Jeowara bedʼeabʉ Samuelʼa

Sumo saserdote Elíbara warra ũme erbasi. Ãyi trʉ̃ra: Hofní akʉza Finehásbasi. Maʉ̃rãra saserdoterabasi akʉza tabernakulode trajabasi. Mamina Elí warrarabara ũrĩ ẽ basi Jeowaba Ley diadara akʉza ẽbẽrarãra bia edada ẽ basi ãyara. Israelitarabara Jeowa nekʼãrẽ sakripisio oita edepanaside, maʉ̃nebema nekʼãrẽ audre yibiata jidapanasi Finehásba Hofníʉ̃mebara. Elíbara kʼauchuasi iyi warraraba nekayirua obasita, mamina maʉ̃ kʼarea kʼẽã ẽ basi. ¿Bʉmara kʼãrẽta oibasi Jeowabara?

Samuel Finehás akʉza Hofní tẽãbemabasi, mamina ãyide kĩrãkʼa nekayiruata oba ẽ basi. Maʉ̃ kʼarea Jeowara Samuel kʼarea mejãcha sobiabasi. Ewari aba diamasi, Samuel kʼãĩnʉmʉne ũrĩsi iyi trʉ̃barabʉta. Aramaʉ̃ta iyira piradrʉ kʼãrãpe wẽba wãsi Elíʼidu, mõbe jarasi: «Zachu mʉ̃ra». Aramaʉ̃ta Elíba jarasi: «Mʉ̃a trʉ̃ ẽ, wãra kʼãĩne». Aramaʉ̃ta Samuelʼra kʼãĩne wãsi, mamina kʼãĩbʉrʉde akʉza trʉ̃sida. Trʉ̃ma ũbeade, Elíbara kʼawuabasi Jeowabʉrʉ trʉ̃nʉmasita Samuelʼra. Elíbara jarasi akʉza bʉta trʉ̃ra, naʉ̃ta jaradua: «Jarada Jeowa. Bʉ nezokʼabara za ũrĩbʉa».

Samuelʼra wãsi jẽda kʼãĩne. Akʉza ũrĩsi iyabaʉ nemita: «Samuel, Samuel». Iya panʉsi: «Jarada Jeowa, bʉ nezokʼabara za ũrĩbʉa». Jeowaba jarasi: «Jarada Elíʼa, mʉ̃ara kʼawua oita iyita akʉza iyi mebẽrãta. Elíbara bia kʼaubʉ iyi warrarabara mʉ̃ tabernakulodera nekayiruata opanʉta, mawũãsidu iyara kʼẽã ẽ». Nrʉema diapeda Samuelbara ewasi tabernakulo puertara, iya nrʉemaza obada kĩrãkʼa. Samuelʼra mejãcha perabasi Jeowaba jarada jaraita Elíʼa. Maʉ̃ne Elíbara widisi: «¿Warra, kʼãrẽta jarasi Jeowabara?». Mawũã Samuelbara jõma jarasi.

Samuel yi zromabasidu Jeowa neũdukʼawuabasi. Israelitara jõmaʉ̃ba kʼawuapanasi Samuelʼra Jeowaba jidasita iyi propeta bamarẽã akʉza juez bamarẽã.