Timoteobara ẽbẽra kʼarebakĩrãbasi

Timoteora mejãcha sobiabasi awuru kʼarebabʉrʉdera. Drʉa aña wãbasi ẽbẽrarã Daizeze Bedʼea jaradiaita. Iyira mejãchade sobiabasi. ¿Kãgabʉka jaradiamarẽã iyi ʉ̃rʉ?...

Timoteora warisi pʉwʉrʉ Listrade. Yi papa trʉ̃ra Eunisebasi yi payõdra trʉ̃ra Loidabasi. Ãya jaradiasida Timoteoʼa wiña yiruedaʉba Jeowa ʉ̃rʉ. Maʉ̃ba Timoteobara kʼareba kĩrãbasi ẽbẽrarã Jeowa ʉ̃rʉ jaradiabʉdeba.

Timoteo kũrabaside Pablobara jarasi, iyi kʼaidu wãmarẽã drʉa aña Daizeze Bedʼea jaradiaita. Aramaʉ̃ta Timoteobara jarasi iyi kʼaidu wãita, iya ẽbẽrarãta kʼareba kĩrãbasibaera.

Wãsi Pabloʉ̃me pʉwʉrʉ Tesalonika eda maʉ̃ra Gresiadebasi, mama jũẽira wawara wãibarabasi jĩrʉne akʉza jãba zromane. Mainʉ jũẽ karãpe ẽbẽra mejãcha kʼarebasida Jeowa ʉ̃rʉ kʼawuadamarẽã. Mamina ʉ̃kʉrʉ ẽbẽrarã mejãcha kĩrʉsida akʉza zʉbʉria oita krĩchasida. Maʉ̃ba Pablora Timoteoʉ̃mera wãibarabasi awuru drʉa eda Daizeze Bedʼea jaradiade.

Maʉ̃ jedeko tẽã Pabloba jarasi Timoteoʼa akʉza jẽda wãmarẽã pʉwʉrʉ Tesalonikama. Kʼawua kĩrãbasibaera mebẽrã sãwũã wãnata. Mamina pʉwʉrʉ Tesalonikadera ʉ̃kʉrʉ ẽbẽrarãba zʉbʉria osida kristianorãra. Maʉ̃ kʼãrẽa, Timoteora peraẽbaibarabasi mama jẽda jũẽira, mawũẽra ¿Kʼãrẽta osi Timoteobara? iyira wãsi krĩchabasibaera mebẽrãta. Akʉza jẽda zebʉrʉdera iyara bedʼea biata jara zesi Pabloʼa. Mebẽrã Tesalonikadebemabara opanʉta Jeowaba jarabʉra.

Poaga mejãchabayeda Timoteora Pabloʉ̃me trajasi. Maʉ̃ kʼãrẽa ewari aba Pablobara bʉsi Timoteo ʉ̃rʉ, zokʼabʉeya Timoteora mebẽrã kʼarebade, wuara neẽ iyi kĩrãkʼara. Iyara kãga Jeowara akʉza ẽbẽrarãsida.

¿Bʉabida kãgaka ẽbẽrarãra? ¿Kʼarebaika ẽbẽrarã Jeowa ʉ̃rʉ kʼawuadamarẽã?... Mawũãra sobiabayi Timoteo kĩrãkʼa.