11 Trajakĩrã

¿KʼÃRẼTA OIBARA?

Ẽbẽrarã trajakĩrãra pera ẽ trajaita. Awuarabʉrʉ masẽbʉ trajota neẽbʉrʉ, dobaʉba ũdubʉ nekʼãrẽ nesidabʉ erbaita akʉza wuabemara kʼarebaita, iya trajo obʉra wuabemaraba ũdu ẽ mina.

¿KʼÃRẼA YIBIA?

Daya jaradapeadara okĩrã oimina akʉza oama oimina oibara. Dayi trajakĩrã trajaira yibia, idi ewadera mejãchaʉta trajakĩrã ẽ baera. (Eclesiastés 3:13).

«Mʉ̃ mejãcha trajabʉdera sobiabʉ akʉza biabʉ. Maʉ̃ba trajakĩrã traja wã ewariza. Trajakĩrã trajabʉba dayi ʉ̃rʉ ibia bedʼeabiseabʉ» (Reyon).

DAIZEZE BEDʼEABA JARABɄTA: «Bʉa jõma zarea obʉba nekʼãrẽ biata ũduseabʉ» (Proverbios 14:​23, Nueva Versión Internacional).

¿KʼÃRẼTA OIBARA?

Naʉ̃ra ũrãgʼaba kʼarebayi bʉ trajora bia akʉmarẽã.

Bʉa nekʼãrẽ obʉra bia okʼawuara. Bʉa trajo obʉra biʼia ora, krĩcha ẽã sama obʉta deda, kolegiode mawũã ẽ bʉrʉ bʉ trajabʉmae. Bʉa obʉta okʼawuabʉrʉ akʉra sãwũã bia oita akʉza mesera. Bʉa bʉ trajo bia owãba bʉra audre sobiabayi.

DAIZEZE BEDʼEABA JARABɄTA: «¿Bʉara ũdubarika ẽbẽra abaʉba bia obʉta iyi trajora? Nokʼora nãã piradrʉ bayi, mawũã badu ẽbẽra nãã ba ẽ bayi» (Proverbios 22:29).

Krĩchara wuabemara ʉ̃rʉ. Bʉa trajo jarada obʉde, wuabemarata kʼarebabʉ. Bari jaradaita, deda jaradapeadata bʉa ora, mawũãra bʉ mebẽrãba oibadara mejãcha oẽbayi.

DAIZEZE BEDʼEABA JARABɄTA: «Audre sobiabʉ daya diabʉde dayaʼa diapanʉira» (Hechos 20:35).

Bari bʉa zokʼadapeada awa orãra. Bari bʉa zokʼadapeada awabʉrʉ orãra awuarabʉrʉ audre ora. Maʉ̃ta mawũã obʉbʉrʉ bʉara zokʼa kʼawuabayi bʉ bebʉra jõma. Wãrĩnu bʉara erbayi nekʼãrẽ audre oira, mamina wuabemaraba zokʼabʉrʉ kʼarea oẽbayi (Mateo 5:41).

DAIZEZE BEDʼEABA JARABɄTA: «Mawũã bʉa maʉ̃ nebia oẽ baita wuabemaraba zokʼabʉ kʼarea, awuarabʉrʉ bʉa kãgabʉ baera» (Filemón 14).

Ariguide oibara. Mawũã trajamiaba jarakĩrãkʉ ẽ dayirã ewari jõmaʉ̃nẽ trajaibarata. Ariguide bʼaibara akʉza daya trajo obʉba sobia bʼaibara adewara dayi enaʉ̃bʉ kĩrãkʼa.

DAIZEZE BEDʼEABA JARABɄTA: «Audre yibia enaʉ̃ita mejãcha trajaira maʉ̃ra pʉãdrʉ pẽwãi kĩrãkʼabʉ baera» (Eclesiastés 4:⁠6).