Éxodo
10 Wũãwũã wariside, paraon kau’a diasida, iyira yi wũãwũã ba zesi. Iyara trʉ̃gasi Moisés mõbe jarasi: «Mʉ̃a do edaʉba jira edasi baera». 11 Maʉ̃ berabarida tẽã, Moisés ma warichubidade, akʉ wãsi yi mebẽrãra ebreorata nezʉgʉa ataʉbipanʉta akʉita, iya mama ũdusi egipsio abaʉba ãyidebemata po jirbʉta. 12 Aramaʉ̃ta iya dakitabʉrʉde miõta ũdu ẽ baera, beasi egipsiora mõbe merasi ibʉde. 13 Maʉ̃ nrʉema iyi ãĩ wãbʉrʉde ũdusi ebreora ũme yõbarabʉta. Maʉ̃ k’area iya jarasi yi yõ jʉrʉbʉa: «¿K’ãrẽa pobʉ bʉ neũduk’awuara?». 14 Iya panʉsi: «¿Bʉra k’aiba nok’o babisi akʉza juez babisi dai ʉ̃rʉ? ¿Bʉara egipsio beada kĩrãk’a mʉ̃sida beaita krĩchabʉka?». Aramaʉ̃ta Moisés’ra pera k’ãrãpe krĩchasi: «Mʉ̃a odara k’awuasida». 15 Paraonba k’awuaside beakĩrãsi Moisés’ra. Maʉ̃ k’area iyira mirʉ wãsi paraoneba Madián drʉa eda bade. Mama jʉ̃ẽbʉrʉde jewedasi pozo k’awa. 16 Saserdote Madiánbara kaurata 7 erbasi. Maʉ̃ra zesida bania juede akʉza yi zeze nedʉwʉrʉra bania dobarita birapanasi. 17 Maʉ̃ne zesida obeja akʉbarirata, ãya ozebʉrʉ kĩrãk’a mamaʉ̃ba jʉretasida. Moisésba maʉ̃ ũdubʉrʉde iyira piradrʉsi maʉ̃ra wẽrãrãra k’arebaita mawũã ãyi nedʉwʉrʉ idu bania dobisi. 18 Ãyi jẽda jʉ̃ẽside ãyi zeze Reuel deda, iya widisi: «¿Marara k’ãrẽa mesera deda zebʉda?». 19 Ãyara panʉsi: «Egipsio abaʉba k’arebasi daira obeja akʉbariraneba. Adewara bania k’areba jue dia k’ãrãpe, nedʉwʉrʉrasida bania dawuasi». 20 Aramaʉ̃ta iya jarasi yi kaura: «¿Samachu maʉ̃ra? ¿K’ãrẽa maʉ̃inʉ amaesi marabara? Jarada zemarẽã dayirãbawara nekoita». 21 Maʉ̃ tẽã Moisés’ra maʉ̃ yumakẽrã deda besi akʉza iyara yi kau Ziporáta juwa diasi yi kima bamarẽã. 22 Mawũã berabarida tẽã, yi kimara wũãwũã aba tosi, maʉ̃ta Moisésba trʉ̃gasi Guersom iya jarasi baera: «Mʉ̃ra jãpeba zedata yãrã drʉadebida baera». 23 Ewari mejãcha berabarida tẽã Egiptodebema nok’ora beisi. Mawũãsidu israelitarãra mejãcha zʉbʉriabasi wuabema nezok’a baera. Ãyi zʉbʉria bed’eapanʉra Daizeze wãrĩnuaraba ũrĩsi. 24 Maʉ̃ tẽã ãyi zʉbʉria bed’eapanʉta ũrĩ k’ãrãpe kĩrãbesi Abrahán, Isaac akʉza Jacob’ʉ̃me bed’ea abarika zedata. 25 Daizezebara israelitarata akʉsi akʉza krĩchasi ãyi ʉ̃rʉ.