Kĩrãbera Lot kima kʼãrẽ berabarida ʉ̃rʉ

Lotʼra basi Abrahánʼʉ̃me, Abrahánʼra yi yãbabasi, ãyiʉ̃meba nedʉwʉrʉrata mejãcha erpanasi baera, drʉata mejãcha neẽbasi nedʉwʉrʉra sama bʉeita, maʉ̃ba Abrahánba jarasi Lotʼa: «Dayi ũmena iyabaʉ drʉade babe ẽ baera, wãseabʉ bʉya kãgabʉma. Bʉa jidadamaera mʉ̃ra mamara wã ẽ bayi, awuarabʉrʉ jãpe wãñi». ¿Bʉmara Abrahánʼra ẽbẽra biabasika?

Lotbara ũdusi drʉa chiruaba pãwarabʉta akʉza bania mejãchabʉta. Maʉ̃ drʉara biabasi. Maʉ̃ kʼarea wãsi mama yi mebẽrãbawara bade, ãyira pʉwʉrʉ Sodoma kʼawabasi.

Ẽbẽrarã Sodomane akʉza Gomorrade pananarãra jipa ẽbẽra kayiruarabasi baera, Jeowabara krĩchasi maʉ̃ra pʉwʉrʉra jõma ãrĩ bʉeita. Mamina Jeowaba Lotʼta akʉza yi mebẽrãta ẽdrʉbikĩrãbasi baera zokʼasi angelerata ũme naʉ̃ bedʼeata jaramarẽã: «¡Mesera! ¡Wãidua naʉ̃ pʉwʉrʉdebara! ¡Jeowaba majõbiyi naʉ̃ra pʉwʉrʉra!».

Lotʼra wãña wã ẽ basi. Maʉ̃ kʼarea angelerabara Lotʼta, yi kamata akʉza yi kaurata juwama jidada kʼãrãpe edesida. Mõbe jarasida: «¡Wẽba wãidua! ¡Jẽda akʉraidua! Mawũã bei ẽ bʼaita».

Ãyi Zóar pʉwʉrʉidu babʉrʉde, Jeowabara tʉbʉ pʉreata zebisi ʉ̃tʉba Sodoma akʉza Gomorra ʉ̃rʉ. Maʉ̃ra pʉwʉrʉ ũmera Jeowabara jipa ãrĩsi. Lot kimaba Jeowa bedʼeata ũrĩ ẽ basi baera, jẽda akʉbʉrʉba iyira tã ba totosi. Mamina Lotba akʉza yi kauraʉ̃meba Jeowa bedʼeata ũrĩsi baera, maʉ̃neba ẽdrʉsida. Ãyira mejãcha sopʉabasibaibara Lot kimaba ũrĩ ẽ basi baera. Mamina ãyira aduʼabasibaibara Jeowa bedʼeata ũrĩsida baera.