Juan

1 Nawedaʉba Bedʼeara basi, Iyira basi Daizezeʉ̃me akʉza Iyira daizeze kĩrãkʼa basi. 2 Iyira nããra basi Daizezeʉ̃me. 3 Iyara kʼarebasi Daizezera nekʼãrẽ jõma parãita, Iyideba nekʼãrẽ jõmabʉra zesi. Jõma zesi iyideba 4 nekʼãrẽ pirabʉra, zokʼaipanamarẽã ũnata diasi ẽbẽrarã. 5 Iyira teinʉmʉ ũnakĩrãkʼa pãrĩguade, mõbe pãrĩguabara kiau ẽ. 7 Naʉ̃ ẽbẽrarã zesi wuabemara jaradiaita ʉ̃na ʉ̃rʉ, mawũã ẽbẽrarã kĩrã awuara awuarakaʉba iya jaradiabʉdeba ĩjãnamarẽã. 8 Mamina Juanꞌra maʉ̃ ʉ̃na ẽ basi awuarabʉrʉ wuabemara jaradiabasi iya maʉ̃ ʉ̃na ʉ̃rʉ. 9 Ʉ̃na wãrĩnʉaraba ʉ̃nabʉ badʉ ẽbẽrãta, maʉ̃ta zebodota bʉ naʉ̃ drʉaeda. 14 Maʉ̃ Bedʼeara yãrãba zesi akʉza dayirãne edabasi akʉza iyi nebiata ũdusi, maʉ̃ nebia yi wũãwũã abapaibʉa diai kĩrãkʼa yi zezeba. Akʉza Daizeze biaba so zʉbʉria akʉbarita ũdubisi akʉza wãrĩnuta. 19 Naʉ̃ bedʼeata jarasi Juanba judiorãba Jerusalénʼneba zokʼabʉesidade saserdoterata akʉza levitarata, naʉ̃ bedʼea widita: «¿kʼaipe bʉra?». 20 Iyara panʉamaẽbasi awuarabʉrʉ jarasi: «Mʉ̃ra kristo ẽ». 21 Akʉza widisida: Mawũẽra ¿Elíaska bʉra? Iya panʉsi: « Mawũã ẽ, maʉ̃ ẽ mʉra». ¿Propeta zeibadaka bʉra? Iya panʉsi: «Maʉ̃ ẽane». 22 Ãya jarasida: «¿Mõbera kʼaipe bʉra? Daiba jara ũrĩbita dai zokʼapeada. ¿kaiaʼa bʉpe bʉra mawũãra?». 23 Iya panʉsi: «Mʉ̃ra desiertode nemi jĩgua jʉrabʉ nemi, ara oidua Jeowa ora propeta Isaiasba jaradakĩrãkʼa». 24 Maʉ̃ra ẽbẽrarãra pariseoraba zokʼadabasi. 25 Ãya widisida: «Mia Kristo ẽ bʉrʉ mia Elias ẽ bʉrʉ mia propeta zeibada ẽ bʉrʉ. ¿kʼãrẽã buru kʼoebʉ?». 26 Juanba panʉsi: «Doeda buru kʼoebʉ mʉ̃ara. Marane edabʉ ẽbẽra aba maraba ũdukʼawuada ẽãta. 27 Mʉ̃ tẽã jʉ̃nea uruta iyi, mõbe mʉ̃ra kʼãrẽ ẽ iyi jĩrʉne jʉ̃barisi wẽãĩrã». 28 Naʉ̃ra berabarisi Betaniaʼne Jordán kĩrãre, Juanba buru kʼoebada mae. 29 Maʉ̃ nrʉema Juanba ũdusi Jesúsʼra iyima uruta aramaʉ̃ta jarasi: «Akʉidua Daizeze obeja zakera nekayirua ãĩ bʉebʉta naʉ̃ drʉadeba. 30 Kaʉ̃ mʉ̃a jarabadara mʉ̃ tẽã jʉ̃nea zeibasita yumakʼẽrãta, za nãã bʉsita, iyira mʉ̃ naã kikibari mõbe. 31 Mia mʉ̃aʼaraba ũdukʼabasi, naʉ̃ kʼarea buru kʼoe zʉbʉrʉ mʉ̃a marara: Israelba ũduʼkawuadamarẽa kʼaita iyira». 32 Adewara naʉ̃ta jarasi Juanbara: «Ũdusi mʉa jaure zareara bajãneba iyi ʉ̃rʉ deguesita paloma kĩrãkʼa. 33 Mʉabida ũdukʼawua ẽ basi, mamina yi doeda buru kʼoemarẽã jaradaba jarasi mʉ̃a: mama kʼawuaiba kʼaiba jaure zareaba buru kʼoebira Daizeze jaure zarea iyi ʉ̃rʉ zebʉrude. 34 Mʉ̃a ũduside, maʉ̃ta jaradiabasi mʉ̃a iyira Daizeze warrata». 35 Maʉ̃ nrʉema akʉza Juanʼra mama basi iyi kʼaidu panʉra ũmeʉ̃me, 36 Jesús berabari wãta ũduside iya jarasi: «¡Akʉidua Daizeze obeja zaketa!». 37 Iyi kʼaidu panʉraba maʉ̃ bedʼea ũriside, Jesús kʼaidu wãsida. 38 Jesúsba jẽda akʉsi iyi pẽwã taidata maʉ̃ kʼarea widisi: «¿Kʼãrẽbasi? Ãya panʉsida: «Rabí (maʉ̃bara jarakĩrãkʉ ‹nejaradiabari›), ¿samachu bʉra?». 39 Jarasi: «zeidua kʼawuaita samata». Mawũẽra iyi kʼaidu wãsida ũdusida iyi samabʉta akʉza iyiʉ̃me kiusida, maʉ̃nera ala 4 nʉmasibaibara. 40 Juan bedʼea ũrisidade ãyira Jesús kaidu wãsida, maʉ̃ra ũmenebemata aba Andrés Simón, Pedro mẽbẽa basi. 41 Iyara nãã jʉrʉ wãsi yi mẽbẽara Simónta, mõbe jarasi: «Daiba ũdusida Mesíasʼra» (maʉ̃ba jarakĩrãbʉ Kristo), 42 Mõbe Jesúsʼidu edesi. Jesúsba akʉside, jarasi: «Bʉra Simón Juan warra. Bʉ trʉ̃ra Cefasbayi» (maʉ̃ba jarakĩrãbʉ Pedro). 43 a 44 Felipera abarikʼa Andrés kĩrãkʼa akʉza Pedro kĩrãkʼa Betsaidadebemabasi. 45 Maʉ̃ta Felipeba ũdusi Natanaelta akʉza jarasi: «Daiba ũdusida jari Moisésba bʉdata iyi Leyde akʉza Propetaraba: Jesústa ũdusida José warra iyira, Nazaretdebema iyira». 46 Mamina Natanaelba widisi: «¿Nazaretdeba che?». Felipeba jarasi: «Wãna akʉde». 47 Jesúsba Natanael iyima uruta ũdubʉrʉde jarasi: «Naʉ̃ israelitara wãrĩnu kʼẽrẽpabʉ jipa». 48 Natanaelba widisi: «¿Sãwũã ũdukauchʉ bʉa mʉ̃aʼa?». Jesúsba panʉsi: «Felipeba trʉ̃i naweda iguera edrebʉta, mʉ̃a bʉra ũdusi». 49 Natanaelba panʉsi: «Rabí, bʉra Daizeze warra, Israel Nokʼo bʉra». 50 Jesúsba jarasi: «¿Mʉ̃ta ĩjãsika bʉa iguera edre mʉ̃a bʉta ũdusi baera?». Naʉ̃ne ʉ̃ta ũduyi bʉara. 51 Akʉza jarasi: «Mʉ̃a naʉ̃ta jarayi maraʼa, wãrĩnu ũduyi maraba bãja ewanʉmʉta, ũdudayi angelara ʉ̃ta wãpe eda zebʉta yumakẽrã warrama».