Mateo

17 Ewari aba Piesta Pan Ne Oreguea Neẽã k’obadadebemane, Jesu kʼaidubemarabara Jesuʼa widide zesida: «¿Bʉara sama ara omarẽã kãgabʉ Paskuara?». 18 Iya panʉsi: «Wãidua pʉwʉrʉ zromaena, mõbe jʉrʉidua Fulanota mõbe jaraidua: Nejaradiabariba jarabʉ: «Mʉ̃ ewarira arakʼaitaba. Mʉ̃a mʉ̃ kʼaidubemarabawaraʉba bʉ deda piesta paskuata oyi». 19 Jesu kʼaidubemarabara osida Jesuba jarada kĩrãkʼa akʉza jõma ara osida Paskua oita. 20 Kiside, iyira jewedabasi iyi kʼaidu 12 panʉrabawara. 21 Ãyi nekobʉeda jarasi: «Mʉ̃a mara jaraya, maranebema abaʉta mʉ̃ ʉ̃rʉbayi». 22 Maʉ̃ ũrĩbʉrʉde iyi kʼaidubemarãra sobia ẽãtotosida akʉza jõmaʉ̃ba jarabʉzawasida: «Nokʼo, ¿mʉ̃ ẽ bʉmabida?». 23 Iya panʉsi: «Mʉ̃me abaʉ epedekode nekobʉrʉta, mʉ̃ ʉ̃rʉbayi. 24 Wãrĩnu Yumakẽrã Warrara wãña, abarika iyi ʉ̃rʉ bʉda kĩrãkʼa. Mamina zʉbʉriare, yi Yumakẽrã Warra ʉ̃rʉbʉra, biabakasi toda ẽ basibʉrʉ». 25 Judas iyi ʉ̃rʉ wãbodoba widisi: «Nejaradiabari, ¿mʉ̃ ẽ bʉmabida?». Jesuba panʉsi: «Mawũã, bʉa jarabʉrʉ». 26 Nekobʉeda Jesuba jidasi panta, yiwidʼida tẽã, bʉekʉa kʼãrãpe diakʉasi iyi kʼaidupanʉra akʉza jarasi: «Jidaidua, koidua. Naʉ̃bara jarakĩrãbʉ mʉ̃ kakuata». 27 Akʉza jidasi tazata, biga diasi Daizezeʼa, adewara ãyaʼa diasi naʉ̃ bedʼea jarabʉde:«Doidua maʉ̃nebemata mara jõmaʉ̃ba, 28 naʉ̃ba jarakĩrãbʉ baera mʉ̃ wata, naʉ̃ wara bedʼea abarika zeidebema, maʉ̃ra zarrayi ẽbẽrarã mejãchaʉta kʼarebamarẽã, mawũã ãyi nekayirua kĩrãduaita. 29 Mamina mʉ̃a mara jaraya, wua do ẽ bayi uba bara, marabawaraʉba bino yiwidi do zeyeda mʉ̃ Zeze Nokʼomae». 30 Jõita trãsida, maʉ̃ oda tẽã wãsida katuma Olivos eda. 31 Aramaʉ̃ta Jesuba jarasi: «Idi diamasi mara jõmaʉ̃ba mʉ̃ra amaenaña, yi bʉma baera: ‹Podayi yi obeja akʉbarita maʉ̃ba obejarãra jãrãzoadayi›. 32 Mamina mʉ̃ jẽda piradrʉda tẽã mara nãã wãñi mʉ̃ra Galilea o wãbari eda». 33 Pedroba panʉsi: «Wuabemara jõmaʉ̃ba bʉ amaebʉrʉbʉsida, mʉ̃a bʉra jipa amae ẽ bayi». 34 Jesuba jarasi: «Mʉ̃a bʉa jarayi idi diamasi gayo berui naweda, ũbeabayeda jarayi bʉa mʉ̃ra ũduaduata». 35 Pedroba jarasi: «Mʉ̃ra bʉme beibarabʉsida, mʉ̃ara jipa jara ẽ bayi bʉ ũduaduara». Akʉza iyi kʼaidubemara jõmaʉ̃ba abarika jarasida. 36 Tẽã Jesura ãyibawara wãsi Getsemaníma mõbe jarasi: «Nama jewedaidua mʉ̃ jaridu wãñiena yiwidʼide». 37 Aramaʉ̃ta Pedrota akʉza Zebedeo warrara ũmebʉta edesi. Mõbe mejãcha sopʉa besi adewara krĩcha zroma obesi. 38 Iya jarasi: «Mʉ̃ra mejãcha krĩcha zroma obʉba bei kĩrãkʼabʉ. Nama panaidua akʉza mʉ̃ kĩrãkʼa ʉrʉma bʼaidua». 39 Maʉ̃ tẽã ãyideba wiña jĩgara wãsi, sãkokode kʉbepe kʼãwũã yiwidʼisi: «Mʉ̃ Zeze, bʉma bigabʉrʉ zʉbʉriabirãra. Mamina mʉ̃a kãgabʉta oamabʉ awuarabʉrʉ bʉa kãgabʉta okĩrãbʉ». 40 Maʉ̃ tẽã jʉ̃ẽsi iyi kʼaidupanʉrainʉ, maʉ̃ne kʼãĩpanʉta ũdu jʉ̃ẽsi mõbe widisi Pedroʼa: «¿Marara mia ora abapaibida ʉrʉmapana ẽ basika? 41 Ʉrʉmapanaidua akʉza badua yiwidʼipanaidua mawũã kayiruade baebibari krĩchade baeda ẽ baita. Marabara nebiata okĩrãbʉmina kakuabara obe ẽã». 42 Akʉza yi ũmeta jẽda wãsi mõbe kʼãwũã yiwidʼisi: «Bʉita biga ẽ bʉrʉ mʉ̃ta zʉbʉria ẽ baita, aribaebira bʉa kãgabʉta». 43 Akʉza jẽda jʉ̃ẽbʉrʉdera kʼãĩnʉmʉta ũdu jʉ̃ẽsi mejãcha dapeapanasi baera. 44 Mawũã ãyi amae kʼãrãpe akʉza wãsi yiwidʼide yi ũbeata. Nãã jarada kĩrãkʼa jarasi 45 Aramaʉ̃ta iyi kʼaidupanʉrainʉ jʉ̃ẽ kʼãrãpe mõbe jarasi: «Marara kʼãĩnʉmʉ akʉza enaʉ̃nʉmʉ naʉ̃ ewari kʼãwũãnʉmʉne. Akʉidua ũmadaʉ arabasi Yumakẽrã Warrara diadaita ẽbẽra kayiruara. 46 Piradrʉidua, wãdrʉ. Akʉidua jari uru mʉ̃ ʉ̃rʉbʉra». 47 Maʉ̃ne iyi wabida bedʼeanʉmʉena zesi Judasta, iyira 12debema, iyi kʼaidu ẽbẽrarã mejãcha zesi kuchoeda akʉza bakurueda, maʉ̃ra zokʼa bʉesi saserdote nokʼoraba akʉza zõrãrã pʉwʉrʉdebemaba. 48 Maʉ̃ne iyi ʉ̃rʉbʉba jarasi kʼãrẽ oita: «Mʉ̃a ñegabʉrʉta iyi; jidaidua». 49 Mawũẽra Jesuidu wã kʼãrãpe jarasi: «Kua, Nejaradiabari» mõbe ñegasi. 50 Mamina Jesuba widisi: «Mõbe, ¿kʼãrẽta obʉ bʉra namara?». Aramaʉ̃ta Jesuta orrasida mõbe jidasida. 51 Maʉ̃ne Jesu kʼawabʉ abaʉba kucho jirada kʼãrãpe sumo saserdote nezokʼa kʉwʉrʉta ʉrawetasi. 52 Jesuba aramaʉ̃ta jarasi: «Wuagara bʉ kuchora, jõma yi kucho zokʼabʉra kuchoba beiyi. 53 ¿Bʉara ĩjã ẽka mʉ̃a mʉ̃ Zezeʼa widiseabʉta mʉ̃ita angelera mejãcha zokʼamarẽã? 54 Mamina mʉ̃a maʉ̃ta ora, ¿sãwũã aripe berabari Bedʼea maʉ̃ta berabarita jaradara?». 55 Maʉ̃ne Jesuba jarasi ẽbẽrarã: «¿Marara kuchoeda zesi ẽka akʉza bakurueda mʉ̃ta jidadaita nezrʉgamia kĩrãkʼa? Mʉ̃ra ewariza jewedabasi templode nejaradiaita mamina maʉ̃nera mʉ̃ra jidada ẽ basi. 56 Naʉ̃ kʼãwũã berabaribʉrʉ propetaraba bʉdata aripe berabarimarẽã». Aramaʉ̃ta jõma iyi kʼaidubemaraba amaena kʼãrãpe wãsida.