Lucas

1 Mejãchabʉ yi naʉ̃ ʉ̃rʉ arare arare jara ũrĩbipanʉra, dayirãba maʉ̃ta ĩjãpanʉ. 2 Ãyara ãyi dabʉba ũdudata jara ũrĩbisida akʉza ãyabida jaradiapanasi. 3 Maʉ̃ba mʉ̃abida, jõma kĩrãkita akʉbʉrʉ baera sãwũã jʉ̃drʉdata, mʉ̃a krĩchasi kʼawũã daucha bʉita, bʉita Teófilo, 4 bʉa biʼia kʼawuamarẽã bʉaʼa jaradiadapeadara jipa wãrĩnuta. 5 Judeade basi nokʼota maʉ̃ trʉ̃ra Herodes basi, iyi ewaride basi saserdoteta, maʉ̃ra Zacarías basi, Abías mebẽrãnebema basi. Yi kimara zesi Aarónʼneba yi trʉ̃ra Elizabet basi. 6 Daizeze nããra ãyira kʼẽrẽpa panasi, jõma daucha opanasi Daizezeba zokʼabʉra akʉza Jeowaba widibʉra opanasi. 7 Ãyira wũãwũã neẽbasi Elizabetʼra tobe ẽ basi baera, ãyira aukʼara zõrãrã basi baera. 8 Zacaríasra saserdote basi baera iyi trajabari ewaride iyiʉ̃me panʉrabawara Daizeze deda wãnaibarabasi. 9 ãyi saserdoteraba opanʉ oita iyira santuarioidu eda waĩbarabasi Jeowaita insienso baita. 10 Insienso babʉe bʉedara ẽbẽrarã ewarade badarãra yiwidʼipanasi. 11 Maʉ̃ne ʉ̃tʉ deguesi Jeowa angelta. Edaʉnʉmasi juwarare altar insienso mae. 12 Maʉ̃ ũdubʉrʉde, Zacaríasra mejãcha perasi jipa. 13 Mamina angelba jarasi: «Perarãra Zacarías, bʉa wididara ũrĩsi baera. Bʉ kima Elizabetʼra toyi, iyira trʉ̃gara Juan. 14 Bʉra arigʉ sobia bayi akʉza bioʉta sobiadayi iyi toi kʼarea, 15 iyira yi zroma bayi Jeowa nããra. Iyara binora do ẽ bayi akʉza wuabemara ituasida, bita eda bʉeda jaure biata mejãcha erbayi. 16 Akʉza iyara oyi israelitarata Jeowama jẽda zemarẽã. 17 Adewara iyira nãã owãñi Daizezeba zokʼadata Elíasba sobiade akʉza sokea obada kĩrãkʼa, yibarira so teiteabʉra wũãwũãra so soborekea bida bari kĩrãkʼa bamarẽã, ũrĩamapanʉrata buru bia bamarẽã yi kẽrẽpapanʉra kĩrakʼa, mawũã pʉwʉrʉ daucha erbaita Jeowaita». 18 Zacaríasba angelʼa jarasi: «¿Sãwũã ĩjãi mʉ̃a, zõrã mʉ̃ra, mʉ̃ kimasida jipa yõdra basi». 19 Angelba panʉsi: «Mʉ̃ra Gabriel, mʉ̃ra Daizeze kʼawabʉ mʉ̃ra zokʼasida bʉme bedʼeaita, naʉ̃ bedʼea bia jaraita. 20 Mamina bʉra bedʼea beẽ beyi maʉ̃ jõma berabariyeda, bʉa ĩjã ẽbasi baera wãrĩnu berabarita mʉ̃a bʉa jarakʉ bedʼeara». 21 Maʉ̃ena pʉwʉrʉbara jʉ̃ãpanasi zacaríasta, maʉ̃ kʼarea ãyirai widipanasi kʼãrẽa ze ẽ nʉminata Zacaríasra santuariodebara. 22 Iyi ãĩ zesidera bedʼea beẽ basi, maʉ̃ba kʼawuasida iya santuariodera daya ũdukata ũdusita. Iyara juwaba jarabasi mamina bedʼea zeẽ basi. 23 Templode trajada tẽã, iyira deda wãsi. 24 Maʉ̃ tẽã Elizabetʼra biogo besi iyira jedeko juesoma bayeda dedaʉba ãĩ wã ẽ basi. Jarabasi: 25 «Naʉ̃ta osi Jeowaba mʉ̃bari, Jeowaba mʉ̃ra akʉsi mawũã ẽdrʉbita mʉ̃ zʉbʉriabadadeba». 26 Iyi seis jedeko babʉrʉde biogobʉta Daizezeba angel Gabrielta zokʼabʉesi Galilea eda pʉwʉrʉ Nazaretʼidu jʉ̃ẽmarẽã 27 akʉ wãmarẽã wẽrã yi zake Joséʉ̃me juwa jidaitabʉta, maʉ̃ra David dedabema basi. Wẽrã yi zake trʉ̃ra María basi. 28 Angelba eda jʉ̃ẽ kʼãrãpe jarasi: «Ka, Daizezeitara bʉra ẽbẽra wẽrã bia, Jeowara bʉmebʉ». 29 Iya maʉ̃ bedʼeara ũrĩ ẽ basi baera krĩcha ototosi kʼawuai kʼarea kʼãrẽta jarakĩrãkʉta maʉ̃ba. 30 Mawũẽ angelba jarasi: «Perãrara María, Daizezeitara kẽrẽpa bʉ baera bʉra. 31 Bʉra biogobeya, yumakẽrãta toyi, bʉara trʉ̃gara iyira Jesús. 32 Iyira yi zroma bayi akʉza Daizeze Warra adayi. Jeowaba iyaꞌa diayi iyi zeze Davidʼba zokʼabadata, 33 iyara ewari jõmaʉ̃nẽ zokʼayi Jacob deta. Akʉza iya zok’abʉra jõkabayi». 34 Mamina, Maríaba angelʼa widisi: «¿Sãwũã mawũãra, mʉ̃ra mia abaʉ yumakẽrãta erkaika?». 35 Angelba panʉsi: «Bʉ ʉ̃rʉ zeyi jaure zareata, mawũẽra Jõmaʉ̃ ʉ̃rʉ yi Zromaba, oyi iyi jaureba anamarẽã bʉta. Maʉ̃ kʼarea bʉa toira jarapanañi neneẽãbʉta, Daizeze Warrata. 36 Akʉra, bʉ mebẽrãnebema Elisabetsida biogobʉa, yõdrabasimina iyi toka apananata jedeko seis ba biogobʉta, 37 Daizezeba jõma jaradara aripe berabaribʉ». 38 Mawũẽra Maríaba jarasi: «Namabʉ Jeowa nezokʼara, mʉ̃ne bʉa jarada kĩrãkʼa aripe berabaribira maʉ̃ra». Aramaʉ̃ta angelʼra wãsi iyimaebara. 39 Maʉ̃ tẽã jʉneã Maríara ode wãsi mesera bai katumara Judáde bʉma, 40 mõbe Zacarías deda eda wãsi, mõbe kʉa asi Elisabetʼa. 41 Elizabetba María bedʼea ũrĩside, iyi wũãwũãra pira piranʉma kʼawuasi. Aramaʉ̃ta Elisabet ʉ̃rʉ deguesi jaure zareata 42 mõbe nemi jĩgʉa jarasi: «Jeowaba bʉa nebiata diabʉrʉa wuabema wẽrãraira akʉza bʉ wũãwũãbida nebiata diabʉrʉ. 43 ¿Kõbe, kʼaipe mʉ̃ra kʼawũã mʉ̃ Nokʼo papaba akʉde zebʉrʉra? 44 María bʉ bedʼea degueba ũrĩbʉrʉde mʉ̃ wũãwũãra pira piranʉmʉ kʼawuasi. 45 Sobiara, bʉa ĩjãsi baera, Jeowaba jaradara jõma aripe berabariyi». 46 Mõbe Maríaba jarasi: «Mʉ̃ara ibia bedʼeanʉmʉ Jeowa ʉ̃rʉ, 47 mʉ̃ra sãwũã sobia ẽ baipe Daizeze mʉ̃ Ẽdrʉbibari kʼareara, 48 iya akʉsi baera iyi nezokʼa kʼãrẽ neẽãbʉta. Mamina idiba ʉ̃ta jõmaʉ̃ba jaradayi mʉ̃ra sobiabʉta. 49 Daizeze Zarea barabʉba mʉ̃a nebia diazebʉrʉ, iyi trʉ̃ra neneẽãbʉ. 50 Ẽbẽra jõma iya wawia ũdubibʉra so zʉbʉriata ũdubizebʉrʉ ewari jomaʉ̃nẽ. 51 Iyara iyi juwaba kʼãrẽ ozebʉrʉ akʉza Iyara jĩga wãbibʉ ẽbẽra kayiruarara. 52 Iya yi zromarara baebibʉ waya wika berara yi zroma babibʉ, 53 iya jarraberara mejãcha yiko diabʉ, kõbe yi nekʼãrẽ mejãcha erbʉrara juwaba wãbibʉ. 54 Kʼarebazebʉrʉ Israelra akʉza ewari jõmaʉ̃nẽ so zʉbʉria ũdubibʉ 55 Abrahánʼa akʉza iyideba zebʉrʉraʼa iya jarada kĩrãkʼa mawũã oyi ewari jõmaʉ̃nẽ». 56 Maríara iyiʉ̃me basi jedeko ũbea bayeda maʉ̃ tẽã jẽda wãsi. 57 Maʉ̃ tẽã jʉneã Elisabet toi ewarita zesi, iyara tosi yumakẽrãta. 58 Yi mebẽrãba akʉza iyi kʼawa panʉraba kʼawuasidade Jeowaba so zʉbʉria akʉsita maʉ̃ba mejãchade sobiasida. 59 Ewari ocho babʉrʉde sirkunsidasida wũãwũãra, Zacarías trʉ̃gadaibasi yi zeze kĩrãkʼa. 60 Mamina yi papaba jarasi: «Maʉ̃ ẽ bayi, Juan bayi iyi trʉ̃ra». 61 «Bʉ mebẽrãnera neẽ mia abaʉta wũãwũã trʉ̃gabʉra». 62 Aramaʉ̃ta yi zezeʼa widisida juwaba kasea trʉ̃gaita yi wũãwũãra. 63 Iyara tabla zaketa widisi, maʉ̃ne bʉsi: «Iyi trʉ̃ra Juan bayi». Maʉ̃ba jõmaʉ̃ta yiya akʉsida. 64 Audre ẽãde bedʼeaseatotosi iyira, iyi kiramera wua kara ẽ basi, aramaʉ̃ta bedʼea jʉ̃drʉsi ibia Daizeze ʉ̃rʉ. 65 Ãyi kʼawabemarara kĩrãmĩgasida maʉ̃ kʼarea mejãcha, Judea katumaranera maʉ̃ ʉ̃rʉ bedʼea jʉ̃drʉsida. 66 Naʉ̃ ʉ̃rʉ ũrĩnarabara naʉ̃ra ãyi soidu zebasi, maʉ̃ba jarapanasi: «¿Kʼãrẽba zei naʉ̃ wũãwũãra?». Ũdupanʉ baera iyira Jeowa juwade bʉta. 67 Mawũẽra yi zeze Zacarías ʉ̃rʉ zesi jaure zareata iya naʉ̃ propesiata jarasi: 68 «Jeowa ʉ̃rʉ ibia bedʼeaibara, Israel Daizeze, iya iyi pʉwʉrʉta so zʉbʉria akʉbʉrʉa akʉza ẽdrʉbibʉrʉa. 69 Iyara jidasi dayirã ẽdrʉbibarita, maʉ̃ra David dedabema 70 naʉ̃ra yi jaramabasi iyi propeta nããbemaraneba, 71 ẽdrʉbita dayirã nejʉradeba akʉza ãyi juwadeba, 72 akʉza so zʉbʉria ũdubita zõrãrã dayirã nawedaʉbemaneba kĩrãbeita iyi bedʼea abarikʼa zedata, 73 Iya kʼãrẽ oyadata dayirã yibari Abrahán 74 mawũã dayirã nejʉradeba ẽdrʉbi kʼãrãpe mawũatrʉ odaita jõma Daizezeba jarabʉta perã ẽã 75 akʉza kʼẽrẽpa dayirã zokʼaibʉeda. 76 Kõbe wũãwũã bʉra, Daizeze propeta bayi, bʉra Jeowa nãã wãñi iyi ora daucha oita, 77 jaradiaita iyi pʉwʉrʉra ẽdrʉseabʉta ãya kayirua obʉta jẽda krĩchabʉbʉrʉ 78 Daizezebara mejãcha so zʉbʉria ũdubibʉ, maʉ̃ kʼãrẽa ʉ̃tʉba zeyi ũnata dayirãma 79 maʉba ũnabiyi yi pãrĩguade jewedabeta akʉza beudarasida mawũã edeita dayirãra o neneẽãbʉde». 80 Wũãwũãra warisi mõbe buru bia basi, drʉa ibʉawabʉmae basi Israel pʉwʉrʉʼa yi ũdubi naa.