Génesis

22 Maʉ̃ jõma berabarida tẽã Daizezebara k’awuakĩrãbasi Abrahánba k’ãrẽaba ĩjãbʉta. Jarasi: «Abrahán». Aramaʉ̃ta iya panʉsi: «Zachua mʉ̃ra». 2 Mõbe Daizezeba jarasi: «Mʉ̃ bia ok’ãrãpe jidara bʉ warrata, bʉ warra abapaibʉta, bʉa audre kãgabʉta, Isaacta, mõbe wãra drʉa Moria eda. Mama mʉ̃ita oprenda diaita katuma mʉ̃a jaraimae». 3 Mawũẽra Abrahán’ra diapeda piradrʉsi, jidasi iyi burruta mõbe trʉ̃si iyi nezok’a ũme iyi k’aidu kĩrãyu wãmarẽã akʉza yi warra Isaacta. Maʉ̃ tẽã tʉbʉta bʉasi oprenda diaita. Mõbe wãsi Daizezeba drʉa jaradama. 4 Ewari ũbea berabarida tẽã, Abrahán ochidau wuabʉrʉde jĩga ũdusi Daizezeba jarada drʉata. 5 Aramaʉ̃ta Abrahánbara jarasi iyi nezok’ara: «Nama jʉ̃ãidua burrubawaraʉba mʉ̃ta mʉ̃ wũãwũãʉ̃me wãñi Daizeze’a yiwid’ita. Maʉ̃ tẽã jẽda zeyi daira». 6 Abrahánbara tʉbʉta jira edasi oprenda diaita, maʉ̃ta yi warra Isaac atʉbisi. Kõbe iyara erbasi tʉbʉ pureata akʉza kuchota, mawũã wãsida ãyi ũme. 7 Aramaʉ̃ta Isaacba jarasi yi zeze’a: «Zeze». Yi zezeba panʉsi: «Jarada warra». Isaacba widisi: «Daya erbʉ tʉbʉ pureata akʉza tʉbʉta, mamina ¿samachu obeja oprendade diaira?». 8 Abrahánba panʉsi: «Warra Daizezeba diayi obejara oprendade diamarẽã». Mawũã wãsi ãyira. 9 Ãyira jʉ̃ẽsida Daizezeba Abrahán’a jarada drʉa eda. Mama iya osi altarta mõbe tʉbʉta ʉ̃rʉ kʉbʉsi. Maʉ̃ tẽã yi warra Isaacta jĩrʉma tajʉ̃ k’ãrãpe juwamabida tajʉ̃si maʉ̃are tʉbʉ ʉ̃rʉ kʉbʉsi, altarde. 10 Maʉ̃ tẽã Abrahánbara kucho zaketa jira edasi yi warra beaita. 11 Mamina Jeowa angelba ʉ̃tʉba trʉ̃si mõbe jarasi: «Abrahán» «Abrahán». Aramaʉ̃ta Abrahánba panʉsi: «Zachu mʉ̃ra». 12 Aramaʉ̃ta jarasi: «Tõbarirãra bʉ warrata, neida orara. Mʉ̃a idibʉrʉ k’awuabʉrʉ bʉa wãrĩnu wawiabʉta Daizezera akʉza k’ãrẽ bed’ea neẽã diaibasi baera bʉ warra abapaibʉta». 13 Abrahánba ochidau wua akʉbʉrʉde jĩga ũdusi karnerota yi kachu chiruade bʉranʉmʉta. Mawũẽra jida wãsi karnerota mawũã oprenda diasi yi warrabari. 14 Abrahánbara maʉ̃ drʉara trʉ̃gasi Jehová Yiré. Maʉ̃ k’area idibasidu jarapanʉ: «Jeowa katumanera diayi nek’ãrẽ nesidabʉta». 15 Akʉza Jeowa angelbara ʉ̃tʉba trʉ̃si Abrahánta 16 Mõbe jarasi: «Mʉ̃ k’area wãrĩnuta jarayi, mawũã jarabʉ Jeowaba, bʉa k’ãwũã oda k’area akʉza bʉ warra abapaibʉ diaibada k’area, 17 mʉ̃a wãrĩnu nebiata diayi, adewara jõma bʉdeba zebʉra chĩdau ʉ̃tʉbʉ kĩrãk’a eababiyi adewara ibʉ puza kidabʉ kĩrãk’a eababiyi. Akʉza bʉdeba zedarabara jõma jãrĩñi ãyi nejʉrara pʉwʉrʉra. 18 Bʉ wũãwũãraneba nebia ũdudayi pʉwʉrʉ naʉ̃ drʉadebʉra jõma, bʉa ũrĩsi baera mʉ̃ bed’eata».