Génesis
3 Israelbara mejãcha kãgabasi Joséra, iyi warrara wuabemaira iyi zõnabai wũãwũã barasi baera, maʉ̃ k’area wua biata ozok’asi. 4 Yi mebẽrãba ũduside yi zezeba José mejãcha kãgabʉta ãyira, mawũã jʉra jʉ̃drʉsida. Maʉ̃ k’area ibiade bed’eada ẽ basi. 5 Ewari aba Joséra k’ãĩmok’ãrãsi maʉ̃ta yi mebẽrã’a jarasi, maʉ̃ba ãyara audre jʉrasi. 6 Iya jarasi: «Mʉ̃ bia oda k’ãrãpe ũrĩdua mʉ̃a k’ãĩmok’ãrãdata. 7 Ãba tajʉ̃panasi netata mea, mʉ̃ neta tajʉ̃badata piradrʉsi. Maʉ̃ tẽã maraba neta tajʉ̃nara mʉ̃ neta tajʉ̃na audu zesida mõbe maʉ̃ nãã sãkokode besida». 8 Yi mebẽrãba jarasida: «¿Bʉra dai nok’o b’aika akʉza bʉa zok’aika daira?» Mawũã José k’ãĩmok’ãrãdaba akʉza iya jaradaba audre jʉrabisi. 9 Maʉ̃ tẽã akʉza Joséra k’ãĩmok’ãrãsi maʉ̃ta jarasi yi mebẽrã’a. Iya jarasi: «Mʉ̃ra akʉza k’ãĩmok’ãrãsi. Mʉ̃a ũdusi ũmadaʉta, jedekota akʉza chĩdaura 11 panʉta mʉ̃ nãã sãkokode besidata». 10 Nebʉrasi yi zeze’a akʉza yi mebẽrã’a. Aramaʉ̃ta yi zezeba kẽãbeasi: «¿Bʉ k’ãĩmok’ãrãbara k’ãrẽta jarakĩrãkʉ? ¿Wãrĩnu bʉ papata, bʉ mebẽrãta akʉza mʉ̃ta bʉ nãã sãkokode kʉba zeika? 11 Yi mebẽrãbara jʉrasida Joséra, mamina yi zezebara krĩchabasi iya bed’ea jarada ʉ̃rʉ. 21 Rubénba maʉ̃ ũrĩside ãyideba ẽdrʉkĩrãbasi. Jarasi: «Bea ẽ badrʉ». 22 Akʉza Rubénba jarasi: «Wa zarrabiraidua. Awuarabʉrʉ ibalbʉeidua jari drʉa drʉdrʉ b’aikirude pozode eda, mamina neida oraidua». Iyara yi mebẽrãneba ẽdrʉbikĩrãbasi mawũã yi zezema eteita. 23 Mawũã, José zeside yi mebẽrãbara iya wua bia jʉ̃badara wẽãtasida. 24 Aramaʉ̃ta jidada k’ãrãpe pozode ibalbʉesida. Mamina pozodera bania neẽbasi; põasãbasi. 28 Madianitara nedomiara mama berabariside, José mebẽrãbara pozodeba ãĩ jira edasida mõbe nedosida ismaelitara 20 moneda platabari. Mawũẽra maʉ̃ra ẽbẽrabara Joséra edesida Egipto eda. 29 Mawũã berabarida tẽã, Rubén’ra pozoidu jʉ̃ẽsi, José iya mama ũdu ẽ baside kõẽtasi iya wua jʉ̃badara. 30 Maʉ̃ tẽã wãsi yi mebẽrã bʉidu mõbe jʉrasi: «Warrara neẽã, ¿k’ãwũãra mʉ̃ra k’ãrẽta oi?». 31 Aramaʉ̃ta jira edasida José wua biata, mõbe beasida chibota maʉ̃ba wua biara maʉ̃ waba joa edasida. 32 Maʉ̃ tẽã maʉ̃ wua biata zok’a bʉesida yi zezema mõbe jarasida: «Naʉ̃ta ũdusida. Akʉra naʉ̃ wua biara bʉ warrade k’awuaita».