Ũrãgʼata yibariraita

Yibarirabara kãgapanʉ ãyi warrarabara kãgadamarẽã Jeowata akʉza ãyi bebʉta diamarẽã. ¿Sãwũã kʼarebaseapanʉ ãyi buru kʼoemarẽã? ¿Sãwũã kʼawuaseabʉ bʉ warrarãra buru kʼoeseabʉta?

Jesubara jaradiasi iyi kʼaidupanʉrabara ẽbẽrarã jõma jaradiadamarẽã akʉza buru kʼoebidamarẽã (Mat. 28:19). Maʉ̃ kʼarea ẽbẽrata buru kʼoeibʉrʉ, Jesu kʼaidu bʼaibara. Jesu kʼaidu bʼaira bari ĩjãibara ẽ akʉza jõma kʼawuaibara ẽ iya jaradiadata, awuarabʉrʉ oibara jõma iya jaradata. Kʉrarãbida maʉ̃ra oseapanʉ.

Bʉ wũãwũãra nebiata oʉ̃dubibara, mawũã Jeowaba jarabʉta ãyi soidu jʉ̃ẽmarẽã (Deut. 6:6-9). Jaradiara karta Bʉra ewari jõmaʉ̃nẽ sobia baseabʉ. Maʉ̃ba kʼarebaseabʉ sãwũã nebia oita wãrĩnu Daizeze Bedʼearadebemaba. Kʼarebara jaradiamarẽã ãya ĩjãbʉta ãyi bedʼeadeba (1 Ped. 3:15). Maraba jaradiabʉdeba akʉza nekʼãrẽ ­opanʉneba kʼarebayi iyi buru kʼoeita. Audre bigabayi Daizezeta orramarẽã ãyi doba estudiabʉde, mebẽrãbawaraʉba kʼawuabʉde Jeowaba jarabʉ oita, wãbʉde ãba yi jʉrebarimae akʉza neũdu­kʼawuara erbʉde kongregasione. Kʼarebaidua audre oita Daizezeita.

Proverbios 20:11de jarabʉ: «Wũãwũãrabida ũdubibʉ iyi kʼãrẽ obʉdeba kʼẽrẽpabʉta akʉza neneẽãbʉta». ¿Kʼãrẽ obʉdeba ũdubibʉ bʉ warrabara Jesu kʼaidubemata akʉza buru kʼoeseabʉta?

Daizeze Bedʼeabara nebʉrabʉ Jesu 12 poa­gabasidera iyara ũrĩbasita yibarira bedʼeara (Luc. 2:51). Maʉ̃ kĩrãkʼa yi warrara buru kʼoekĩrãbʉbara ũrĩbara yibariraba jarabʉta (Hech. 5:29; Col. 3:20). Edaʉde bʉ warrabara aña oyi mamina zarea oibara Jesubada kĩrãkʼa bʼaita akʉza ũdukaʉde bʼaibara ũrĩbʉ baera yibarira be­dʼeata.

Akʉza audre kʼawuakĩrã bʼaibara Daizeze Be­dʼea ʉ̃rʉ (Luc. 2:46). Krĩchara: «¿Bʉ warrara wãkĩrãka ãba yi jʉrebarimaera? ¿Akʉza juwa ʉ̃ta wuabʉka panʉita ãba yi jʉrebarimaera? ¿Iyara Daizeze Bedʼeara akʉkĩrã akʉbʉka?» (Sal. 122:1; Mat. 4:4).

Yi wũãwũã buru kʼoekĩrãbʉbara nããra obʉ Daizeze Nokʼoba jarabʉta (Mat. 6:33). Iyara kʼawuabʉ Daizeze Bedʼeara jaradia wãibarata akʉza nekʼãrẽ awuara awuaraka obʉ Daizeze Bedʼea jaradiabʉde. Iyi kolegiodera pera ẽ jaraita iyira Jeowa ʉ̃rʉ Kʼawuabipanʉrãta. Adewara nããra ­biʼia kʼawuabʉ iya jaradapeadara oita Bʼaita Kristianora kĩrãkʼa akʉza Trajaita Daizezeita.

Iyira Daizeze nããra kʼẽrẽpa bakĩrãbʉ maʉ̃ kʼarea zarea obʉ, jʉrʉ ẽ neũdukʼawuara kayiruara. Iyira jʉra kʼawuabʉ musika ũrĩbʉde, pelikula akʉbʉde, telebision akʉbʉde, bideo juego jemenebʉde akʉza internetʼne eda wãbʉde (Prov. 13:20; 1 Cor. 15:33).

Kʉrarãra mejãchaʉba jidabʉda Daizeze ota akʉza buru kʼoesida yibarira kʼarebadeba. Jeowaba kʼarebayi maraba nekʼãrẽ opanʉneba mara warrara buru kʼoemarẽã.

Bedʼeata yi wabida buru kʼoe ẽ bʉita

Kʼãrẽ bia bʉa Daizeze Bedʼeata kʼawuasi baera, maʉ̃ba kʼarebasi Daizeze ũdukʼawuaita ­audre ĩjã bʼaita iya jarabʉta akʉza bʉa kʼawuabʉ kʼãrẽta sãwũã aripe oita maʉ̃ kʼarea bʉara jaradia wãbʉ wabida buru kʼoe ẽ bʉmina (Juan 17:3; Heb. 11:6).

Daizeze Bedʼea kʼawuai nãã Jeowa ʉ̃rʉ Kʼawuabipanʉrãbawara religionbarabasi bʼaibara, mawũã ẽ bʉrʉ religion ʉ̃rʉra kʼawuakĩrã ẽ basi bʼaibara mawũã ẽ bʉrʉ nemitiata obasi. Bʉa Daizeze Bedʼeata ĩjãsi baera idubʉsi bʉa kayirua obadara maʉ̃ kʼarea sopuabasi. Adewara jẽda zesi, naʉ̃ bedʼeabara jarakĩrãkʉ bʉa nãã nemitia obadara jipa idubʉibarata awuarabʉrʉ okĩrãbʉ Daizezeba jarabʉta (Hech. 3:19).

Bʉara Daizeze ora ũdukʼawuasi bʼaibara wũãwũã wedaʉba, maʉ̃ kʼarea nemitia mejãcha oẽ basi (2 Tim. 3:15). Adewara bʉa kʼawuasi kʼãrẽta oibarata, wuabemaraba opanʉ kĩrãkʼa oẽ baita akʉza nemitia oẽ baita, bʉara ũdubibʉ Daizeze ode bʉta Daizeze Bedʼeata jaradiabʉ baera. Bʉa kʼawuasi kʼãrẽta oibarata bia nejaradiade wãita maʉ̃ kʼarea krĩchasi nejaradiabari bʼaita buru kʼoe ẽ bʉmina.

Bʉara Daizeze ʉ̃rʉ kʼawuasi zõrãrã wedaʉba mawũã ẽ bʉrʉ warrara wedaʉba, atiara bʉ bebʉra diakĩrãbʉ Daizezeʼa akʉza buru kʼoekĩrãbʉ, dayi bebʉ Daizezeʼa diaira jarakĩrãbʉ: ­Daizezeʼa yiwidʼita maʉ̃ne jaraibara ewari jõmaʉ̃nẽ iya jarabʉrʉde bʼaita (Mat. 16:24). Tẽã buru kʼoeyi doeda, mawũã ũdubita bʉ bebʉra diasita Daizezeʼa (Mat. 28:19, 20). Dayi bebʉ diabʉrʉde Daizezeʼa akʉza buru kʼoebʉrʉdera iyi nezokʼa badogo, naʉ̃ra biode yibia.

Daizeze Bʼedeaba jarabʉ Jesu burukʼoeda tẽã «Jawurebia Daizezedʼeba [ẽjũã dʉ̃dʉ̃a tabʉmãẽ] edesia Ãtõmiãba [baebimarẽã]» (Mat. 4:1). Bʉabida bʉ buru kʼoeda tẽãra bedʼea zromara ũduyi (Juan 15:20). Bʉra pẽwãnañi akʉza bʉ kʼarea ipidadayi, maʉ̃ bedʼea zromara ũduyi bʉ mebẽrãneba, kolegiode, adewara ʉ̃kʉrʉ bʉ neũdukʼawuaraneba (Mat. 10:36). Kĩrãbera Jesuba jaradata: «Mawũãĩ Jesúsbara panaʉ̃ mawũãsia: Mʉã wãrĩnu marãã jaraya, iabʼaʉba deta ãmaẽrã, zhi mebẽrã zhũmakĩrãrãta, nawekʼaurãta ãmaẽrã, zezeta, papata, wũẽrãta, warrarãta, druata, mʉ kʼarea ãmaẽrã, bedʼea biata mʉnebemata jarai kʼarea ãmaẽrã, 30 idʼi ewade ãmaña jidama cien jidaya deta, mebẽrã zhũmakĩrãrãta, nawekʼaurãta, paparãta, warrarãta, druata. Baridua zuburia odʼaimina mawũã jidaya, aramaʉ̃ne ewari tẽã nʉmaĩta zeidʼera jidaya Daizeze ũme bʼai jõ ẽãta» (Mar. 10:29, 30 DB). Jeowara idubʉrãra akʉza ora iya jarabʉra, bedʼea zroma ũdubʉde akʉza bedʼea zroma ũdu ẽãne.

Bʉta buru kʼoekĩrãbʉbʉrʉ jarada zõrãrã ãba yi jʉredabariaʼa. Iyara bʉa widiyi bedʼeata naʉ̃ li­brode widibʉta bʉ buru kʼoeseabʉ kʼawuaita. Nããra bʉyi dobaʉba akʉseabʉ.

Yi bedʼea widibʉ akʉbʉrʉde testora jõma lera akʉza krĩchara naʉ̃ ʉ̃rʉ. Bʉa nããra bʉseabʉ jẽda kĩrãbeita. Naʉ̃ kartara bʉara akʉseabʉ zõrãrãʉ̃me bedʼeabʉrʉde akʉza bʉa bʉdata. Bʉa bedʼeata bia ũrĩ ẽ bʉrʉ zõrãrãʼa jaraseabʉ mawũã ẽ bʉrʉ mebẽã bʉa jaradiabʉa.

Bʉa panʉbʉrʉdera bʉyi krĩchadeba panʉ­ra, nesida ẽ bayi bʉa bedʼea mejãcha jaraira, ­audre biga bayi jipa jaraita. Bʉara testodeba panʉseabʉ.

Bʉa ʉ̃kʉrʉ bedʼeata bia ũrĩ ẽ bʉrʉ Daizeze Bedʼeadebʉta mawũã ẽ bʉrʉ bia jara ũrĩbi be ẽ bʉrʉ, zõrãrãba jʉrʉyi bʉ sãwũã kʼarebaita, maʉ̃ tẽã buru kʼoeseabʉ.

[Bedʼeata zõrãrã kongregasionebemaraita: Pagina 54deba 59 bayeda maʉ̃ne eda jarabʉ sãwũã oseabʉta ãba yi jʉreita yi buru kʼoeirabawara].