Yi nããrabemata: Kristianoraba ĩjãpanʉta

Bʉara kʼawuasi saʉ̃ta wãrĩnu arata Jeowa ʉ̃rʉ Kʼawuabipanʉrãbawara Daizeze Bedʼeata kʼawuabʉ baera. Maʉ̃ba kʼarebasi iyi neũdukʼawua bʼaita, bʉara kʼawuabʉ drʉa kĩrãwãreãnẽ bʼaita adewara mejãcha nebiata ũduyi Daizeze Nokʼodeba. Idira bʉara wãrĩnu ĩjãbʉ Daizeze Bedʼea ʉ̃rʉra, bʉara mejãcha nebiata ũdu zebʉrʉ mebẽrã kongregasionebemarabawara ãba yi jʉrebʉ baera. Idira bʉara kʼawuabʉ Jeowabara sãwũã kʼarebabʉta iyi pʉwʉrʉra (Zac. 8:23).

Atiara bʉara kʼawuabʉ baera kʼãrẽta oibara buru kʼoeita, zõrãrãbara bʉa widiyi bedʼeata Daizeze Bedʼeade bʉta (Heb. 6:1-3). Bʉa Jeowa ʉ̃rʉ audre kʼawuakĩrãbʉ baera iyara kʼarebayi bʉra adewara ewari jõmaʉ̃nẽ babiyi (Juan 17:3).

1. ¿Bʉra kʼãrẽa buru kʼoekĩrãbʉ?

2. ¿Kʼaipe Jeowara?

   • «Mawũẽra bʉara idiba ʉ̃ta kʼawuaibara, wãrĩnu Jeowatrʉ Daizezearata, ʉ̃tʉ bajãne akʉza nama egorode, awurura neẽã» (Deut. 4:39).

   • «Ẽbẽrarãba kʼawuadamarẽã bʉ trʉ̃arara Jeowata akʉza bʉtrʉ abapai yi zroma naʉ̃ ẽjũã jõma ʉ̃rʉ» (Sal. 83:18).

3. ¿Kʼãrẽa biga Daizeze trʉ̃ara jaraira?

   • «Marara kʼawua yiwidʼidua: Zeze ʉ̃tʉbema, bʉ trʉ̃ra neneẽãbaide bʉa» (Mat. 6:9).

   • «Ẽbẽra jõma Jeowa trʉ̃ jarabʉrʉra, bei ẽã ẽdrʉya» (Rom. 10:13).

4. ¿Jeowa trʉ̃ awuara, Daizeze Bedʼeabara sãwũã trʉ̃gabʉ iyira?

   • «¿Kʼawua ẽka? ¿Ũrĩbari ẽka? Jeowa drʉa jõma Parãnara, iyira ewari jõmaʉ̃nẽbayi. Iyira pae ẽ. Jõmaʉ̃ra ʉ̃ta krĩcha bia barachu» (Isa. 40:28).

   • «Marara kʼawua yiwidʼidua: Zeze ʉ̃tʉbema, bʉ trʉ̃ra neneẽãbaide bʉa» (Mat. 6:9).

   • «Yi kãga neẽãra Daizeze ũduka, Daizezera kãga baera» (1 Juan 4:8).

5. ¿Bʉara kʼãrẽta diaseabʉ Daizezeʼara?

   • «Nokʼo Daizezera soidʼu kʉãgʼarua, bʉzhi jawureidʼuba, bʉzhi krĩchaidʼuba, bʉzhi zareaidʼuba» (Mar. 12:30 DB).

   • «Jesubara mawũã panʉsia: Yi bʉmata mawũãbʉa: Daizeze Jeowatrʉ kãgara iyi bedʼeatrʉ aribaedua» (Luc. 4:8).

6. ¿Bʉra Jeowa odera kʼãrẽa kʼẽrẽpa bakĩrãbʉ?

   • «Mʉ̃ wũãwũã, burubiabara, mʉ̃ sobiabira, mʉ̃a panʉñi mʉ̃ ʉ̃rʉ imitia bedʼeabʉra» (Prov. 27:11).

7. ¿Bʉra kʼaia yiwidʼibara akʉza kʼai trʉ̃neba?

   • «Maʉ̃ ewadera marãbara mʉãã widʼidʼa ẽã miã kʼãrẽta. Mʉã wãrĩnu marãã jaraya, jõma kʼãrẽ mʉ Zezea mʉneba widʼibʉdara izha marãã diaya» (Juan 16:23 DB).

8. ¿Kʼãrẽ ʉ̃rʉ yiwidʼiseabʉ bʉra?

   • «Marara kʼawua yiwidʼidua: Zeze ʉ̃tʉbema, bʉ trʉ̃ra neneẽãbaide bʉa. Zebira bʉ Nokʼota. Bʉa krĩñata odaide bʉa ʉ̃tre obe kĩrãkʼa, mawũã odaide bʉa drʉadebida. Idibema yikota daiʼa diara; Kĩrãduara daiba nekayirua obʉta daiba wuabema nekayirua kĩrãduabʉ kĩrãkʼa. Eda baebirara kayiruade baebibari krĩchade, awuarabʉrʉ ẽdrʉbira Diaru juwadeba» (Mat. 6:9-13).

   • «Dayirãbara wãrĩnu ĩjãpanʉ iyi ʉ̃rʉ: dayirãba kãgabʉde wididara, iya wãrĩnu ũrĩta» (1 Juan 5:14).

9. ¿Kʼãrẽa Jeowabara jõma ũrĩ ẽ dayirã yiwidʼibʉra?

   • «Maʉ̃ra ewaridera Jeowa kʼarebata wididayi mamina iyara ũrĩ ẽ bayi. Maʉ̃ ewaridera Jeowaba ũrĩ ẽ bayi ãyi bedʼeara ãya nemitia oda kʼarea» (Miq. 3:4).

   • «Jeowa dabʉra bʉ ẽbẽra biara ʉ̃rʉ, ũrĩbʉ mara yiwidʼibʉrʉdera, mamina Jeowara ãĩbʉ ẽbẽra nemitia obʉdebara» (1 Ped. 3:12).

10. ¿Kʼaipe Jesura?

    • «Mawũãi Simon Pedroba jarasia: Bʉtrʉ Kristoa, Daizeze zokʼaibʉ warra» (Mat. 16:16).

11. ¿Jesura naʉ̃ drʉa edara kʼãrẽma zesi?

    • «Yumakẽrã wũãwũãra ze ẽ basi iyita akʉdamarẽã, awuarabʉrʉ zesi wuabemara akʉita akʉza iyi bebʉ diaita wuabemara ẽdrʉbita» (Mat. 20:28).  

    • «Mamina iyara jarasia: Mʉ̃ara adewara jaradiaibara bedʼea bia Daizeze Noko ʉ̃rʉ. Mʉ̃ra maʉ̃ kʼarea zokʼasida» (Luc. 4:43).

12. ¿Bʉara sãwũã biga diaseabʉ Jesuba iyi bebʉta diasi baera dayirãbari?

    • «Iyira beisi jõmaʉ̃ra kʼarea yi zokʼai panʉrãra ãyikʉzaita ba ẽ marẽã awuarabʉrʉ ãyi bari beidaita bamarẽã, iyira jẽda piradrʉsi» (2 Cor. 5:15).

13. ¿Kʼãrẽaba zarea barabʉ Jesura?

    • «Maʉ̃nerã Jesúsbara ãzhi orrape mawũãsia: Daizezebara zareata mʉãã diasia jõma mʉã erunʉmamarẽã ʉ̃tre nʉmʉta druadʼe nʉmʉta» (Mat. 28:18 DB).

    • «Daizezeba iyira wuabemara ʉ̃ta bʼaita babisi akʉza trʉ̃ta diasi wuabemara trʉ̃ audre ʉ̃tabʉta» (Filip. 2:9).

14. ¿Bʉara ĩjãbʉka Jeowa ʉ̃rʉ Kʼawuabipanʉrã Zõrãrã Buru Bia Ãba yi Jʉrepanʉrãra, ãyira yi «nezokʼara jipabʉrata akʉza bia krĩchabʉrata» Jesuba jʉrʉdata?

    • «¿Kʼairape yi wãrĩnu nezokʼara jipabʉrara akʉza biʼia krĩchabʉrara, nokʼobara yi nezokʼara zokʼa amaesi jõma iyi deda bʉ ʉ̃rʉ, yiko diamarẽã nekobari ũmadaʉde?» (Mat. 24:45).   

15. ¿Daizeze jaure zareara ẽbẽraka?

    • «Mawũãĩ ángelbara panaʉ̃ mawũãsia: Jawurebiata bʉ ʉ̃rʉ̃ zebʉrʉba bʉra Ʉ̃trebema zareaba ãnabʼariya, aramaʉ̃ne wũãwũã toira Daizezedʼeba Daizeze Warra adʼaya» (Luc. 1:35 DB).

    • «Marã bia ẽãta bʼeba mazhi warrarãã ne biata dia kʼawua bʼebʉrʉ, ¿marã Zeze ʉ̃trebemabara audrebai Jawurebiata diai ẽka zhi widʼibʉdaara?» (Luc. 11:13 DB).

16. ¿Jeowabara sãwũã zokʼa zebʉrʉ iyi jaure zareara?

    • «Jeowabara bajãta parãsi iyi bedʼeadeba akʉza iyi jaure zareadeba parãsi jõma bajãne ʉ̃tʉbʉta» (Sal. 33:6).

    • «Mamina mara ʉ̃rʉra jaure zareata zeya. Mawũẽ maraba jaradiadaya mʉ̃ ʉ̃rʉ Jerusaléne, Judea jõmaʉ̃nẽ adewara Samariade akʉza wawara naʉ̃ drʉa jõmʉ̃anẽ» (Hech. 1:8).

    • «Naʉ̃ta kʼawuaidua, Daizeze Bedʼeara iyi ʉ̃rʉ bʉdapeadabara, ãyi krĩchata bʉda ẽ basi mia wiñabida. Jõma ãya jaradara ẽbẽra krĩchadeba ze ẽ basi. Awuarabʉrʉ Daizeze jauredeba bedʼeasida» (2 Ped. 1:20, 21).

17. ¿Kʼãrẽ Daizeze Nokʼora?

    • «Maʉ̃ra nokʼora ewaridera Daizeze ʉ̃tʉbemabara, bʉyi nokʼo jõkata akʉza maʉ̃ nokʼora mia abaʉ pʉwʉrʉ eda berabari ẽ bayi. Naʉ̃ nokʼoba birachiyi akʉza jõma jõbiyi maʉ̃ra nokʼorãra, adewara iyitrʉ ewari jõmaʉ̃nẽbayi» (Dan. 2:44).

18. ¿Bʉra Daizeze Nokʼobara sãwũã kʼarebai?

    • «Daizezebara jõma jõbiyi daʉbara akʉza beira wuara neẽbayi so zʉbʉriaira, zʉbʉria bedʼeaira neẽbayi pʉa nãã ũdubadara neẽbayi» (Apoc. 21:4).

19. ¿Bʉara sãwũã kʼawuabʉ aranʉbai Daizeze Nokʼobara kʼarebabaita?

    • «Iyi jewedabaside Olivos katumane, iyi kʼaidupanʉraba chũwẽã orradape Jesuʼa bedʼeata widisida: Daiʼa jarada, ¿maʉ̃ra sõbede berabaripe, kʼãrẽta ũdudaipe bʉ ewaridera, adewara naʉ̃ ewarinʉmʉ jõi ewaridera?» (Mat. 24:3). «Mawũãnaĩ Jesúsbara panaʉ̃ mawũãsia: Kĩrãkuita bʼeaudua miõã zhi sewabidʼa ẽbaita. Drua tabʼeta drua awʉrʉta tabʼe bawara zhõnaña, nokʼorãta nokʼorã awʉrʉ bawara zhõnaña. Nʉmeña puata, jarrabata, ẽjũã ureta baridu maẽ. Kʼãwũã bedʼea biata Daizezeta Nokʼodʼebemata jaradʼaya ẽjũã jõmaʉ̃ maẽ, aramaʉ̃ne zhãrã jõmaʉ̃ba kʼawuadʼaya, mobebʉrʉ zeya ewari nʉmʉta jõĩrã» (Mat. 24:4, 7, 14 DB).  

    • «Kʼawuaidua naʉ̃ta, ewari jõbodoarera ũdu wãnañi bedʼea zroma daya obe ẽãta. Ẽbẽrarãbara ãyitrʉ audre kãgadayi, plata audre jʉrʉita kãgadayi, ãyabʉrʉ audre kʼawuabʉta wuabemaraira, sewa nebʉrʉmiabayi, adewara yibarira bedʼea ũrĩna ẽ bayi, bayi biga diada ẽãta, kʼẽrẽpabada ẽ bayi, kãga ũdubida ẽ bayi, bedʼea abarika zeda ẽ bayi, awuru ʉ̃rʉ sewa nebʉrʉta jaradayi, ãyi kakua zokʼa kʼawua ẽ bayi, mia beamiabayi, sobia neẽbayi, bayi ariya sewabʉta, ũrĩkĩrã ẽãbʉta, bayi krĩchabʉta ãyide ʉ̃tabʉra neẽãta, bayi ãya okĩrã obaita Daizeze kãgaikaʉde, bayi Daizeze ĩjãbʉ abʉde aripe oẽãta. Mawũã bʉdebara ãĩ wãibara» (2 Tim. 3:1-5).

20. ¿Bʉara sãwũã ũdibibʉ Daizeze Nokʼora bʉitara audre yibiata?

    • «Kʼãwũãena, nããra jʉrʉidua Daizeze Nokʼota adewara iya aripe omarẽãbʉta, mawũãtrʉ maʉ̃ jõma diaya» (Mat. 6:33).

    • «Mobebʉrʉ Jesúsbara izha jʉrʉkuadʼaa mawũãsia: Iabʼaʉba mʉta pẽwã krĩña bʼʉbʉrʉ bʉzha krĩñata aribʼaerãrũã, awuarabʉrʉ bebudʼe basiidʼu mʉrã pẽwãdua» (Mat. 16:24 DB).

21. ¿Kʼaipe Diarura (Ãntomĩa) akʉza angelera kayiruarãra?

    • «Marara mayi zeze Ãtomĩa warrara, okĩrãbe mayi zezeba kãgabʉta. Iyira nawedaʉba mia beabaritabʉa, iyira kʼẽrẽpa ba ẽ basi, iyi sodera wãrĩnura neẽ baera. Sewa nebʉrʉ jarabʉrʉza, iyi sãwũãbʉ kĩrãkʼa opanʉ, iyira sewa nebʉrʉ omia baera adewara sewa nebʉrʉ omia zeze» (Juan 8:44).

    • «Dama zromara jʉretasida naʉ̃ drʉa eda, dama kikibarita, maʉ̃ra trʉ̃gapanʉ Diaru iyabaʉta jarapanʉ Satana, iya naʉ̃ drʉa jõmaʉ̃nẽbemata sewa erbʉ akʉza iyi kʼaidupanʉra angelerasida jʉretasida» (Apoc. 12:9).

22. ¿Diarubara kʼãrẽ sewa nebʉrʉta jara zebʉrʉ Jeowa ʉ̃rʉra akʉza iyi kʼaidupanʉra ʉ̃rʉ?

    • «Aramaʉ̃ta, yuwẽrãba jarasi damaʼa: Neta ẽjũã kĩrãwãreãnẽbʉra koseapanʉ. Mamina ẽjũã kĩrãwãreã ẽzadra bakurude netabʉra, Daizezeba jarasi: Maʉ̃nebemara kobe ẽ, mia kʼãrẽsida tõbaribe ẽ bei ẽ marẽã. Aramaʉ̃ta damaba jarasi yuwẽrãʼa: Wãrĩnubaira bʉra bei ẽ baya. Daizezebara kaʉbʉ maʉ̃ kobʉrʉ ewaridera daʉ ogadrʉtotoita akʉza Daizeze kĩrãkʼa bʼaita, ũdukʼawuaita saʉ̃ta yibiata akʉza saʉ̃ta yibia ẽãta» (Gén. 3:2-5).

    • «Diarubara panʉsi Jeowaʼa akʉza jarasi: Yãrãta yãrãbari, akʉza yumakẽrãba jõma erbʉra iyi bebʉbari diayi» (Job 2:4).

23. ¿Bʉara sãwũã ʉ̃dubiseabʉ Diaruba Jeowa ʉ̃rʉ sewida jaradara wãrĩnu ẽãta?

    • «Warra Salomón, ũdukʼawuara Daizezera, soiduba ora iya jarabʉrʉta Jeowabara biʼia akʉbʉ baera dayi sode edabʉta akʉza dayi krĩchade edabʉta, bʉa iyita jʉrʉra yi ũdubiya bʉa idubʉra iya bʉra jipa idubʉyi» (1 Crón. 28:9).

    • «Mia krĩcharãra mʉ̃neba ibia jaraita mʉ̃a marata. Mʉ̃ bei ẽ nããra iyiʉ̃me kʼẽrẽpa bayi mʉ̃ra» (Job 27:5).

24. ¿Kʼãrẽa beipanʉ ẽbẽrarã?

    • «Kʼãwũã yumakẽrã abaʉdeba nekayiruara zesi naʉ̃ drʉa jõmaʉ̃nẽ, mawũã nekayiruadeba jõmaʉ̃ta beibarita amaesi akʉza maʉ̃neba ẽbẽrarã jõmaʉ̃ta beipanʉ, jõmaʉ̃ta nekayirua omia baera» (Rom. 5:12).

25. ¿Samadogo dayirã beibʉrʉdera?

    • «Zokʼaibʉrabara krĩchabʉ beita, mamina beidabara mia kʼãrẽsida krĩcha ẽ. Akʉza kʼãrẽ oibadara kĩrãduasi» (Ecl. 9:5).

26. ¿Kʼãrẽ bedʼea biata bʉ beidaraitara?

    • «Mʉãrã ãzhidʼe kĩrãkʼa ĩjã bʼʉa Daizezebara beudʼapeadʼara piradrʉbigaita biata bʼeta bia ẽãta bʼeta» (Hech. 24:15 DB).

27. ¿Sõbe ẽbẽra wãi ʉ̃ta Jesuʉ̃meba ʉ̃tʉba zokʼaita?

    • «Mʉ̃a ũdusia Korderota, katʉma Sion ʉ̃rʉ edaʉnʉmʉta, iyibawarabasi 144.000, ãyi datrʉde Kordero trʉ̃ta bʉ apanasi akʉza yi Zeze trʉ̃sida» (Apoc. 14:1).