Angeleraba jarakapanʉ Jesús todai ʉ̃rʉ

Roma pʉwʉrʉra César Augustoba zokʼabasi. Iya jarasi jõmara judiora registra wãnamarẽã ãyi todamae. Maʉ̃ kʼarea Joséta Maríaʉ̃mera wãsi Belénʼena, José mebẽrãta mamabemabasi baera. Maʉ̃ne Maríara tobodotabasi.

Ãyi Belénʼena jʉ̃ẽsidera neẽbasi baera sama bʼaita, nedʉwʉrʉra kʼãĩbadamaebʉrʉ baseabasi, mama tosida Jesúsʼra. Maríabara iyi wũãwũãra wuaba bʉra kʼãrãpe pikãga tabʉsi nedʉwʉrʉ nekobadamae.

Belén kʼawa obeja akʉbariraba ewarade diamasi ãyi obejarata akʉpanasi. Aramaʉ̃ne ãya ũdusi Jeowa angelʼra ãyima edaʉnʉma deguesi. Jeowa ʉ̃nara ʉ̃nasi ãyi ʉ̃rʉ. Ãyira perasi, mamina angelba jarasi: «Peraraidua mʉ̃a erbʉ bedʼea biata, Dayirã ẽdrʉbibarira tosi Belénʼne». Maʉ̃ diamasi angelerata mejãcha yi ũdubikʉasida, mõbe jarasida: «Ʉ̃tre Daizeze ʉ̃rʉ ibia bedʼeaidua, aduʼa beidua ẽbẽrarã Daizezeba bia akʉbʉrãra». Aramaʉ̃ne angelerãra neẽã totosi. ¿Kʼãrẽta osida obejara akʉbarirabara?

Obejara akʉbarirabara ãyirai jarapanasi: «Belénʼena wãibara dayirãra». Ãyira mesera wã kʼãrãpe ũdusida Joséta, Maríata akʉza wũãwũã zaketa, ʉ̃ra todapeadata.

Ẽbẽrarãra angelba obejara akʉbarira bedʼea jaradapeadaba, kĩrãmigasida. Maríabara mejãcha krĩchasi angelba jarada ʉ̃rʉ akʉza maʉ̃ta jipa kĩrãdua ẽ basi. Obejara akʉbarira jẽda wãsi ãyi obejarabawara akʉza Daizezeʼa mejãcha biga diasida, ãya kʼãwũã ũrĩsida baera akʉza ũdusida baera.