¡Idibʉrʉ wũãwũã barabida!

Abrahánta Saraʉ̃mera dããrabasi juwa jidadapeadata. Amaesida Urde de bia erpananata, mawũã bʼaita karpa deda. Mamina Sarara maʉ̃ba mejãcha krĩcha zroma obi ẽ basi, Jeowa ʉ̃rʉ ĩjãbasi baera.

Sarata wũãwũã barakĩrãbasi baera jarasi Abrahánʼa: «Mʉ̃ nezokʼa Agarʼʉ̃me wũãwũã barara, mawũãra mʉ̃ wũãwũã kĩrãkʼa baya». Ewari berabari wãne Agarʼra wũãwũã barasi. Maʉ̃ wũãwũãra Ismael trʉ̃gasida.

Ewari bio berabarida tẽã Abrahán 99 poaga chuaside akʉza Sara 89 poaga chuaside, ẽbẽrarã ũbeaʉba akʉ jʉ̃ẽsida. Abrahánba jarasi iyi deidu zemarẽã enaʉ̃ne bakuru edre akʉza ãyibawara nekomarẽã. ¿Bʉara kʼaubʉka maʉ̃ra ẽbẽrarãra kʼairabasita? Maʉ̃rãra angelerabasi. Ãya Abrahánʼa jarasi: «Wuarebema poaga zebʉrʉde, bʉta bʉ kimaʉ̃meba wũãwũãta erpanañi». Saraba maʉ̃ bedʼea ũrĩside karpa dedaʉba, iyi sode ipidasi akʉza krĩchasi: «¿Mʉ̃ kʼãwũã yõdra bachubidade wũãwũã baraika?».

Poaga aba berabarida tẽã, Sarara wũãwũã barasi, Jeowa angelba jarada kĩrãkʼa. Abrahánbara iyi wũãwũãra trʉ̃gasi Isaac, maʉ̃bara jarakĩrãbasi ipidata. Isaac 5 poagabidade Sarabara ũdusi sãwũã Ismaelʼra ipidabasita Isaac kʼarea. Saraba iyi wũãwũãta bia akʉkĩrãbasi baera Abrahánʼinʉ jʉ̃ẽsi maʉ̃ jaraita: «Jʉretara Agarta akʉza Ismaelta». Nããra Abrahánbara maʉ̃ra okĩrã ẽ basi. Mamina Jeowaba Isaacta bia akʉkĩrãbasi baera naʉ̃ta jarasi Abrahánʼa: «Ora Saraba jarabʉta. Mʉ̃a akʉyi Ismaelʼra. Mamina mʉ̃a jaradara Isaacdeba aripe berabaribiyi».