Esterba ẽdrʉbibʉ iyi pʉwʉrʉta

Persade chuasi pʉwʉrʉ zake Susata. Maʉ̃ Susadebasi wẽrã zake Esterta, iyira judiabasi. Poaga mejãcha berabari nãã, Nabucodonosorbara iyi mebẽrãta edebarisi Jerusalénʼena. Iyira warisi yi primo Mardoqueoʉ̃me, maʉ̃ra Asuero nezokʼabasi, Asuerora nokʼo Persiadebemabasi.

Nokʼo Asuerobara kima yiwidita erbakĩrãbasi. Maʉ̃ kʼarea iyi nezokʼaraba jʉrʉsi wẽrãra biakiruta ãyi pʉwʉrʉdebemata, maʉ̃rane edabasi Esterta. Wẽrãra mejãcha jidadaradebemanera, maʉ̃ nokʼobara jidasi Esterta. Mardoqueobara jarasi Esterʼa jara ẽ bamarẽã iyira judiata.

Hamánʼra prinsipera nokʼobasi akʉza iyira yumakẽrã jipa ʉ̃tabʉta krĩchabasi. Iyara kãgabasi jõmaʉ̃ta iyi nãã sãkokode panamarẽã, mamina Mardoqueobara maʉ̃ra oẽbasi. Maʉ̃ba Hamánʼra mejãcha kĩrʉsi Mardoqueoʉ̃me, mawũã bea krĩchasi. Hamánba kʼawuaside Mardoqueora judiota, judiora jõma maʉ̃ pʉwʉrʉde badara bea krĩchasi. Hamánba nokʼoʼa jarasi: «Judiorãra jipa ẽbẽra kayiruara, maʉ̃ kʼarea beadaibara jõma». Asueroba panʉsi: «Ora bʉyima biabʉta». Asueroba jarasi Hamánʼa leyta omarẽã, maʉ̃ leyba jarabasi 13 adar jedekode, jõma ẽbẽrarãbara beadaibarabasi judiorãra. Mamina Jeowabara jõma akʉbasi kʼãrẽ berabarinʉmʉra.

Esterbara kʼawua ẽ basi maʉ̃ ley ʉ̃rʉra, maʉ̃ kʼarea Mardoqueobara maʉ̃ ley kopiadebemata zokʼa kʼãrãpe, jarasi: «Bʉra bedʼeaibara nokʼoʉ̃me». Esterba panʉsi: «Ewari 30 ba mʉ̃ nokʼoba trʉ̃ ẽãta, mʉ̃ra mawũãsidu iyidu jʉ̃ẽñi. Iya bakuru juwade erbʉta mʉ̃ma wuara bei ẽ bayi, mamina iya mawũã oẽbʉrʉ beiyi mʉ̃ra».

Esterʼra nokʼo de ewarade jʉ̃ẽsi, nokʼoba ũduside iyi juwata maʉ̃ bakuruba wuasi, aramaʉ̃ta Esterʼra iyi kʼawa jʉ̃ẽsi. Nokʼoba widisi: «¿Kʼãrẽta kãgabʉ bʉara?». Esterba jarasi: «Mʉ̃a yikota oita krĩchabʉ bʉita akʉza Hamánʼita». Ãyi nekode jʉ̃ẽside, Esterba jarasi jẽda zedamarẽã awuru ewaride. Ãyi jẽda jʉ̃ẽside, nokʼoba Esterʼa widisi: «¿Bʉara kʼãrẽta kãgabʉ?». Esterba panʉsi: «Ẽbẽra abaʉba beakĩrãpanʉ mʉ̃ta akʉza mʉ̃ pʉwʉrʉta, mʉ̃ bia okʼãrãpe kʼarebara daira». Nokʼoba widisi: «¿Kʼaiba mawũã beakĩrãbʉ bʉra?». Esterba panʉsi: «Maʉ̃ yumakẽrã dai beakĩrãbʉra, Hamán». Mawũã Asuerora mejãcha kĩrʉ kʼãrãpe zokʼasi Hamánta beadamarẽã.

Mamina Hamánba ley odara mia abaʉba awuara obe ẽ basi, mia nokʼoba. Maʉ̃ kʼarea nokʼobara Mardoqueora prinsepera nokʼo babisi akʉza jarasi awuru leyta omarẽã, maʉ̃ leyba jarabasi ẽbẽra abaʉba judiota beakĩrãbasibʉrʉ, judiorabara nekʼãrẽ oseabasi, mawũã ãyita beada ẽ bamarẽã. Jedeko 13 adarde judiorabara ãyi nejurarãra ãyi juwa edre baebisi, maʉ̃neba ʉ̃ta judiorabara poagaza ojʉ̃drʉsi piestata maʉ̃ berabarida jẽda kĩrãbedaita».