Daizeze wãrĩnumebasi. 10 Maʉ̃ tẽã Noéra wũãwũã ũbea barasi: Sem, Cam, Jafet. 11 Kõbebʉrʉ, Daizezebara ũdusi naʉ̃ drʉara jipa ãrĩbʉta akʉza mejãcha yõba birasita. 12 Mawũã ũdusi, naʉ̃ drʉara jipa ãrĩbasita. Jõma naʉ̃ drʉadepanʉra ẽbẽrarãbara jipa mitiata opanasi. 13 Mõbe Daizezeba jarasi Noé’a: «Mʉ̃ara jõma jõbiyi zok’aipanʉrãra, naʉ̃ drʉara nemitiaba birasi baera, ẽbẽraba mawũã obʉ baera. Maʉ̃ k’area mʉ̃ara jõma makenañi ãyira adewara imañi drʉara. 14 Ora bʉita jãba zromata bakuru biaba, ora korra zakerata bʉita akʉza nedʉwʉrʉraita, adewara zoara breaba ewarade akʉza eda. 15 Mawũã ora: drasoara b’aibarabasi 133 metros, 22 metros joubʉa b’aibarabasi akʉza 13 metros ʉ̃ta yi zroma b’aibarabasi; 16 jãbara kʉda ũbea chuaibarabasi, kʉda aba, kʉda ũme akʉza kʉda ũbea; adewara 44.5 sentimetros bentanata oibarabasi jãba buru edre, mawũã ʉ̃na bamarẽã adewara jãba zromanera puerta aba b’aibarabasi. 17 »Mʉ̃ara kue zromata weyi mawũã doba birayi jõma naʉ̃ drʉara, adewara jõma makenañi bajã edre zok’aibʉta. Jõma naʉ̃ drʉadebʉra makiniñi. 18 Jeowabara jarasi Noéa bedʼea abarika zeibarata mʉ̃ta bʉme, jãba zromanera eda wãra bʉta bʉ wũãwũãrabawara bʉ kimata akʉza bʉ wũãwũãra kimata. 19 Jõma nedʉwʉrʉta eda bʉera kĩrã bio awuara awuaraka akʉza yuwẽrãta yumakẽrãta ũme ũmeka zokʼai erbaita jãba zromane eda. 20 Nedʉwʉrʉra ʉ̃tʉ wãbaribʉta ũme ũmeka mamaʉ̃ba zedata, nedʉwʉrʉra urumʉ̃rʉabʉta ũme ũmeka mamaʉ̃ba zedata, nedʉwʉrʉra erbari wãbʉta ũme ũmeka mamaʉ̃ba zedata, jãba zromane eda bʉera zokʼai panamarẽã. 21 Bʉara jʉrʉibara yikota bʉita akʉza nedʉwʉrʉraita». 22 Aramaʉ̃ta Noébara ojʉ̃drʉsi Daizezeba zokʼada kĩrãkʼa. Mawũã aripe osi.