Adán Evaʉ̃mebara Daizeze bedʼeara ũrĩna ẽ basi

Ewari aba, Eva abapaibʉde damaba widisi: «¿Wãrĩnu Daizezeba jarasika jõma bakurudebema netata ko ẽ marẽã?». Evaba jarasi: «Daibara koseabʉ badu bakurudebema netara, mamina abaʉ bakurudebematrʉ kobe ẽ. Maʉ̃ta kora daira beiyi». Damaba jarasi: «Marara bei ẽ bayi, kaʉ̃ta kora Daizeze kĩrãkʼabayi». ¿Damaba jaradara wãrĩnubasika? Mawũã ẽ, maʉ̃ra jipa sewidabasi, mamina Evabara ũrĩsi. Evabara maʉ̃ netata akʉbasi baera kokĩrãsi. Iya ko kʼãrãpe tẽã Adánʼa kobisi. Adánbara kʼawuabasi iya Daizeze bedʼeata ũrĩ ẽ basibʉrʉ beita, mawũãsidu kosi.

Maʉ̃ ewaride Jeowaba Adánʼa akʉza Evaʼa widisi kʼãrẽa ũrĩna ẽ basita iyi bedʼeara. Evabara jarasi damaba kobisita, waya Adánbara jarasi Evaba kobisita. Ãya ũrĩna ẽ basi baera Jeowabara ãĩ bʉesi drʉa kĩrãwãreãnẽbara. Adewara bʉesi maʉ̃ drʉa kĩrãwãreã o ẽzadra kucho pʉreabʉta akʉza angelerata, mawũã akʉza jẽda eda wãna ẽ marẽã.

Jeowabara oẽ basi damara bedʼeamarẽã. Maʉ̃ba angel kayirua abaʉba bedʼeabibʉ kĩrãkʼa osi maʉ̃ damara. Maʉ̃ angel trʉ̃ra Diaru, iyabaʉta Satanás (Ãtomia). Ʉ̃ra zeide Jeowabara beayi Diarura, mawũã iyara ẽbẽrarãra wua sewa ẽ bayi nekayirua omarẽã.