Jeowaba akʉbʉ Jesústa

Ẽbẽrarã Orientedebemabara krĩchapanasi chĩdauraba jaradiabasita samare wãita. Maʉ̃ diamasi yumakẽrãra Orientedebemaba ũdusi chĩdau mejãcha uruyabʉta, maʉ̃ chĩdaura wãbasi, aramaʉ̃ta kʼaidu pẽwã wãsi. «Chĩdauba» maʉ̃ra yumakẽrãra edesi Belénʼena. Maʉ̃ra yumakẽrãrabara ẽbẽrarã ode ũdubʉrʉa widi wãsi: «¿Samabʉ wũãwũã judiora nokʼo bʼaira? Daira iyi nãã sãkokode bakĩrãpanʉ».

Herodesbara Jerusalénʼne zokʼabasi, maʉ̃ kʼarea maʉ̃ wũãwũã ʉ̃rʉ ũrĩsidera mejãcha krĩcha zroma ototosi. Widisi saserdotera: «¿Sama todai maʉ̃ wũãwũã nokʼo bʼaira?». Ãya panʉsi: «Propetaraba jarasida Belénʼne todaita». Maʉ̃ kʼarea Herodesbara trʉ̃si yumakẽrãra Orientedeba uruta, mõbe jarasi: «Wãidua Belénʼena, mama jʉrʉidua maʉ̃ wũãwũãra, maʉ̃ tẽã jẽda zeda kʼãrãpe mʉ̃a jaraidua samachuta, mʉ̃sida wãkĩrãbʉ baera iyi nãã sãkokode bʼaita». Iya maʉ̃ bedʼea jaradapeadara jipa sewa nebʉrabasi.

Akʉza naʉ̃ «chĩdaura» jẽda wãsi, mawũã ẽbẽrarã Orientedebemabara kʼaidu pẽwã wãsi Belénʼinʉ jʉ̃ẽñena. Mama «chĩdaura» de abaʉ ʉ̃rʉ pikinʉma totosi. Maʉ̃ra yumakẽrãra eda wã kʼãrãpe ũdusida yi papara Jesúsʼʉ̃mebʉta. Ãyira wũãwũã nãã sãkokodekʉbe kʼãrãpe nebiata diasida: orota, insiensota akʉza mirrata. Mawũẽra, ¿wãrĩnu Jeowaba maʉ̃ra yumakẽrãra edesika Jesús bʉidʉ? Mawũã ẽ.

Maʉ̃ diamasi Jeowaba Joséʼa jarasi kʼãĩmokʼãrãde: «Herodesbara Jesúsʼra beakĩrãbʉ, edera namaʉ̃ba bʉ kimata akʉza bʉ wũãwũãta Egiptoeda. Mama bʼaidua mʉ̃ã kʼawua jarayeda, mara bebʉdebʉta taʉyeda». Mawũã Joséra meserabai wãsi iyi mebẽrãbawara Egiptoeda.

Jeowabara yumakẽrãra Orientedeba zedara jarasi Herodesʼare wãna ẽ bamarẽã. Herodesba kʼawuaside iyidu jʉ̃ẽ ẽãta mejãcha kĩrʉsi. Herodesba Jesús ũdu ẽ basi baera, wũãwũãra Belénʼnebemara jõma bea zokʼasi. Mamina Jesúsʼra neida berabari ẽ basi, Egipto pʉwʉrʉeda wãsi baera.

Tẽã Herodesʼra beisi, aramaʉ̃ta Jeowaba jarasi Joséʼa: «Marara idibʉrʉ aduʼa baseabʉ akʉza jẽda wãseabʉ Israelʼeda». Joséta, Maríata adewara Jesústa wãsida Nazaret pʉwʉrʉeda.