Jacobʼa diasida nebiata

Isaacʼra 40 poagabasi Rebecaʉ̃me juwa jidasidera, iyara mejãcha kãgabasi. Ewari berabari wãne ãyara wũãwũã mĩguisuta tosida.

Yi nããbemara Esaúbasi, waya yi tẽãbemara Jacobʼbasi. Esaúra mea wãmiabasi akʉza mi wãmiabasi. Waya Jacobʼbara mejãcha kãgabasi deda bʼaita.

Maʉ̃ ewaridera yi zeze beibʉrʉde, yi wũãwũã nããbema audre diapanasi drʉata akʉza platata yi tẽãbemaraneira. Maʉ̃ mawũã diabʉra kapũrĩa bedʼeade jarabʉ herencia. Adewara maʉ̃ nebiade edabasi Jeowaba Abrahánʼa diaya adata, mamina Esaúbara Jeowaba mawũã diaya adara kʼãrẽ ẽ kĩrãkʼa akʉsi. Mamina maʉ̃ra Jacobʼitara audre yibiabasi.

Ewari aba Esaúra pae zesi meaʉ̃ba, aramaʉ̃ta iya ũsi yiko warranʉmʉta Jacobʼba onʉmanata, maʉ̃ne jarasi: «¡Mʉ̃ra jipa jarrakʉ! ¡Mesera, mʉ̃aʼa diara bʉa guiso kuara erchuta!». Jacobʼba jarasi: «Mʉ̃a diayi yiko erbʉra, mamina mʉ̃aʼa nãã jarada bʉ itaeba, bʉaʼa nebia diadaira mʉ̃aʼa diaita». Esaúba panʉsi: «¡Mʉ̃a sãwũãi maʉ̃ nebiara! Bʉa jidara, mʉ̃aʼa diara awuarabʉrʉ yikota, mʉ̃ra jarrakʉ». Esaúba kʼãwũã odadebara, ¿bʉara kʼãrẽta krĩchabʉ? ¿Iyira buru biabasika? Buru bia ẽ basi. Iya yiko bari diasi baera nekʼãrẽ bia jidaibadata.

Isaac zõnabaside, zesi ewari iyi nããbemara nekʼãrẽ bia diaita. Mamina Rebecabara kʼarebasi Jacobʼra, mawũã yi kimaba yi warra Jacobʼa nebiata diamarẽã. Maʉ̃ta Esaúba ũrĩside mejãcha kĩrʉsi akʉza krĩchasi yi mebẽã sãwũã beaita. Rebecaba Isaacʼʉ̃meba yi wũãwũãra akʉkĩrãpanasi, maʉ̃ kʼarea jarasida Jacobʼa: «Wãra bʉ yãba Labánʼinʉ mõbe, mama bara iyiʉ̃me. Iyira bʉ papa mebẽã. Mama bara Esaú kĩrʉbi berabariyeda». Jacobʼbara yibarira bedʼeara ũrĩ kʼãrãpe wãsi, mawũã yi mebẽãba bea ẽ bamarẽã.