Danielʼra bʉesida eda pozo leon bʉrane

Daríosida Babilonia nokʼobasi, iyira Mediadebemabasi. Iyara kʼawuasi Danielʼra jipa ẽbẽra biata, maʉ̃ kʼarea ẽbẽrarã buru bia nokʼo bamarẽã jidasi. Maʉ̃ra yumakẽrãbara Danielʼra kãga ẽ basi maʉ̃ kʼarea beakĩrãpanasi. Ãyara kʼawuapanasi Danielʼra ewaride ũbea yiwidʼibasita iyi Daizezeʼa Jeowa. Maʉ̃ kʼarea jarasida Daríoʼa: «Bʉara oibara leyta ẽbẽrarã jõmaʉ̃ta bʉaʼabʉrʉ yiwidʼidamarẽã. Maʉ̃ne ẽbẽra abaʉba bʉ bedʼeata ũrĩ ẽ bʉrʉ eda bʉedaibara pozo jari leon bʉrane». Daríobara maʉ̃ra ẽbẽrarãba jaradata ĩjãsi baera osi maʉ̃ leyta, mõbe pirmasi.

Danielba maʉ̃ ley ʉ̃rʉ kʼawuaside, wãsi iyi deda. Iyira Daizezeʼa yiwidʼibasi bentana ewanʉmʉare. Ẽbẽrarã Daniel jʉrabadabara Daniel bʉidu eda wã kʼãrãpe ũdusida Daniel iyi Daizezeʼa yiwidʼibʉta, aramaʉ̃ta wãsida nokʼo Daríoidu maʉ̃ jaraita: «Danielbara ũrĩ ẽ basi bʉa jaradara. Iyi Daizeze Jeowaʼa yiwidʼibʉ ewaride ũbea». Daríobara Danielʼra kãgabasi akʉza kãga ẽ basi beadaira. Maʉ̃ kʼarea krĩchakisi kʼãrẽta oseabʉta Daniel beada ẽ bamarẽã. Iyira nokʼobasimina iya ley odara, awuara babi ẽ basi. Maʉ̃ kʼarea iya Danielʼra zokʼa bʉeibarabasi ibalbʉemarẽã leon bʉrane.

Maʉ̃ diamasi Daríora kʼãĩbe ẽ basi mejãcha krĩcha zroma obasi baera Daniel kʼarea. Diapeda zobeaidu wẽba wãsi akʉde, mõbe eda jʉrasi: «¡Daniel! ¿Bʉ Daizezeba ẽdrʉbisika bʉra?».

Daríobara nemita ũrĩsi, maʉ̃ne Daniel bedʼeata ũrĩsi: «Jeowaba mʉ̃ra leonʼrãra idu kʼobi ẽ basi». Daríora mejãcha sobiabʉba jarasi Daniel maʉ̃ zobeadeba ãĩ bʉedamarẽã. Danielʼra maʉ̃nera neida berabari ẽ basi. Tẽã nokʼoba jarasi: «¡Eda zobeade bʉeidua ẽbẽrarã Daniel ʉ̃rʉ imitia bedʼeadara!». Maʉ̃ra ẽbẽrarã eda bʉesidade leonʼrabara mesera makosi.

Daríobara naʉ̃ bedʼeata jarasi iyi pʉwʉrʉara: «Jõmaʉ̃ba wawia ũdubibara Daniel Daizezera, Jeowabara ẽdrʉbisi leonʼranebara».

¿Bʉra abarika ewariza badua yiwidʼibʉka Daizezeʼa, Danielba obada kĩrãkʼa?