Génesis
45 Joséba maʉ̃ ũrĩside, iyara wuara awuanta ẽ basi iya sentibʉra iyi nezok’ara nãã, mawũã jʉra jarasi: «Jõma namaʉ̃ba ãĩ jʉrekʉara». Maʉ̃ tẽã yi mebẽrã awa bidade Josébara jarasi k’aita iyira. 2 Aramaʉ̃ta mejãcha jʉra jẽgasi maʉ̃ta egipsioraba akʉza paraon dedabemaba ũrĩsida. 3 Mawũã berabarida tẽã Josébara jarasi yi mebẽrã: «Mʉ̃ra José. Mʉ̃ zezera, ¿zok’aibʉka?». Mamina yi mebẽrãbara k’ãrẽ panʉ ẽ basi, ãyira perasida baera. 4 Aramaʉ̃ta Joséba jarasi iyi mebẽrã’a: «Mʉ̃ bia oda k’ãrãpe mʉ̃ma zeidua». Mawũã ãyira k’awa zesi. Iya jarasi: «Mʉ̃ra mara mebẽã José, maraba Egipto’a nedo bʉeda. 5 Mamina zʉbʉriaraidua maraba mawũã nedo bʉeda k’area akʉza yiya jararaidua, Daizezeba mʉ̃ra k’ãwũã zok’asi baera mara nama zei naena wuabemara bebʉ k’arebaita. 6 Naʉ̃ba poaga ũme ba daira jarrababa zʉbʉriabʉta maʉ̃ drʉade akʉza waebʉ poaga juesoma ne u neẽ baera jʉrepeda ẽ baita. 7 Mʉ̃ra Daizezeba zok’abʉrʉ mara nama zei naena mara zok’ai erbaita akʉza ẽdrʉbita. 8 Mawũẽra, marabara mʉ̃ra nama zok’a ẽ basi awuarabʉrʉ Daizeze wãrĩnuaraba zok’asi. Mawũã paraon ũrãg’a diabari babisi akʉza jõma iyi dera mʉ̃ juwa edrebʉsi, adewara jõma Egipto drʉade nok’o babisi. 9 » Maʉ̃ba mesera wãidua mʉ̃ zezeidu mõbe jaraidua: Naʉ̃ta jarabʉ bʉ warra Joséba: «Daizezebara mʉ̃ra Egipto nok’o babibʉrʉa. Mesarabai zebira mʉ̃ chuidu. 10 Bayi drʉa Goséne, mʉ̃ k’awa. Bayi bʉta akʉza wũãwũãrata adewara bʉ wũãwũãra wũãwũãta, bʉ nedʉwʉrʉrata, bʉ pakarata akʉza bʉa jõma nek’ãrẽ nebia erbʉta. 11 Mʉ̃ara bʉara yiko mejãcha diayi mama, wabida poaga juesoma waebʉ baera jarraba taʉita. Maʉ̃ta oẽbʉrʉ, bʉta akʉza bʉ dedaberamata adewara nek’ãrẽ bia erbʉta jõma jõñi». 12 Maraba akʉza mʉ̃ mebẽã Benjamínba akʉseabʉ mayi dabʉba wãrĩnu mʉ̃ta mara bed’eanʉmʉta. 13 Marabara jõma nebʉraseabʉ mʉ̃ zeze’a mʉ̃ra Egiptode yi zroma babisidata adewara maraba jõma ũdudasida. Mesera wãidua, mõbe weidua mʉ̃ zezera». 14 Maʉ̃ tẽã bʉrasi yi mebẽã Benjamínta mõbe jẽgasi akʉza Benjamínsida jẽgasi yi mebẽã obʉrabʉde. 15 Adewara, Josébara yi mebẽrã jõma ñegakʉasi akʉza jẽgabʉde bʉrakʉasi ãyira. Maʉ̃ tẽã yi mebẽrãra iyiʉ̃me bed’easida.