Mateo

2 Jesús toda tẽã Belén Judeade, Herodes nokʼo ewari baside, zesida Jerusalénʼna chĩdau ʉ̃rʉ ĩjãpanʉrata Orientedeba 2 ãya widisida: «¿Samachu Judio nokʼo todapeadara? Daibara ũdusida iyi chĩdaura Orientede maʉ̃ba zebʉda wawiapanʉta ũdubidaita». 3 Maʉ̃ ũrĩbʉrʉba, nokʼo Herodesra krĩcha zroma osi akʉza Jerusalénʼnebemarasida. 4 Aramaʉ̃ta nokʼobara jõma trʉ̃si saserdoterata akʉza nebʉbarirata, mõbe widisi sama todaibasita Kristora. 5 «Belénʼne Judeade, propetaba mawũã jarasi: 6 Belén Judádebema, bʉra mejãcha wĩñabʉ ẽ Judádeba zeira, bʉdeba zeyi nokʼora mʉ̃ pʉwʉrʉ Israel zokʼaira». 7 Herodesbara miõba kʼawua ẽ na trʉ̃bʉesi chĩdau ʉ̃rʉ ĩjãpanʉrara, mõbe widisi sõbeda ũdusidata chĩdauta. 8 Belénʼna wãmarẽã jarasi mõbe naʉ̃ta jarasi: «Wãidua jʉrʉda wũãwũãra badumae, ũdubʉdade jẽda zeidua mʉ̃abida iya ũdubita wawiabʉta». 9 Aramaʉ̃ta nokʼoʉ̃me bedʼeada tẽã wãsida ãyira. Aramaʉ̃ne ãyara ũdusida chĩdau Orientede ũdudata ãyi nãã wãta, maʉ̃ne jiraba wãsi Jesús bʉmae. 10 Ãya krĩdau ũdubʉdadera, mejãchade sobiasida jipa. 11 Ãyi eda wãbʉdadera, ũdusida wũãwũãra yi papaʉ̃me. Aramaʉ̃ta sãkokode kobepe ũdubisida wawia ũdubipanʉta, aramaʉ̃ta ãya nebia apanʉta ewasida, diasida orota, olíbanota akʉza mirrata. 12 Mamina Daizezeba ãya jarasi baera kʼãĩmokarade jẽda wã ẽ marẽã Herodesma, maʉ̃ba o jãpe wãsida ãyi drʉa eda. 13 Ãyi wãna tẽã Jeowa angelba kʼãĩmokarade jarasi Joséʼa: «Piradrʉra, mõbe bʉ kimara bʉ wũãwũãʉ̃me edera Egipto eda mamabara mʉ̃a kʼawua jarayeda, Herodesbara jʉrʉi baera wũãwũãra beaita». 14 Aramaʉ̃ta Joséra diamasi piradrʉ kʼãrãpe wũãwũãra edesi yi kimaʉ̃me Egipto drʉa eda, 15 mama panasi Herodes beuyeda. Mawũã aripe berabarisi Jeowaba iyi propetadeba jaradara: «Jarasi mʉ̃ warra Egiptodeba jʉ̃ãmarẽã ». 16 Herodesra krĩdau ʉ̃rʉ ĩjãpanʉraba sebasida baera mejãchade kĩrʉsi. Krĩdau ʉ̃rʉ ĩjãpanʉraba jaradadeba iyara juachasi ewari sõbebʉta wũãwũara, maʉ̃ kʼarea jarasi jõma makenanamarẽã poaga ũmebʉdeba eda Belénʼne akʉza maʉ̃ pʉwʉrʉ kʼaitabemarata. 17 Mawũã aripe berabarisi propeta Jeremíasba jaradata iya jarasi: 18 «Ramáne ũrĩsida jʉrabʉta, sopʉa jẽgabʉta mejãchade jipa, maʉ̃ra Raquel basi, jẽgabasi iyi wũãwũãra kʼarea ãyira neẽ basi baera, iyara idi jẽgabimarẽã jarabasi». 19 Herodes beiside, Jeowa angelba jarasi José Egiptodebʉde naʉ̃ta: 20 «Piradrʉra, wũãwuara edera yi papaʉ̃me Israel drʉa eda makinisida baera wũãwũã beakĩrãbadarara». 21 Aramaʉ̃ta iyita piradrʉ kʼãrãpe, edesi wũãwũãra yi kimaʉ̃me Israel drʉa eda. 22 Mamina iya ũrĩside Herodes warra Arquelaoba zokʼabʉta Judara, perasi mama wãira. Adewara kʼãĩmokarade Daizezeba jarasi baera jʉrakʼawuabamarẽã, maʉ̃ kʼarea wãsi iyira Galilea drʉa eda. 23 Aramaʉ̃ta Nazaretde baita wãsi iyira, mawũã aripe berabarisi properaba jaradara: «Iyira Nazareno trʉ̃gadayi».