¿Kʼãrẽta oibara Daizeze neũdukʼawua bʼaira?

1, 2. ¿Kʼairabasi Jeowa neũdukʼawuarãra?

¿KʼAITA bʉ neũdukʼawuara bamarẽã jidai? Bʉmabi bʉa audre ũdukʼawuabʉta, ẽbẽra biata, bʉme abarika krĩchapanʉta.

² Jeowabida jʉrʉsi neũdukʼawuara biata nama egorodebemata. Maʉ̃nebemata Abraanta Jeowa neũdukʼawuara biabasi (Isaías 41:8; Santiago 2:23). Akʉza Dabisida Jeowa neũdukʼawuara biabasi. Jeowaitara Dabira ẽbẽra biabasi baera (Hechos 13:22). Adewara propeta Danielsida iyi neũdukʼawuara biabasi, maʉ̃ba kʼarebasi (Daniel 9:23).

3. ¿Kʼãrẽa Abraantaʼ Danielta akʉza Dabita Jeowa neũdukʼawuarabasi?

³ ¿Kʼãrẽa Abraanta Danielta akʉza Dabita Jeowa neũdukʼawuara biabasi? Jeowaba Abraanʼa jarasi: «Bʉa ũrisi baera mʉ̃ bedʼeata» (Génesis 22:18). Jeowara neũdukʼawua bia iyi bedʼea ũrĩpanʉraitara adewara yi edabʉta krĩchabʉitara. Akʉza pʉwʉrʉ jõma iyi neũdukʼawua baseabʉ. Jeowaba jarasi Israel pʉwʉrʉdebemaʼa: «Ũrĩdua mʉ̃ nemita mawũã mara Zezebayi akʉza marasida mʉ̃ pʉwʉrʉarabayi» (Jeremías 7:23). Bʉta wãrĩnu Daizeze neũdukʼawuara bakĩrãbʉbʉrʉ, ũrĩbara iyi bedʼeata.

JEOWABARA KʼAREBABɄ IYI NEŨDUKʼAWUARÃRA

4, 5. ¿Sãwũã kʼarebabʉ Jeowabara iyi neũdukʼawuarãra?

⁴ Daizeze Bedʼeabara jarabʉ Jeowabara jʉrʉbʉta sãwũã «iyi zarea diaita jari wãrĩnu soiduba iyi kãgabʉʼa» (2 Crónicas 16:9). Akʉza Salmo 32:8de jarabʉ Jeowabara jarasita krĩcha bia diaita akʉza ũrãgʼa bia diaita iyi neũdukʼawuara.

⁵ Dayirãbara nejʉra audre zarea barabʉta erbʉ maʉ̃ra Diaru, maʉ̃bara kãga ẽ dayirã Daizeze neũdukʼawua bʼaira. Mamina Jeowabara dayirã kʼarebakĩrãbʉ (akʉra Salmo 55:22). Dayirãra iyi neũdukʼawua baera, iya jõma jarabʉta opanʉ soiduba akʉza iyiʉ̃me kʼẽrẽpapanʉ zʉbʉria berabarinʉmʉinʉ. Dabiba ĩjãbada kĩrãkʼa abarika ĩjãpanʉ dayirãbida. Dabiba jarasi Jeowa ʉ̃rʉ: «Iyira mʉ̃ kʼawabʉa akʉza mʉ̃ urebi ẽã» (Salmo 16:8; 63:8). ¿Kʼãrẽta obʉ Diarubara Jeowa neũdukʼawuaraba ẽ marẽã?

DIARUBARA IBIA JARA Ẽ ẼBẼRARÃ

6. ¿Kʼãrẽ sewa nebʉrata obʉ Diarʉbara?

⁶ Kapitulo 11de kʼawuasida, Diarubara sewa nebʉra jarasita Jeowa ʉ̃rʉ. Adewara jarasi nekʼãrẽ aripe oẽãta, Adan Ebaʼa iduaribi ẽ basi baera jidamarẽã saʉ̃ta yibiata akʉza saʉ̃ta zeri ẽãta. Libro Jobʼdera jarabʉ Diarubara sewa nebʉra jarabʉta ẽbẽrarã Daizeze neũdukʼawua bakĩrãbʉ ʉ̃rʉ. Diarʉbara jarabʉ ẽbẽrarãbara Daizezeba zokʼabʉta opanʉ iya nebia diabʉ kʼãrẽa akʉza wãrĩnu kãgada ẽãta. Adewara jarabʉ Diarubara badu ẽbẽra oseabʉta Daizeze bedʼea ũrĩ ẽ marẽã. Atia kʼawuadaya kʼãrẽta kʼawuaseapanʉta Job berabaridadeba akʉza sãwũã Jeowaba kʼarebadata.

7, 8. (1) ¿Jeowara sãwũã krĩchabasi Job ʉ̃rʉra? (2) ¿Diarubara kʼãrẽta jarasi Job ʉ̃rʉra?

⁷ ¿Kʼaibasi Jobʼra? Jobʼra ẽbẽra biabasi akʉza iyi badata 3.600 poagaba. Jeowabara jarasi naʉ̃ drʉadera neẽ basita iyi kĩrãkʼara. Jobʼbara wawiabasi Jeowara adewara jʉrabasi nemitia oira (Job 1:8). Jeowaitara Jobʼra neũdukʼawuara biabasi.

⁸ Diarubara jarasi Jobʼbara Daizeze bedʼea ũrĩbʉta iya nebia diabʉ kʼarea. Maʉ̃ kʼarea Diaruba jarasi Jeowaʼa: «¿Bʉa kʼareba bʉe ẽ ka, iyi deta akʉza iyi nekʼãrẽ jõma erbʉra? Bʉa kʼarebabʉ baera iyi bia wãmarẽã akʉza iyi nedʉwʉrʉra eaba wã naʉ̃ drʉade. Mamina bʉ juwaba tõbarira akʉza iya nekʼãrẽ jõma erbʉta, bʉ kĩrãbita imitia bedʼea ẽ kʼawuaita» (Job 1:10, 11).

9. ¿Kʼãrẽta omarẽã iduaribisi Jeowabara Diaruara?

⁹ Diarubara jarasi Jobʼbara Jeowa bedʼea ũrĩbʉta iya nebia diabʉ kʼarea. Akʉza jarasi oseabasita Jeowa bedʼea ũrĩ ẽ bamarẽã. Maʉ̃ba Jeowabara Diaruaʼa iduaribisi zʉbʉria omarẽã, iya kãga ẽ basimina mawũã oita. Mawũã Jobʼbara ũdubisi Jeowa wãrĩnu kãgabʉta.

DIARUBARA ZɄBɄRIA OSI JOBʼRA

10. (1) ¿Sãwũã zʉbʉria osi Diarubara Jobʼra? (2) ¿Jobʼra kʼãrẽta oita krĩchasi maʉ̃ kʼarea?

¹⁰ Nããra, Diarubara zrʉgabisi Job nedʉwʉrʉra akʉza yi wuabemarara beikʉabisi. Maʉ̃ tẽã ʉ̃kʉrʉ Job nezokʼãrãra makenasida. Mawũẽra Jobʼra nekʼãrẽ neẽãbesi. Mawũã berabarida tẽã, Diarubara Job wũãwũãra 10 panʉta jõma makenasi nãgʉba. Mawũãsidu Jobʼra kʼẽrẽpabasi Jeowaʉ̃me. Daizeze Bedʼeaba jarabʉ: «Daizeze ʉ̃rʉ imitia bedʼea ẽ basita» akʉza Jobʼbara jara ẽ basita Daizezeba zʉbʉria obʉta (Job 1:12-19, 22).

11. (1) ¿Sãwũã audre zʉbʉria osi Diarubara Jobʼra? (2) ¿Jobʼra kʼãrẽta oita krĩchasi maʉ̃ kʼarea?

¹¹ Mawũã zʉbʉria osidu, Diarubara sãwũã wua zʉbʉria oita krĩchabasi. Maʉ̃ kʼarea Daizezeʼa jarasi: «Bʉ juwaba tõbari akʉra, yi bʉwʉrʉta akʉza iyi yarata, sãwũã bʉ kĩrãbita i kayirua jara ẽ baita». Mawũãna tẽã Diarubara Jobʼra mejãcha kayabisi kaya kayiruaba (Job 2:5, 7). Mawũãsidu Jobʼra kʼẽrẽpabasi Jeowaʉ̃me. Akʉza jarasi Daizezeʉ̃me kʼẽrẽpabʉde beita (Job 27:5).

12. ¿Sãwũã ũdubisi Jobʼbara Diarura sewa nebʉrʉ omiata?

¹² Jobʼbara mia kʼãrẽsida kʼawua ẽ basi iyi kʼãrẽa mejãcha zʉbʉrianʉmʉra, mia Diaruba mawũã obʉta. Jobʼbara krĩchasi Jeowaba kʼãwũã zʉbʉria obʉta iyi kãgabʉ kʼawuaya (Job 6:4; 16:11-14). Mawũãsidu Jobʼra kʼẽrẽpabasi Jeowaʉ̃me. Naʉ̃ba ũdubibʉ Jobʼbara Jeowa bedʼea ũrĩba ẽ basita iyaʼa nebia diabʉ kʼarea, awuarabʉrʉ Jeowa neũdukʼawuarabasita akʉza wãrĩnu kãgabasita. Mawũẽra jõma Diaruba jarabadara sewidabasi.

13. ¿Kʼãrẽta ũdusi Jobʼbara iyi kʼẽrẽpabʉ kʼarea?

¹³ Jobʼbara kʼawua ẽ basi ʉ̃tʉ sãwũã berabarinʉmʉra, mamina mawũãsidu Jeowaʉ̃me kʼẽrẽpabasi, mama ũdubisi Diarura jipa ẽbẽra kayiruata. Maʉ̃ kʼarea Jeowabara nebiata diasi Jobʼa iyiʉ̃me kʼẽrẽpabʉ kʼarea (Job 42:12-17).

DIARURA BɄ Ʉ̃RɄ IMITIA BEDʼEABɄ

14, 15. ¿Kʼãseabʉ Diarubara ẽbẽrarã ʉ̃rʉra?

¹⁴ Nekʼãrẽ biata kʼawuaseabʉ dayirãbara Job berabaridadeba. Idi ewadera Diarubara imitia jarabʉ jõma Daizeze odepanʉra ʉ̃rʉ. Iya jarabʉ Daizeze bedʼea ũrĩpanʉta iya nebia diabʉ kʼarea. Diaruba jarasi: «Yumakẽrãba jõma erbʉra iyi bebʉbari diayi» (Job 2:4, nota). Mawũẽra Diarubara jarasi ẽbẽra naʉ̃ drʉade jõma bʉbara Daizeze bedʼea ũrĩseabʉta iya nebia diabʉ kʼarea, mawũã Jobʼtrʉ abapai mawũã jara ẽ basi. Job beisidu Diarura imitia bedʼeabʉ Jeowa ʉ̃rʉ akʉza iyi kʼaidupanʉra ʉ̃rʉ. Maʉ̃ kʼarea Proverbios 27:11de jarabʉ: «Wũãwũã buru biabara, mʉ̃ so sobiabira, mʉ̃a panʉñi mʉ̃ ʉ̃rʉ imitia bedʼeabʉra».

¹⁵ Bʉra Jeowa neũdukʼawua baseabʉ akʉza iyiʉ̃me kʼẽrẽpa baseabʉ. Mawũã ũdubiyi Diarura sewa nebʉrʉ omiata. Adewara jõma idubʉseabʉ bʉa nãã kayirua obadara mawũã Jeowa neũdukʼawua bʼaita, bʉa mawũã ora bʉra bia wãñi. Daizeze ode jʉ̃drʉira biode biga, Diaruba jarabʉ bʉra Jeowaʉ̃me kʼẽrẽpa baseabʉ ẽãta bedʼea zroma zebʉrʉdera. Diarubara nekʼãrẽ jõma okĩrãbʉ bʉa Daizeze bedʼea ũrĩ ẽ marẽã. ¿Kʼãrẽta oi iyara?

16. (1) ¿Sãwũã sewabʉ Diarubara ẽbẽrarãra? (2) ¿Kʼãrẽta oseabʉ Diarubara bʉ Daizeze ode ba ẽ marẽã?

¹⁶ Diarubara nekĩrãtana oseabʉ bʉ sewaita Daizeze neũdukʼawuaba ẽ bamarẽã. Edaude «Diarura mara audu leon kĩrãkʼa wãbari mara abaʉdebema jidaita» (1 Pedro 5:8). Maʉ̃ kʼarea, bʉ neũdukʼawuaba akʉza bʉ mebẽrãba, awuru ẽbẽraba jaraseabʉ Daizeze Bedʼea kʼawua ẽ marẽã, mawũã bʉa nekʼãrẽ aripe oibada oẽ marẽã. Maʉ̃ba bʉa krĩchaseabʉ bʉa obʉra yibia ẽãta (Juan 15:19, 20).a Adewara Diarura «angel bia kĩrãkʼa ʉ̃nabʉ» mawũã sewa kĩrãbʉ Jeowa bedʼea ũrĩ ẽ marẽã (2 Corintios 11:14). Akʉza Diarubara dayirã sewabʉ, dayirã krĩchabibʉde Jeowaita dayirã zeri ẽãta nekʼãrẽ bia oita (Proverbios 24:10).

JEOWABA ZOKʼABɄTA OIDUA

17. ¿Kʼãrẽa ũrĩpanʉ Jeowa bedʼeara?

¹⁷ Dayirãba Jeowa bedʼea ũrĩbʉrʉdera, ũdubibʉ Diarura sewa nebʉrʉ omiata. ¿Kʼãrẽba kʼarebai Daizeze bedʼea ũrĩta? Daizeze Bedʼeaba jarabʉ: «Kãgaibara bʉ Zeze Jeowara bʉ soiduba, bʉ krĩchaiduba akʉza bʉ kakua jõmaneba akʉza bʉ zarea jõmainʉba» (Deuteronomio 6:5). Dayirãbara Jeowa bedʼea ũrĩpanʉ iyita wãrĩnu kãgapanʉ baera. Ewariza iyi audre kãga wãba opanʉ jõma Daizezeba zokʼabʉra. Juanba jarasi: «Daizeze kãgabara naʉ̃ta jarakĩrãkʉ: iya jarabʉra jõma ĩjãnañi, iya jarabʉra zare ẽ baera» (1 Juan 5:3).

18, 19. (1) ¿Saʉ̃ Jeowaba dayirã kayirua jarabʉra? (2) ¿Kʼãrẽa kʼawuapanʉ Jeowabara dayirãba obe ẽãra widibʉ ẽãta?

¹⁸ Jeowabara dayirã jarabʉ saʉ̃ta kayiruata. Maʉ̃ kayirua oẽ bai jarabʉra ũduyi rekuadrode yi trʉ̃ jarabʉmae jʉrada Jeowaba jʉrabʉra. Daya krĩchaseabʉ maʉ̃ mitia oira wãrĩnubaira nemitia ẽãta. Mamina bʉa Daizeze Bedʼeade akʉ kʼãrãpe akʉza maʉ̃ ʉ̃rʉ krĩchara kʼawuayi maʉ̃ra wãrĩnu nemitiata akʉza yibiata Daizeze Bedʼeaba zokʼabʉ ũrĩra. Adewara dayaʼa krĩchabiyi daya nemitia obadara iduaribibarata. Maʉ̃ ũduira zare ʉ̃kʉrʉitara, mamina maʉ̃ta ora sobiabayi akʉza neneẽãbayi, neũdukʼawuara bia ũduyi Jeowa ode kʼẽrẽpapanʉrata (Isaías 48:17, 18). ¿Sãwũã amaeseabʉ dayirãba nemitia obʉra?

¹⁹ Jeowabara zokʼa ẽ nekʼãrẽ dayirãba obeda ẽãra (Deuteronomio 30:11-14). Jeowara dayirã neũdukʼawuara akʉza biʼia ũdukʼawuabʉ dayikʉzaira, dayi sãwũãbʉta (Salmo 103:14). Pabloba bedʼea biata jarasi: «Dayi kayiruade baebibari krĩchara jõmaita zebʉa, mamina Daizezera jipabʉ, maʉ̃ kʼarea kayiruade baebibari krĩchara, daya oẽãsidu wũẽtara obi ẽ. Awuarabʉrʉ kayiruade baebibari krĩcha zebʉrʉdera, Daizezebara kʼarebaya maʉ̃neba ẽdrʉita mawũã zarea bamarẽã» (1 Corintios 10:13). Jeowabara dayirãra zarea diayi nebia aripe odamarẽã. Maʉ̃ zareara bʉa diayi maʉ̃ bedʼea zromaneba zarea bamarẽã (2 Corintios 4:7). Pablo mejãcha zʉbʉria berabaribʉrʉde Jeowaba zarea diasi. Maʉ̃ kʼarea Pabloba jarasi: «Nekʼãrẽ jõmaʉ̃ita zarea erbʉ, mʉ̃a zarea diabʉdeba» (Filipenses 4:13).

KÃGAIDUA JEOWABA KÃGABɄRA

20. ¿Sãwũã Jeowade kĩrãkʼa oseabʉ dayirãbara akʉza kʼãrẽa?

²⁰ Dayirãta Jeowa neũdukʼawua bakĩrãbʉbʉrʉ, bari amae be ẽ Jeowaba kãgabʉ ẽãra, awuarabʉrʉ oibara jõma iya zokʼabʉta (Romanos 12:9). Jeowa neũdukʼawuabara kãga iya kãgabʉra. Akʉza iya obʉ kĩrãkʼa ũdubipanʉ «kʼãga, bʉzrida, neneẽã, mejãcha jʉ̃abʉ, ẽbẽra bia, kãga jõka, ĩjãi, murumʉ̃rʉãbʉ, dayi kakua jipa zokʼaseabʉ» (Gálatas 5:22, 23). Kʼawuaita Jeowa neũdukʼawuara sãwũãbʉta akʉra Salmo 15:1-5 bayeda.

21. ¿Kʼãrẽba kʼarebai Daizezeba kãgabʉta oira?

²¹ ¿Kʼãrẽba kʼarebai maʉ̃ nekĩrãwãreã o ũdubira? Kʼawuabʉrʉde Jeowaba kãgabʉta, maʉ̃ ʉ̃rʉ audre kʼawuaira Daizeze Bedʼeata akʉibara (Isaías 30:20, 21). Bʉa mawũã obʉrʉde Jeowata audre kãga wãñi. Maʉ̃ba iya jarabʉra okĩrã wãñi.

22. ¿Kʼãrẽ nebiata ũdui Jeowaba jarabʉta ũrĩra?

²² Daya nemitia obʉta amaeira, daya wua jaigʉa jʉ̃bʉta wua yiwidi jʉ̃i kĩrãkʼabʉ. Daizeze Bedʼeaba jarabʉ: «Idubʉidua nãã kayirua jʉ̃badara» awuarabʉrʉ jʉ̃ĩdua wua yiwidita (Colosenses 3:9, 10). Daya kayirua nemitia obada amaeira zare mina, Jeowaba kʼarebayi dayirãba iya jarabʉta ũrĩra (Salmo 19:11). Ũrĩbara Jeowa bedʼeara dayirãba kãgabʉ baera, mawũã nebia diabʉ kʼarea ũrĩ ẽ baibara. Mawũã ora bʉa ũdubiyi Diarura sewa nebʉrʉ omiata akʉza bʉra Jeowa neũdukʼawuarabayi.