Esdrasba Daizeze Leyta pʉwʉrʉʼa jaradiabʉ

70 poaga berabarisi israelitara mejãchaʉta jẽda Jerusalénʼena zedata. Mamina ʉ̃kʉrʉra waidide basi Persia drʉade. Maʉ̃ranebema abaʉra Esdrasbasi, iyira saserdotebasi, adewara Jeowa Leyta jaradiabasi. Esdrasbara ũrĩsi ẽbẽrarã Jerusalénʼnebemarabara Jeowa Leyba jarabʉra ũrĩna ẽ basita, maʉ̃ kʼarea wãkĩrãbasi kʼarebaita. Maʉ̃ ewaridera Artajerjesʼra Persia nokʼobasi. Maʉ̃ne iya Esdrasʼa jarasi: «Daizezeba bʉara buru biata diabʉrʉ, mawũã Leyta jaradiamarẽã. Wãra Jerusalénʼena, mõbe edera ẽbẽrarã bʉme wãkĩrãbʉta». Esdrasʼra ãba yi jʉresi ẽbẽrarã Jerusalénʼena wãkĩrãbʉbawara. Ãyira Jeowaʼa yiwidʼisida ode bia wãita, mawũã wãsi Jerusalénʼena.

Jedeko kimare berabarida tẽã jʉ̃ẽsi Jerusalénʼena. Mamabema pʉwʉrʉ prinsiperaba jarasida Esdrasʼa: «Israelitaraba ũrĩna ẽ basi Daizezeba jarabʉra akʉza wẽrãra daizeze zeri ẽã yiwidʼibʉbawara juwa jidakʉasida». ¿Kʼãrẽta osi Esdrasbara? Iyira jõmaʉ̃ra nãã sãkokodekʉbe kʼãrãpe yiwidʼisi: «Jeowa, bʉara dai kʼarea mejãcha nebiata ozebʉrʉ, mamina daibara mejãcha ozebʉrʉ nekayiruata bʉ dabʉ nãã». Pʉwʉrʉraba Esdrasba bedʼea jarabadara ũrĩbasi, mamina mawũãsidu nekayiruara ariya opanasi. Maʉ̃ kʼarea Esdrasbara jidasi ʉ̃kʉrʉ zõrãrãta akʉza ʉ̃kʉrʉ juezʼrata mawũã akʉmarẽã kʼãrẽta berabarinʉmʉta. Jedeko 3 babʉrʉde jʉretasida jõma ẽbẽrarã Daizezeʼa yiwidʼikĩrã ẽ badara.

12 poaga berabarisi, maʉ̃ ewaride jẽda ara ojʉ̃drʉsida Jerusalén murota. Esdrasbara pʉwʉrʉra jõma ãba jʉre edasi, maʉ̃ne Daizeze Leyta le jʉ̃drʉsi. Maʉ̃ Ley akʉ jʉ̃drʉsidera pʉwʉrʉra piradrʉsida. Esdrasʼra Jeowa ʉ̃rʉ ibia bedʼea jʉ̃drʉsi, isrelitarasida juwa ʉ̃ta jirabarisida, mawũã ũdubita bedʼea abarikabʉta. Esdrasbara le ũrĩbi kʼãrãpe jara ũrĩbisi maʉ̃ Ley ʉ̃rʉ. Pʉwʉrʉdebʉra ẽbẽrarãbara kĩrãkita ũrĩna kʼãrãpe jẽga jʉ̃drʉsida, kʼawuasida baera Daizezedeba jĩgarabasita. Maʉ̃ nrʉemabida Esdrasbara Daizeze Leyʼra le ũrĩbibasi. Israelitarabara kʼawuasi wiña waebasita ewari Piesta ne u jõma Jʉrepedadebema oira. Maʉ̃ kʼarea meserabai nekʼãrẽ osida maʉ̃ piesta odaita.

Maʉ̃ piestara ewari 7 bayedabasi, maʉ̃ne israelitarãra mejãcha sobiapanasi. Jeowaʼa biga diasida ne urata mejãcha jʉrepesida baera. Naʉ̃ piesta kĩrãkʼa obaridara obarisida Josué ewaribasidebʉrʉ. Maʉ̃ piesta jõna tẽã, Daizezeʼa yiwidʼida kʼãrãpe jarasida: «Jeowa bʉa ẽdrʉbisi daira wuabemara nezokʼaranebara, bʉa daiʼa diasi yikota drʉa ibʉawabʉde akʉza naʉ̃ drʉa biata. Mamina daibara mawũãsidu bʉ bedʼeata ũrĩna ẽ basi. Daiʼa zokʼasi bʉara propetata daiʼa jara ũrĩbimarẽã, mawũãsidu daibara ãyi bedʼeara ũrĩna ẽ basi. Bʉara dai mawũã panʉinʉ ũdubisi jʉ̃ã kʼawuabʉta. Bʉara Abrahán jaradara jipa kĩrãdua ẽ basi, maʉ̃ kʼarea daiba idi jarayi, wãrĩnu ũrĩnaita bʉ bedʼeara». Pʉwʉrʉba bʉsi ãya oya adata akʉza prinsiperaba, saserdoteraba, lebitaraba pirma kʼãrãpe seyota bʉesida.