Mejãcha kĩrʉbasi baera beasi yi mebẽãta

Adán Evaʉ̃me drʉa kĩrãwãreãneba ãĩ wãna tẽã, wũãwũã mejãcha barasida. Caín wũãwũãra nããrabemara ne umiabasi. Waya yi wũãwũã tẽãbemara Abelbasi, maʉ̃bara obejarata akʉbasi.

Ewari aba Caínba Abelʼʉ̃meba oprendata diasi Jeowaʼa. ¿Bʉara kʼawuabʉka kʼãrẽta oprendara? Maʉ̃ oprendabara jarakĩrãbʉ daya Daizezeʼa nebia diabʉ kĩrãkʼabʉta. Jeowabara kãgasi Abelba oprenda diadara, mamina Caínba oprenda diadara kãga ẽ basi. Maʉ̃ kʼarea Caínʼra mejãcha kĩrʉsi. Maʉ̃ba Jeowaba jarasi iyaʼa: «Bʉta kʼãwũã aribia kĩrʉbʉbʉrʉ nekayiruata ozeyi». Mamina Caínbara ũrĩ ẽ basi.

Maʉ̃ne Caínba Abelʼa jarasi: «Oieda wãna». Ãyi mama ũmepai bʉeda Caínbara beasi yi mebẽãra. ¿Kʼãrẽta osi Jeowabara? Jeowabara Caínʼra jĩgara jʉretasi yi mebẽrãneba. Maʉ̃nera iyira jipa jẽda ze ẽ baibarabasi.

¿Kʼãrẽta kʼawuapanʉ? Daya kãgabʉde ze ẽ bʉrʉ nekʼãrẽ oibadata, maʉ̃ba kĩrʉbiseabʉ. Akʉza dayita ewariza badua kĩrʉbʉbʉrʉ, adewara wuabemaraba ũdura dayi mejãcha kĩrʉbʉta, maʉ̃ne dayirãra awuarabaibara kĩrʉ ẽ baita. Dayi mawũã kĩrʉbʉta mesera aña oẽ bʉrʉ, maʉ̃ krĩcha dayirãra edebiseabʉ.

Abelba Jeowata mejãcha kãgabasi baera kʼẽrẽpabasi iyira. Maʉ̃ba Jeowabara ewari jõmaʉ̃nẽ kĩrãbebayi. Jeowabara naʉ̃ drʉa kĩrãwãreã babibʉrʉdera jẽda piradrʉbiyi Abelʼra.