Ẽbẽra mejãcha yõbadata akʉza wẽrã zakera

Siria pʉwʉrʉdera wẽrã zaketa ababasi. Iyira iyi dedaʉba akʉza yi mebẽrãneba jĩgabasi, gorogorora Siriadebemaba edesi maʉ̃ra. Mõbe iyira nokʼo Naamán kima nezokʼabasi. Naʉ̃ wẽrã zakera Jeowaʼa yiwidʼibasi, mamina ẽbẽrarã iyibawarapanʉrabara awuru daizezeʼa yiwidʼipanasi.

Naamánbara kaya kayiruata erbasi iyi kakuade. Maʉ̃ wẽrã zakebara kʼarebakĩrãbasi Naamánʼra, maʉ̃ kʼarea Naamán kimaʼa jarasi: «Mʉ̃a ũdukʼauchu bʉ kimara kʼaiba bebita. Israeldebʉ Daizeze propeta, yi trʉ̃ra Eliseo. Iyara bʉ kimara bebiseabʉ».

Yi kima Naamánʼa jarasi wẽrã zakeba bedʼea jaradara. Naamánbara nekʼãrẽ jõma okĩrãbasi iyi kaya zroma erbʉ biaita, maʉ̃ kʼarea wãsi Israelʼeda Eliseo deidu. Naamánbara krĩchabasi iyira gorogorora nokʼo baera, Eliseobara akʉita wuabemara audre ʉ̃ta. Mamina Eliseoba iyi orraedai kʼaude, zokʼasi iyi nezokʼata naʉ̃ bedʼeata jaramarẽã: «Jordán doeda wãra, mõbe 7 bayeda ta kuira, maʉ̃ tẽã bʉ kayara beya».

Naamánbara Eliseoba maʉ̃ bedʼea jaradara kãga ẽ basi, maʉ̃ kʼarea jarasi: «Krĩchasi mʉ̃a naʉ̃ propetaba mʉ̃ra bebita iyi Daizezeʼa yiwidʼibʉde akʉza mʉ̃a nekʼãrẽ mejãcha awuara oita jʉ̃ãkʉasi, mamina mawũã oẽ basi. Awuarabʉrʉ jarasi mʉ̃ta kuide wãmarẽã Israel doeda. Israeldebema doira Siriadebema dota audre yibia. Maʉ̃ba mʉ̃itara biga kuita Siria dode». Naamánʼra mejãcha kĩrʉ kʼãrãpe wãsi Eliseo dedaʉba.

Naamán nezokʼarabara kʼarebasi iya bia krĩchamarẽã. Ãya jarasida: «Bʉmabi baduta oseabʉ bʉ bia bʼaita, maʉ̃ propetaba bʉa omarẽã widibʉra zare ẽ, ¿kʼãrẽa oẽ bʉa maʉ̃ra?». Naamánba ũrĩsi baera wãsi Jordán doeda akʉza ta kuima 7 bayeda kuisi. Yi 7de iyira besi. Mejãcha sobiabasi baera jʉ̃ẽsi Eliseo bʉidu biga diaita. Iya jarasi: «Idibʉrʉ kʼawuabʉrʉ Jeowara Daizeze wãrĩnuarata». Naamánʼra iyideda jʉ̃ẽsidera yi bemabasi. ¿Bʉmara maʉ̃ wẽrã zake Israeldebemaba Naamán ũdusidera sãwũã sentisi?