Wãrĩnu ĩjãbʉta ũdubisi

Abrahánbara iyi wũãwũã jaradiasi sãwũã Jeowaʼa kãgaibarata akʉza sãwũã Jeowade ĩjã kʼawuaibarata. Mamina Isaac 25 poagabidade Jeowaba nekʼãrẽ Abrahánʼita zareabʉta widisi. ¿Kʼawuabʉka bʉara kʼãrẽta widisita?

Daizezeba Abrahánʼa jarasi: «Jidara bʉ warra abapaibʉta mõbe mʉ̃aʼa sakripisio kĩrãkʼa diara, katuma Moriade». Abrahánba kʼawua ẽ basimina kʼãrẽa Jeowaba mawũã jarabʉta, mawũãsidu ũrĩsi.

Maʉ̃ nrʉema diapeda Abrahánbara edesi iyi nezokʼarata ũme akʉza iyi warrata katuma Moriaeda. Ode wãne ewari ũbea babʉrʉde jĩgaʉba ũdusida katuma Moriara. Abrahánbara jarasi iyi nezokʼara ũmeʼa jʉ̃ãmarẽã, mawũã iyita akʉza iyi warra Isaacta sakripisio owãita. Abrahánba edesi kucho zaketa, waya yi warra Isaacba tʉbʉta edesi sakripisio oita. Isaacba widisi yi zezeʼa: «¿Samachu nedʉwʉrʉ daya sakripisio oira?». Abrahánba panʉsi: «Warra, Daizezeba diayi».

Ãyira jʉ̃ẽsi ãyi jʉ̃ẽibadamae. Ãyi mama jʉ̃ẽside osida altarta. Maʉ̃ tẽã Abrahánbara Isaacʼra juwama jʉ̃ kʼãrãpe akʉza jĩrʉta jʉ̃ kʼãrãpe altar ʉ̃rʉ bʉsi.

Abrahánba kucho jidabʉrʉde, Daizeze angelba ʉ̃tʉba jarasi Abrahánʼa: «¡Tõbarirãra bʉ warrata, neida orãra! Mʉ̃a idibʉrʉ kʼawuabʉrʉ bʉara wãrĩnu Daizeze ʉ̃rʉ ĩjãbʉta. Kʼãrẽ bedʼea neẽã diaibasi baera bʉ warra abapaibʉta». Abrahánbara maʉ̃ne ũdusi karnero kachuta eda bakururane jʉ̃ẽnʉmʉta, maʉ̃ne Abrahánbara yi warrara mesera enekʉata kʼãrãpe, mõbebʉrʉ maʉ̃ karnerota jidasi akʉza diasi Jeowaʼa sakripisiode.

Maʉ̃ ewarideba ʉ̃ta Jeowabara jarasi Abrahánʼra, iyi neũdukʼawuata. ¿Kʼawuabʉka kʼãrẽa mawũã jarasita? Abrahánbara ewari jõmaʉ̃nẽ Jeowaba zokʼabʉra obasi. Iya kʼawua ẽ basimina kʼãrẽa oibarabasita, ũrĩsi Jeowa bedʼeara.

Jeowabara iyabaʉ bedʼeata jẽda jarasi Abrahánʼa: «Mʉ̃a bʉaʼa diayi nebiata akʉza bʉdeba mejãcha zeyi ẽbẽrarãta». Maʉ̃ba jarakĩrãbʉ Jeowabara Abrahán mebẽrãneba nebia diaita yi ẽbẽrarã kʼẽrẽpabʉra.