2 Timoteo

3 K’awuaidua naʉ̃ta, ewari jõbodoarera ũdu wãnañi bed’ea zroma daya obe ẽãta. 2 Ẽbẽrarãbara ãyitrʉ audre kãgadayi, plata audre jʉrʉita kãgadayi, ãyabʉrʉ audre k’awuabʉta wuabemaraira, sewa nebʉrʉmiabayi, adewara yibarira bed’ea ũrĩna ẽ bayi, bayi biga diada ẽãta, k’ẽrẽpabada ẽ bayi, 3 kãga ũdubida ẽ bayi, bed’ea abarika zeda ẽ bayi, awuru ʉ̃rʉ sewa nebʉrʉta jaradayi, ãyi kakua zok’a k’awua ẽ bayi, mia beamiabayi, sobia neẽbayi, 4 bayi ariya sewabʉta, ũrĩkĩrã ẽãbʉta, bayi krĩchabʉta ãyide ʉ̃tabʉra neẽãta, bayi ãya okĩrã obʼaita Daizeze kãgai kaude, 5 bayi Daizeze ĩjãbʉ abʉde aripe oẽãta. Mawũã bʉdebara ãĩ wãibara. 10 Mamina bʉa bia kʼawuabʉ mʉ̃a jaradiabʉta, mʉ̃ sãwũã bʉta, mʉ̃a kʼãrẽta okĩrãbʉta, mʉ̃a ĩjãbʉta, mʉ̃a jʉ̃ã kʼawuabʉta, mʉ̃ kãgata akʉza mʉ̃a awuantabʉta, 11 akʉza bʉa kʼawuabʉ mʉ̃ pẽwãnata akʉza mʉ̃ zʉbʉriadata, Antioquía, Iconio akʉza Listrade berabarida kĩrãkʼa. Mʉ̃a naʉ̃ra jõma awuantasi akʉza ewari jõma Daizezeba kʼarebasi. 12 Yi ẽbẽra jõma Jesukristo bed’ea ĩjãkĩrãbʉra, pẽwãnaña abʉ. 13 Mamina ẽbẽra kayiruarãra akʉza yi awuruta sewabʉrãra audre mitia wãñi; sewadayi wuabemarata akʉza yi sewabidayi. 14 Bʉa owãra, bʉa k’awua wãta akʉza bʉa wãrĩnu ĩjãnata, k’awuabʉ k’airaba jaradiasidata, 15 wiñayiruiduba k’awua warisi Daizeze Bed’eade jarabʉta, maʉ̃ba buru bia baseabʉ ẽdrʉita iya ĩjabʉdeba Kristo Jesu ʉ̃rʉ. 16 Daizezeba jõma bʉbisi iyi bedʼeara jõma maʉ̃ra biga jaradiaita, kayirua obʉ kʼẽãita akʉza ãña obe jipa oita, kʼẽrẽpa jipa bamarẽã, 17 ẽbẽra Daizeze odebʉba audre bi’ia odamarẽã, mawũã bia k’awuamarẽã k’ãrẽ nebia oita.