Jerusalén murorata

Jẽda akʉdadrʉ poaga nãã sãwũã berabaridata. Persia pʉwʉrʉde chuasi Nehemíasta, iyira Israeldebemabasi. Mamina nokʼo Artajerjes nezokʼabasi. Ewari aba Judádeba zesi Nehemías mebẽã arata, iya jarasi Nehemíasʼa: «Israelitara jẽda Jerusalénʼena wãnara bebʉdebʉ. Puertarata, murorata babilonioraba ãrĩnata ara oda ẽ baera». Nehemíasʼra maʉ̃ bedʼea ũrĩside sobia ẽã totosi akʉza kʼarebakĩrãbasi. Maʉ̃ kʼarea Daizezeʼa yiwidʼisi nokʼoba iyita idubʉebimarẽã Jerusalénʼena.

Nokʼobara kʼawuasi Nehemíasʼra sobia ẽãbʉta, maʉ̃ kʼarea jarasi: «Mʉ̃a bʉra kʼãwũã ũduka, ¿kʼãrẽba sãwũãnʉmʉ bʉra?». Nehemíasba panʉsi: «Mʉ̃ pʉwʉrʉ Jerusalénʼra ãrĩsida, ¿sãwũã sobia bʼaipe mʉ̃ra mawũã ãrĩbʉbʉrʉ?». Nokʼoba widisi: «¿Mʉ̃a kʼãrẽta oseabʉ bʉ kʼarebaira?». Nehemíasʼra mama chupea yiwidʼisi, mõbe jarasi: «Mʉ̃ bia okʼãrãpe idubʉera mʉ̃ra Jerusalénʼena, murora jẽda parãita». Nokʼobara idubʉesi, adewara diasi Nehemíasba nekʼãrẽ nesidabʉta, mawũã ode wãbʉrʉde neida berabari ẽ marẽã. Adewara Judá gobernador babisi. Diasi bakururata, Jerusalén puertata ara omarẽã.

Nehemías Jerusalénʼena jʉ̃ẽside akʉ jʉ̃ẽsi murora sãwũãbʉta. Ãba jʉredasi saserdoterata akʉza gobernadorerata, mõbe jarasi: «Naʉ̃ra kʼãwũãra biga ẽ, dayirãra ãba trajadaibara». Pʉwʉrʉde panʉra ẽbẽrarã bedʼea abarika zeda kʼãrãpe, maʉ̃ murorata ara ojʉ̃drʉsida.

Ʉ̃kʉrʉ israelitara nejʉrara ãyi ʉ̃rʉ ipidapanasi akʉza jarapanasi: «Uzapabida teguetaseabʉ murora maraba parãbʉra». Mamina israelitarabara maʉ̃ bedʼeara ũrĩna ẽã trajasida. Ãyara osida muro zromata.

Ẽbẽrarã israelitara jʉrapanʉrãra wãita krĩchasida Jerusalénʼinʉ ãyibawara yõita. Israelitarabara kʼawuaside mejãcha perasida. Mamina Nehemíasba jarasi: «Peraraidua Jeowa dayirãbawarabʉ». Maʉ̃ kʼarea ʉ̃kʉrʉ yumakẽrãrata jʉrʉsi akʉmarẽã yi trajapanʉrata. Mawũã ãyi nejʉrarãra yõna ẽ baibasi ãyibawara.

Murorata akʉza puertarata jõma yi omabasi 52 ewari babʉrʉde. Maʉ̃ kʼarea Nehemíasbara wesi lebitarata akʉza ẽzadra drasi trãita. Ababemane basi Esdrasta waya ababemane basi Nehemíasta. Jerusalén puertade basi dumeta, maʉ̃ne ãyira wãzesi muro bʉidu jʉ̃ẽita, Jeowaʼa trã wãbasi adewara chiruta zapanasi akʉza arpata, ãyara maʉ̃ta osida temploidu jʉ̃ẽñiena. Yumakẽrãraba, wẽrãraba akʉza warraraba Jeowaʼa diasida sakripisiorata, adewara osida piestata. Mejãcha sobiabasi maʉ̃ kʼarea ãyi nemira jĩgaʉba ũrĩpanasida.